شاف معايا مسلم مليحة هكذا ياك مليحة حالتو هكذا وانتي حالتك هكدا علابالك راني حاب نفهم وش الشي لي خلاك ديري هكدا سكت عليه وقف قالي احسن حاجة درتيها انك الشهر الجاي تروحي من هنا ومذابيك تنساينا . خرج شفت وجهي في المراية صباعوا مطراسين في وجهي درت البوماد على سيكاتريس شربت حبة دوا ورقدت حتى لغدوة الصباح فطنت لقيتها العشرة عيطلي عليلو هزيت عليه قالي وين راكي راني قدام داركم . قتلوا نكمل نوجد روحي ونهبط . وجدت روحي هزيت حوايجي وهبطت لقيت خالي قتلوا راني رايحة نوجدوا ورق العقد قالي روحي ربي يسهل . خرجت عند عليلو لقيتوا واقف بجنب طنوبيل جديدة جا راح يقرب يسلم عليا بعدت تبسم قالي راني كريت طنوبيل باه نكونو الاز ركبت معاه نهار كامل فات غير خرجي هاد الورقة وروحي ابصمي على هاد الورقة . كملنا على 4 تاع العشية قالي نتغداو ولا نديك للبحر نقعدوا قتلوا لا تعبت وصلني برك للدار . وصلني هو حبس باه نهبط تفتح الباب وخرج اصيل شاف معانا من بعد دور وجهو ودخل للقاراج ركب طنوبيلتوا وراح . كملت هبطت دخلت للدار لقيتهم قاعدين يشربو في قهوة لعشية يضحكو ، علاه أنا منيش كيفهم علاه غير أنا حياتي هكدا شفت مع بنات خالي قاعدين مع رجالاتهم وحدة اونسانت ووحدة خدامة بدراهمها كل مرة. في بلاد تحوس مع راجلها وحدة مخطوبة توجد في جهازها . كملت طلعت ديراكت لشمبرتي لحقتني اسمهان مزلتي في رأيك جوليا راكي تغلطي . قتلها اخرجي اسمهان منيش قادرة نهدر . حكمتني من يدي قاتلي جوليا . نطرت يدي منها قتلها لا جوليا لا والوا اخرجي عليا أنا تعرفي مصلحتي ان شاء الله نموت انتي وش دخلك فيا . قاتلي معليش انتي ديري رأيك وانا ندير رايي . وخرجت كملت دوشت وخرجت قعدت في للكوافاز نشوف في روحي جبدت لمقص شعري لي كانّ يوصل حتى لتحت ظهري قصيتوا لرقبتي تقولولي علاه نقولكم حبيت نتخلى على حاجة نحبها كيما تخلاو عليا لي نحبهم كامل هزيتوا ورميتوا في لابوبال ورحت رقدت . مفطنتش حتى جات عندي ريمة نوضتني كان وقت العشا . غسلت وجهي وهبطت لقيتهم كامل قاعدين شافوا معايا حايرين جيت راح نقعد في بلاصتي لقيت مسلم وقف بدل بلاصتوا لي كانت ديما بجنبي . سكتت وقعدت نطقت مرت خالي جوليا علاه درتي لشعرك هكدا هبلتي علاه قصيتيه . درتلها بكتافي تاع هكدا برك . كانوا مطيبين شوربة كليت شوي ووقفت راح نطلع قاتلي نجمة انتي لي راكي تأكلي وتطلعي لشمبرتك عاونينا شوي مرانيش خدامين عندك . رجعت قعدت بسكات نستنى فيهم يكملوا باه نهز الطابلة ونغسل لماعن بقيت نشوف معاهم إحساسي مفهمتش هاد الوقت اني بعد شهر مبقيتش نشوفهم ولا نهدر معاهم . كملوا وقفوا راحو قعدوا في صالة . هو كي قعد قابلني هاز قهوتو يشرب فيها بديت نهز ندي في الماعن للكوزينة ، كملت كلشي بقا غير الصحن الكبير ما جيت