هما خرجوً شوي ورجعتلي مرت خالي وحيد غلقت الباب قاتلي يا أم المشاكل انتي درك مش راح تحبسي من المصايب لي راكي ديري فيهم ياك قتلك حبسي عليا الخماج لي راكي تشربي فيه حبيتي تفضحي روحك باه يستشفوا فيك مليح. قولي قتلها طاطا قاتلي لا طاطا لا زوج هداك وجه الهم هو لي راه يمدلك فيهم دوك نروحلوا للدار نتفاهم معاه قتلها لا طاطا مش هو لي يمدلي قاتلي من وين راكي تجيبي فيهم مال اهدري. قتلها وحده نعرفها . عادت تندب ياشومي وليتي تعرفي لي يبيعو الدوا روحي يا فطيمة انتي موتي وتهناي ويترحموا عليك الناس وانا خليتيني بومبة في داري الله يرحمك في هذيك الرقدة قاتلي شوفي يا والله يا جوليا يا مصيبة لا محبستي عليا هاد الرهج لي راكي تشربي كون ما نبعثكش للسبيطار تاع الادمان منيش أنا اصبري عليا عندك شهر في يدك يا ترجعي كيما قبل وحبسي لخماج هدا يا روحي شوفي وين تروحي منسحقكش في داري . درتلها براسي ايه قاتلي ارقدي درك رتاحي من بعد ساهل . خرجت من بعد عاودت رجعت باستني على راسي قاتلي راكي بنتي وراني خايفة عليك نهار يعود عندك ولاد تحسي بواش راني حاسة كبدتي مشوية عليكم للزوج بصح معليش لي كاتبها ربي هديك هيا . نكذب عليكم هدرتها دخلت من وذن خرجت من لخرة كلامها كامل مافاتش في راسي . قلبي عندو وعقلي عندو تبسمت وحدي وانا نتفكر كيفاش خاف عليا وجا يجري علجالي قولولي كيفاش منحبوش يا ناس راهو هو كلشي عندي . غفيت شوي وليت نخلط في المنام نشوف في ماما جاية عندي راجل بلا وجه هاز بيبي صغير في يده ويقولي ولدك من بعد نحس بواحد حاط يدو على جبيني من بعد على شعري على خدي على شواربي فتحت عينيا شفتوا هو مشعل الضو تاع تابل دونوي وقاعد يده فوقً راسي وشارد يخمم .قتلوا اصيل. هبط يدو من شعري قالي لباس .درتلوا براسي ايه فرغلي كاس ماء كبير قالي هاكي اشربي لازم تكملي هاد القرعة ليلة . تقعدت وحكمت عليه الكاس يدي رجفت شاف مع يدي وحكملي الكاس فوقها شربت كملت . عاودت رجعت عدلت رقدتي وغمضت عينيا بيسك كنت صح حابة غير نرقد ولا دايخة مفهمتش . قالي راح ترقدي قتلوا اممم حابة نشوف ماما ونروح عندها .تنهد قالي قولي الصح شحال شربتي من حبة . فتحت عينيا قتلوا وش من حبة ! عاود تنهد قالي صاي ارجعي ارقدي غمضت عينيا وغطست في منامي مرة أخرى .كنت كل ما نفطن نلقاه قاعد يعطيني نشرب كاس ماء ونرجع نرقد معلاباليش شحال فات الوقت بصح كي فطنت المرة الآخرة كنت وحدي شفت الساعة كانت 12 ونص تاع الليل . جعت وقفت من بلاصتي لبست في رجلي وهبطت وحدة وحدة في الدروج فتت على الصالة سمعت الهدرة طليت لقيت مسلم واصيل قاعدين مشعلين دخان وقاعدين كنت راح نروح بصح سمعت اسمي بقيت نتصنت . قالو مدخلتش مخي حكاية دوا تاع راس يدير هكا قالوا مسلم في قولك انت راهي تكذب قالي باينة بلي راهي تكذب أنا لي نعرفها . قالوا وكيفاش زعما وش سباب حالتها انت مشفتهاش كي وصلت كانت راح طيح ولي حيرتني كانت تهترف وتخلط برك في الهدرة قالوا هادي لي محيرتني قاتلي ريان مستحيل ربع حبات دوا تاع راس يديرو هاكا ، ممكن راهي شاربة حاجة أخرى . قالوا مسلم ولا بالاك من زعاف ، صباح حالتها معجبتنيش . قالوا والله مانيش عارف يا خويا تخلطت عليا ما فهمت والوا أنا باحرتلي حاس روحي حاصل في بلاصة وحدة . قولي انت هذاك الفرخ لي راه خاطبها كيفاش يبانلك. قالوا مسلم يبان خاطيه عاقل. ويبان يبغيها . قالوا وكي كنت في الصحرا كانت تخرج بزاف ولالا قالوا لالا متخرجش غير مع وسيم يديها لدارهم لقديمة علاه راك تسقسي. عدل قعدتو قالوا لقيت 40 مليون من دراهمي ناقصين والمفتاح كان غير عندها ومستحيل تصرف 40مليون غير في مكياج ولبسة .قالوا مسلم وش قصدك قالوا معلاباليش راهي مخلطة في مخي وخايف يكون وش في راسي صحيح من قبل ما نروح الصحرا كنت نروماركيها كانت هكدا تعرق بزاف وعينيها مفتوحين بزاف وشاردة كي نسقسيها تقولي منيش نرقد مليح بصح حالتها مش تاع وحدة مراهيش ترقد مليح . قالوا وش راك تقصد قالوا لي فهمتها هذيك هي . وسكتوا زمان في زوج يخمموا قالوا راهي قاتلي ريان من الأحسن تحبس القراية وتبقى في دار على عينينا خير حالتها مراهيش ستابل . قالوا مسلم مراكش تشوف فيها بلي بسبابك راهي هكدا . قالوا اصيل علاه بسبابي قالوا باينة اصيل بلي تبغيك قالوا تبغيني نجيب فرخ وتقولوا ارواح تخطبني ، هيا لي بغات هكدا خير ليها تنساني أنا تشلل روحها بالذهب ومترجعش عندي كيما كانت ، أنا راني نخمم فيها برك كي يماها ربي يرحمها وصاتني وحلفتني عليها سينو ما عندو ما دخلني في ربها كان تموت ميهمنيش فيها . طفى دخانو وناض خارج أنا بالخف دخلت للكوزينة ولعبتها خارجة منها شافني قالي شا راكي ديري في هاد الوقت علاه نضتي من فراشك قتلوا جعت حبيت ناكل. قالي اطلعي لشمبرتك دوك نجيبلك .
