အီဗယ်လ်စတားဂျန်နရယ်

Chapter 57

(Unicode)

ယင်ဖျင်လုက ကျောက်ယဲ့လန် ထည့်ပေးလိုက်သည့် လူများကို ခေါ်ကာ အုပ်ချုပ်ရေးမှူးရုံးသို့ တန်းသွားခဲ့သည်။

ယင်မိသားစု၏ ဆွေမျိုးများက ယင်အိမ်တော်တွင် စုဝေးလျက် တော်ဝင်အထောက်တော်နှင့် မည်သို့ရင်ဆိုင်ရန် ဆွေးနွေးနေကြဆဲ။ ရုတ်တရက် အစေခံတစ်ယောက်၏ သတင်းပို့သံကို သူတို့ ကြားလိုက်ရ၏။ "သခင်ကြီး၊ ဆဋ္ဌမမြောက်သခင်မလေး ပြန်ရောက်လာပါပြီ"

"ဖျင်လုလား" အုပ်ချုပ်ရေးမှူးယင်က လက်ဖက်ရည်ခွက်ကို ချပြီး အပြင်ဘက်သို့ ဒေါသဖြစ်စွာ ထွက်သွားခဲ့သည်။ ယင်ဖျင်လုကို အကောင်းအတိုင်း မြင်ရသည့်အချိန်တွင် သူ့ကို လက်ညှိုးတထိုးထိုးဖြင့် အော်ဟစ်ရင်း ကျိန်ဆဲလာတော့သည်။ "ဒီမသိတတ်တဲ့ သမီးမိုက်၊ မင်းကများ ပြန်လာရဲသေးတယ်"

ယင်ဖျင်လုက ပြန်ဖြေ၏။ "ကျွန်မက တာဝန်အရ ရောက်လာတာပါ"

"နင်က ဘာတာဝန်ရှိမှာလဲ။ ဒီသမီးမိုက်ကတော့ ငါ မင်းကို ဒီ‌နေ့ သေလောက်အောင် ရိုက်ပစ်မယ်။ မိသားစုကို အရှက်ရအောင် လုပ်တဲ့ ကောင်မ" အုပ်ချုပ်ရေးမှူးယင်က အရှေ့သို့ တိုးကာ သူ့ကို ရိုက်ရန် လက်မြှောက်လိုက်သော်လည်း ထိုအခိုက်တွင် ထူထဲလှသည့် ကြေးနီတံဆိပ်ပြားတစ်ခုက သူ့မျက်လုံးရှေ့သို့ ရောက်လာသည်။ "တော်ဝင်အထောက်တော်" ဟူသည့် စကားလုံးများက သူ့မျက်စိရှေ့တွင် ထင်ထင်ရှားရှား။

"ဘယ်သူက ငါ့ကို ရိုက်ရဲလဲ" ယင်ဖျင်လုက တံဆိပ်ပြားကို ကိုင်၍ သူ့ကို အေးစက်စက်မျက်လုံးများဖြင့် ကြည့်လိုက်သည်။ သူ့နောက်က လူများကလည်း ချက်ချင်း ခုခံသည့် ပုံစံသို့ ပြောင်းလဲလိုက်ကာ သူ့ကို အလယ်ဗဟိုတွင် ကာကွယ်ပေးထား၏။

"မင်းမှာ ဘယ်လိုလုပ်ပြီး ဒီတံဆိပ်ပြားရှိနေတာလဲ" အုပ်ချုပ်ရေးမှူးယင်က သူ့လက်ကို ပြန်ချလိုက်ရင်း သူ့ကို မှင်တက်စွာ ကြည့်လိုက်မိသည်။

"ကျွန်မက ကျောက်တာ့ယွမ်အစား စုံစမ်းစစ်ဆေးရေးမှာ ကူညီပေးဖို့ ရောက်လာတာပါ။ ကျောက်တာ့ယွမ်က အရမ်းအလုပ်များနေတာနဲ့ အချိန်မရလို့ ကျွန်မကို သူ့ကိုယ်စား လွှတ်လိုက်တာ"