အီဗယ်လ်စတားဂျန်နရယ်

Chapter 9

(Unicode)

ရောက်ရှိလာသည့် လူမှာ အမှုထမ်းရေးရာဌာနမှ လက်ထောက်အရာရှိတစ်ဦးဖြစ်သည့် ချန်ဟောက်ရိ ဆိုသူဖြစ်သည်။ အမတ်ကြီးယွိကျွင့်လင် အကျဉ်းထောင်ထဲတွင် ဆုံးပါးသွားချိန်ကတည်းက သူ စိုးရိမ်ပူကာ စိတ်မရှည်ဖြစ်ခဲ့ရခြင်းပင်။

သူ ရုံးတော်တွင် နှစ်ပေါင်းများစွာ အလုပ်လုပ်ခဲ့ပြီး နောက်ဆုံးမှ ရာထူးတိုးရန် အခွင့်အ‌ရေးရလာခဲ့၏။ ချက်ကျလက်ကျပြောရလျှင် သူက ဤနေရာအတွက် အရည်အချင်းပြည့်မီသင့်သော်လည်း ဧကရာဇ်က အချိန်အတော်ကြာအောင် အမိန့်ထုတ်ပြန်ခြင်းမရှိသေးပေ။ သူ အိပ်မပျော်နိုင်ဘဲ တစ်ခုခု မှားယွင်းသွားမည်ကို စိုးကာ ကျောက်ယဲ့လန်ထံ သွားရောက်ဆွေးနွေးရန် တွေးခဲ့မိခြင်း ဖြစ်ပေသည်။

သူ ကျောက်အိမ်တော်ကို လည်ပတ်ခဲ့သည့် နောက်ဆုံးအကြိမ်က အပေါင်းလက္ခဏာဆန်သည့် အဖြေတစ်ခု လက်ခံခဲ့ရလေရာ ပြန်မသွားခင် ရက်အနည်းငယ်အလိုအတွင်း စိတ်လှုပ်ရှားနေခဲ့၏။ သို့သော်လည်း ကျောက်ယဲ့လန်က သူ့လက်ထပ်ပွဲနှင့် အလုပ်ရှုပ်နေသောကြောင့် သူ့အရေးကိစ္စများကို အာရုံမထားနိုင်ကြောင်း ကြားသိခဲ့ရလေသည်။ ဤရက်အနည်းငယ်အတွင်း ကျောက်အိမ်တော်ကို သွားရောက်လည်ပတ်သည့် လုပ်ဖော်ကိုင်ဖက်များမှာ တံခါးပေါက်ကို ချိုးဖောက်လုမတတ် လာရောက်လာခဲ့ကြမှန်း သတင်းကြားခဲ့ရကာ သူ ထပ်မံ စိုးရိမ်ပူပန်ခဲ့ရပြန်၏။ သူက ဤမဟာအခွင့်အရေးကြီးကို လိုချင်သည့် တစ်ဦးတည်းသော လူမဟုတ်နိုင်ရာ။

ထို့ကြောင့် လက်ရှိအချိန်ကို အခွင့်ကောင်းယူ၍ သူ နောက်ထပ် လက်ဆောင်ကြီးကြီးမားမားတစ်ခုကို ပြင်ဆင်ခဲ့ပြီး မင်္ဂလာဆောင်အတွက် ဂုဏ်ပြုသည့်အနေဖြင့် လာရောက်လာပတ်ခဲ့ခြင်း ဖြစ်သည်။

"ဗိုလ်ချုပ်ယန်နဲ့ ကျောက်တာ့ယွမ်ကို ဂုဏ်ပြုပါတယ်။ နှစ်ယောက်လုံးက အရမ်းချစ်ခင်ကြည်နူးနေတာ တွေ့ရတော့ ဝမ်းသာစရာပါပဲ" ကြမ်းပြင်ပေါ်မှ တည်ငြိမ်စွာ ထလာသည့် ချန်ဟောက်ရိက သူ့အဝတ်အစားများမှ ဖုန်ကို ခါထုတ်လိုက်ရင်း သူ့လက်ထဲတွင် ပစ္စည်းများကို ပြန်ကိုင်လိုက်ကာ ပင်မအခန်းထဲသို့ အပြုံးတစ်ပွင့်ဖြင့် လမ်းလျှောက်ဝင်လာသည်။