نهزو يدي رجفت طاح تكسر كامل . ناضت مرت خالي الوسطاني صحن مراكيش عارفة تهزّيه معوقة انتي ولا تفحالي غير تجيبيلنا الرجال يخطبوك . كنت راح نرد عليها لقيتوا سبقني رد عليها في بلاصتي قالها مرت عمي ياك مراهش بمليار الصحن ، قاتلوا لا بصح ثبت روحها . شاف معاها سكتت . قال لريمة نوضي عاونيها جات هزت الزجاج من الأرض وانا كملت رحت للكوزينة نغسل في الماعن زدت مفقتش كيفاش طاحلي بلاط كنت نحط فيه الكيسان باه يستقطرو . دار حس كبير جاو كامل يجرو عندي يشوفو وش كاين . ناضت مرت خالي طير فيا انتي راكي ديري فيها مكرة شوفي شحال من كاس كسرتي هادا كامل كي مراكيش حابة تغسلي يا سيدي بالناقص من خدمتك هادي خسرتيلنا قاع الماعين تاع الدار في نهار . بقيت ساكتة عليها محبيتش نرجعلها بيسك مكنتش حابة المشاكل . المرة هادي نطقلها خالي قالها صاي سكتينا انتي بالاك مراهيش قادرة روحي بنتي لشمبرتك صاي دوك تكمل عليك اسمهان . قتلوا لا معليش نكمل قالي اسمعي كلامي روحي لشمبرتك ارتاحي دوك يكملوا لبنات . مسحت يديا وطلعت مع دخلت للشميرة لقيتوا لحقني . درت شفت معاه غلق الباب بالمفتاح وقدم عندي حط يدو على شعري قالي علاه قصيتيه . قتلوا وعلاه نخليه بواش راح يفيدني . حكملي يدي وطلعها قالي ويديك علاه راهم يرجفو هكدا . قتلوا معلاباليش وحدهم بقا يثبت. في وجهي ويقدم عندي حتى لصق فيا وهبط راسو باغي يبوسني نكذب عليكم كنت مستسلمة ليه نخليه يدير وش يحب يديا حاكمهم بيد ويد في رقبتي مقربني ليه اكثر حسيت بيه كيفاش باسني على خدي غمضت عينيا نتمنى في الوقت يحبس هنا عمري كامل احساس لحيتوا وشواربوا على خدي منقدرش نوصفوا مفقتش حتى سمعتوا ضحك قالي انتي علابالي بيك متحبيش الحلال خليني على الأقل نشبع منك في الحرام قبل ما تتزوجي حق ما كنت نصرف عليك كيما كنتي ديري بكري . فتحت عينيا لقيتوا يشوف معايا عينيه تحركت ندز فيه قتلوا بعد عليا قالي علاه نبعد حتى أنا من حقي نتمتع بيك كيما تمتعوا بيك قبلي تحبي نزيدك دراهم وتخليني ندير فيك وش نحب . هبطوا دموعي وانا نتحرك باغية نفك يديا من يديه ، بعد عليا اصيل أخطيني ، عاود قدم علاه نخطّيك أنا ثاني حاب حق ما كنت نصرف عليك ونفسد في دراهمي عليك حق 40 مليون لي هزيتيها من تعبي وشقايا ورحتي مديتها للملقط الخانز لي راكي حابة تتزوجي بيه . بقيت ندز فيه وهو حاكمني قتلوا بعد عليا اطلقني اصيل ولا نعيط نلمهم عليك . قالي عيطي من هنا للصباح ميهمنيش وعاود قدم يبوس فيا تاع بسيف مش بوسة نورمال بوسة تاع غل وكره وجعني بزاف بقيت ندز فيه ودموعي ينزلوا مقدرتش نعيط علابالي نرجع أنا لي غالطة مهما يصرا نبقى أنا هيا بنت الحرام . تنهدت غير الدموع ينزلوا وصوت شهقاتي استسلمت خليه يدير وش يحب لوقتاه وانا نقاوم خلي لي يصرى يصرى .
