طريق كامل وانا ساكتة نتفرج على تاقة ونتفكر في كلامًوا لخر يعني صاي درك راه يشوف فيا قح## مخطوبة لواحد وحابة نتمعشق معاه وصلني وسيم لجامعة قبل ما نهبط قالي لعشية نديك دوري شوي نحي على خاطرك واشري لي بغيتيها قتلوا لا منيش باغية قالي هدرت صاي على 2 نكون عندك ديري حسابك نديك تبسمت معاه قتلوا إذا قدرت بيسك لبارح مرقدتش مليح قالي راهي باينة أصلا بلي مرقدتيش تنهد قالي علاه جوليا راكي ديري هك إذا تحبيه علاه روحتي جبتي هذاك لملقط وقبلتي بيه . قتلوا وسيم تعيش منيش قادرة نهدر لي فيا يكفيني . قالي راكي تشوفي في حالتك ما بقا فيك والوا تبدلتي جوليا راكي رايحة تهلكي روحك قوليلي تقدري تشوفيه يخطب ويتزوج ويعيش حياتو يجيب ولاد من مرا أخرى اهدري تقدري . سكتت عليه ودورت وجهي قالي صاي تعرفي صلاحك وتعرفي لي يليق بيك بصح متبقايش تخرجي في طريقىوا كيما ليوم وتبقاي تحاولي فيه مش حلال عليك وحرام عليه خليه حتى هو يشوف حياتك مع لي تحبو ولي ممكن دير كلشي علجاللو . شفت قتلوا على شكون راك تهدر شكون لي تحبو . قالي اسمهان زعما معلابالناش بلي راهي تحبو وسباب عداوتك انتي وياها هو ولا راني غالط قتلوا مراكش غالط إذا حب يتزوج بيها ربي يهنيهم ومنزيدش نوقف في طريقه كون متهني . هبطت. ودخلت للجامعة جبدت تلفوني وعيطت لطفلة هذيك .قتلها وين نقدرو نتلاقاو قاتلي في دار صحبتي تساعدك قتلها منقدرش عندي شكون راه يعسني وإذا خرجت من الجامعة يفيقو ليا .قاتلي معليش راه عندي وحدة معريفة دايرة إقامة في جامعة نقدرو نروحو عندها للاشومبر لازم نعلمك كيفاش ديريها . قتلها ايه معليش قالتي ساعة ونكون عندك . فاتت ساعة وجات عندي طفلة عادية متبانش بلي أصلا من النوع لي يدروقي ولا مافية بصح هياسباب هلاكي وسباب هلاك بزاف بنات كيما حالتي ويا ريت ما شفتها ما عرفتها . جات سلمت عليا تعارفنا اسمها ملاك لي هيا شيطان مش ملاك . داتني للإقامة دخلنا بيسك أصلا لاجون سيكرتي يعرفهاً دخلنا عند صحبتها هادي حتى هيا كيفها تحت السواهي دواهي تشوفيهم لسانهم يغطي ويفرش. قعدت قاتلي شوفي راح نجربلك أنا وأنتي تعلمي إذا عجباتك راهي عندك دوز كاملة من عندي باطل وإذا معجباتكش عادي متزيديش ديري منها . قتلها معليش مهم متبانش عليا كي نديرها بيسك نسكن في دار عايلة نخاف ننفضح قاتلي متخافيش متبانش نهار لول قادر تفشلي ولا دوخي المهم نهار اول برك قتلها هذا برك وش يقدر يصرالي شافت مع صحبتها وقاتلي ايه هذا برك وش يقدر يصرى طلعي على ذراعك طلعت التريكو قاتلي شوفي كي تضربي الابرة لازم ديراكت في العرق فهمتيني كان تغلطي تقدري تنشلي من ذراعك . قتلها فهمت ايه شفتها دارتلي استيك في يدي وجبدت سيرانق جديدة وقرعة صغيرة كيما تاع دوا حطت منها في السيرانق وحكمت العرق وضربتلي وجعتني شوي بصح حملتها . كانت غايضتني روحي بزاف اخرتي ندير هكدا مفهمتش شكون لي راه داعيني حتى ضاعت حياتي هكدا . قاتلي تهلاي ديري غير 1 mg برك متزيديش سينو تولي في اوفر دوز فهمتي . كملنا خرجنا من عند صحبتها كانت وصلت 1 ونص قعدت برة في جاردان تاع جامعة نستنى في وسيم . والله تصدقو نسمع في أصوات ونشوف في أشكال جامي شفتهم في حياتي عباد يمشيو بالعكس عباد قاعدين على ريسانهم هدرة معكوسة صوت حيوانات الخوف لي حسيت بيه وليت نقول يا ربي هبلت أنا ولا وش بيا عيطلي وسيم ماسمعتش حتى وش راه يقول فهمت غير راني وصلت اخرجيلي. . وقفت. الدنيا دور وحريق في لحمي ما جبت وصلت عندو للباركينغ بسيف نمشي ونميل. . شفت معاه قاعدة نثبت نشوف في حوايج بلا ما نتعمق اكثر يعني بالمختصر وحدة مدروقيا باينة راح تكون حالتها كيفاش . ركبت معاه شاف مع وجهي قالي مالكي جوليا قتلوا والوا حاولت نتحكم في روحي باه ميفيقش . قالي علاه حالتك هكدا راك مريضة نديك للسبيطار راكي تعرقي ووجهك زرق قتلوا والوا حساسية موالفة تصرالي قالي راكي سير ولا نديك للسبيطار . قتلوا لالا راني لباس برك روحني للدار الشمس زادت عليا باغية غير نرقد .