حرب القبائل ينتهي بالثأر..

بارت29.

بارت29♡

"‏ابتسم واجعل الدنيا معك تبتسم
‏وانسى همومك ،،، لو إنها ضايمة
‏،
‏الدنيا لابـد تاخـذ من رحاها قِسم
‏لا حزن مستمر ، ولا سعاده دايمة'

في بيت صيتة في الديرة..

سلطانة: ما قد شفت ليان بس جد تأثرت ببكاء حور و جنة شكلها غالية عليهن مرة، ويحبونها كثير..؟!
هُتون: أي والله أنها غالية على قلوبنا كلنا، تاخذ العقل ما شاء الله عليها..
سلطانة: طيب إيش قصتها، ما فهمت غير أنه طلع عندها عين وكذا..؟
سلهام: يا طويلة العمر سلمك الله هذي ما شاء الله عليها بنت مزيونة ما شاء الله تبارك الله، تخقين عليها فيها من الجمال وحسن الكلام شيٍ ما ينوصف لا اله إلا الله، الناس تحبها، أبوها أستغل ذا الشي و نشرها في التواصل الاجتماعي و تدرين العين حق في نص التصوير طاحت، وداها المستشفى يقولون فيها مرض خبيث، ودوها شيوخ يقولون عين قوية والحافظ الله، وذي كل السالفه يا طويلة العمر..
سلطانة بتأثر : لا حول ولاقوة الا بالله العلي العظيم...
غزل: حسبي الله، الله يشفيها ويرد عافيتها..
الكل: آمين...
.....

بيت أبو صقر..
أم صقر: منى سمعتي وش صار على بنت سالم ولد محمد؟!!
منى باستغراب: لا والله مانيب عارفة وش العلم؟!
أم صقر بحزن: ليان بنته -ما غيرها- يقولون فيها المرض الخبيث الله يجيرنا منه والمسلمين..
شهقت منى بقوة: ليااان؟!!!!
أم صقر: أي و ناسٍ تقول فيها عين و الله أعلم، الله يشفيها و يصبر قلب أمها..
منى بصدمة مو مستوعبة: ليان بنت سالم ما غيره أخو جنة و حور؟
صقر جا بعد ما سمع نص كلام أمه وكلام منى: وش فيتس أنتِ، قالت لتس ليان بنت سالم الله يعافيها، ما تفهمين؟!
منى بعصبية: أنا مو مستوعبة، كيف تبيني افهم مو مصدقة ليان ما غيرها تيك المزيونة،  لا حول ولاقوة الا بالله العلي العظيم..
أم صقر: الله يصبر أهلها و يقوي أيمانهم..
صقر: آمين يارب، إلا وين غسق؟
أم صقر: مدري عنها، هي قد جت وقعدت عندي أصلاً..!!
غسق نزلت الدرج وهي متغطية: السلام عليكم ورحمة الله وبركاتة..
أم صقر بغير نفس: جتنا المطوعة، وعليكم السلام..
سمعتها غسق وسكتت وراحت تبوس راسها و يدها وقعدت جنب منى و بعدت الغطى شوي عنها بس قريب لو جا أحد..
صقر: ليش ما تنزلي عند أمي يا غسق تقعدين معها..؟
غسق باحترام: العذر والسموحة يا خالة و الله أنشغلت و أول ما فضيت هذاني جيتك لبى قلبك..
أم صقر بمكابر: لبيتي بمكة، بس حتى ولو تنزلين تسلمين علي..
غسق: أبشري، بنزل أسلم عليك و نشرب القهوة سوا كل يوم..
منى صارت تحكي لغسق عن موضوع ليان الي بالنسبة للكل فاجعة لانها الطفلة المحبوبة من الكل سواء يعرفها ولا لا..

عند سالم..
دخل على ليان وهو لابس الزي الخاص..
نقلوها من الغرفة العادية إلى غرفة الملاحظة بسبب تدهور حالتها الصحية..
من أول ما دخل الغرفة وعيونه مو راضية توقف بكاء ما يدري ليه
ندم على تقصيره معاها، حس نفسه أب منافق ما كان يعيش معها مشاعر أبوية صادقة، كان كل همه الفلوس و الدعم و نسبة المشاهدات، ما يدري كيف أو ليش هو هنا بذي المرحلة من الندم الشديد..
يتبع:(