وصلنا هبطت قريب ما طحت لقيت مسلم حكمني بيسك كان قاعد برةً قالي وشبيك جوليا راكي مريضة . قالوا وسيم من لي ركبت معايا وهيا هكا دايخة وتعرق وتهترف قتلوا الحساسية برك. قالي امشي نديك للسبيطار علاه مديتهاش انت جايبها وهيا هكا . قالوا محبتش نديها بسيف . قتلوا مسلم تعيش باغية نرقد منيش قادرة نوقف راح نطيح قالي خلاص نديك للسبيطار يشوفو وشييك وارقدي قد ما تبغي. . قتلوا لالا مسلم خلاص منيش باغية نروح للسبيطار متفهموش منيش مهبولة أنا تدوني للسبيطار أصلا اصيل غدوة راح يتزوج ويخليني في سبيطار المهابل وكون قتلوا ميصدقنيش يصدقوا هو حتى طاطا قاتلي انتي تزوجي . بقاو يشوفو معايا حائرين وش راني نقول بيسك كنت نقول كلمة من الشرق وكلمة من الغرب . قالوا وسيم قتلك من قبيل وهيا تهدر هكا ما فهمت منها والوا راهي غير تخلط . قالوا نطلعها لشمبرة ومن بعد نعيط لريان تجي عندها هيا موالفة تسويفي معاها . طلعني لشمبرة هازني لحقوه لبنات وطاطا وخالي بيسك تخلعو كي شافوه داخل بيا هازني هكاك . مسحتلي ريمة وجهي هيا وأسمهان مفهمتش كيفاه صارت وجات عندي تمسحلي في وجهي . بديت نفيق من. مسحولي بالماء البارد فطنت شوي وراحو هادوك الخيالات والأصوات. دخلت عندي ريان علابالي بلي هما عيطولها بيسك غير هيا تجيهم يعني كي تصرا اي حاجة واحد يدوخ ولا كيما نقولو طبيبة تاع العايلة . قعدت جنبي قاتلي مالكي جوليا شا راه يضرك فيك قوليلي راكي تشوفي فيا قتلها ايه صح هنا بديت نترخى ونفطن شغل كنت في بير ولا قبر وخرجت منو . قاتلي وش راه يوجع فيك قتلها والوا برك كنت دايخة . قاتلي صحا شحال هاذو دارتلي بصباعها ثلاثة بقيت نتبث قتلها ثلاثة قاتلي صحا لي هنا ياك عرفتيهم كامل قوليلي اسماواتهم سميتهم كامل كي وصلت لأسمهان سكتت تصدقوا فرحتً كي شفتها واقفة حذايا قاتلي وهادي معرفتيهاش قتلها لا عرفتها هادي اختي . شفتها دمعة طاحت من عينها بالخف مسحتها .قاتلي مليح راكي لابأس بصح لاطونسيون. تاع قلب راهي هابطة وتاع الكور كيفكيف وسكر طايح كيفكيف هاذ شي يصرا غير إذا شربتي كاش دوا وكثرتي قوليلي وش شربتي . على كلمتها هاذي شفتوا دخل مخلوع جا راح يقدم عندي من بعد شغل فاق مع روحو حبس في نص قال لمسلم وش صارلها وشبيها وجها هكا بيسك صح كان وجهي ازرق ياك صباح كانت لابأس عليها .قالو منعرف جات هكا من الجامعة قالي وسيم من لي ركبت معايا وهيا دايخة وتهترف قدم عند ريان قالها وش بيها وش عندها كان يهدر معاها بلا ما يشوف فيا . قاتلوا الأعراض لي عندها تاع وحدة شاربة لا دروق ولا راهي شاربة كاش دوا ومكثرة شوي واثر عليها. . نطق مسلم قالها وش دروق أريان ااختي طفلة كانت في جامعة تقوليلي دروق. قاتلوا راني قتلك الاحتمالات لي كاينين على حالتها برك علابالي طلع اصيل رأسوا خزر فيا قالي وش شربتي اهدري . هبطت راسي نخمم في كذبة بلا ما نشوف معاه بيسك علابالي يفيقلي . قتلوا تاع وجع تاع راس . كان راسي يوجع وصحبتي عطاتني دوا وانا شربت ربع حبات باه يحبس عليا راسي بالخف . شعل فيا ديراكت يعيط قالي يا ربك ربع حبات فرد مرة في واش كنتي تخممي كي شربتيهم . قتلوا كان عندي وجع مقدرتش قالي وتشربي ربعة جاهلة انتي اهدري ولا كنتي حابة تقتلي روحك قالوا مسلم بالعقل اصيل . قالي تقولي بالعقل وش من عقل يبقا مع وحدة كيما هاذي شاف معايا وأنتي تشربي اي دوا تسما لي يمدلك دوا تحكميه وتشربي بالاك لكان دوا تاع اعصاب ولا دروق ولا بيريمي اهدري . هو جبد كلمة دروق وانا قلبي عاد يرجف . قتلوا نعرفو تاع راس كيما لي عطاتهولي ريان والله وزيد ماما قاتلي لازم ليوم ترجعي للدار وهيا راحت تخدم . كنت راح نرجع نهترف حسيت بأسمهان زيرتلي على يدي بصباعها فقت من روحي حبست الهدرة شاف معايا بشك قالي وش راكي تقولي انتي وش راكي تخلطي وش هو لي ماما اهدري شحال شربتي من حبة حتى راكي تهترفي هكا ربعة حبات امبوسيبل يوصلوك للحالة هادي راكي تكذبي . غمضت عينيا قتلهم راح نرقد تعبانة بقا يشوف معايا قالي معليش كلشي يعيا ويبان . وخرج لحقاتوا ريان والباقي .
