(Unicode)
ဆောင်းရာသီနှင်းများကျပြီးနောက် နှစ်သစ်သို့ ဆိုက်ရောက်လာတော့သည်။ နောက်နေ့မှာ ကျောက်ယဲ့လန်၏ မွေးနေ့ပင်။
ကျောက်ယဲ့လန်နှင့် ယန်မျင်ထျင်တို့ အတူဆင်နွှဲကြသည့် ဒုတိယမြောက်မွေးနေ့ပွဲလည်း ဖြစ်၏။
တစ်လအလိုလောက်ကတည်းက ယန်မျင်ထျင်မှာ မွေးနေ့လက်ဆောင်အတွက် ပူပန်နေခဲ့ရသည်။
မနှစ်က မွေးနေ့မှာ စံနှုန်းအလွန်မြင့်သွားသောကြောင့် ယခုနှစ်တွင် ပိုကောင်းအောင် လုပ်ရန် ခက်ခဲပေလိမ့်မည်။ သို့သော် သူ ရိုးရိုးရှင်းရှင်းသာ ပြင်ဆင်ပြန်လျှင်လည်း စိတ်ရင်းမပါသလို ဖြစ်နေလိမ့်ဦးမည်။
ကျောက်ယဲ့လန် လတ်တလောအတွင်း ကြိုက်နှစ်သက်နေသည့်များ ရှိသည်လားဟု လေ့လာအကဲခတ်ကြည့်သည်။ သို့နှင့် ကျောက်ယဲ့လန် တစ်ခုခုလုပ်တိုင်း ယန်မျင်ထျင်မှာလည်း တိုးတိုးတိတ်တိတ် ချောင်းကြည့်မိ၏။
"ဘာတွေကြည့်နေတာလဲ" ကျောက်ယဲ့လန်က သူ့ဘက်သို့ လှည့်မေးလာသည်။
"မင်း ဘာဆွဲတွေနေလဲဆိုတာပဲ ကြည့်တာပါ" လက်ပူးလက်ကြပ်မိသွား၍ ယန်မျင်ထျင်လည်း ခေါင်းကို မိုးကောင်းကင်ကို မော့ကြည့်လိုက်ရသည်။
"ရေလမ်းကြောင်းပြမြေပုံ" မိုးခေါင်ရေရှားမှုဖြစ်ပြီးနောက် ကျောက်ယဲ့လန်မှာ ဟွိုင်ကျိုးစီရင်စုနယ်နားတွင် တူးမြောင်းတစ်ခုတည်ဆောက်ရန် စိတ်ကူးရှိခဲ့ခြင်းပင်။ သူလည်း ယခုနောက်ပိုင်း အားလပ်နေသည်နှင့် သူ့မှတ်ဉာဏ်ထဲမှ နယ်မြေအနေအထားကို စတင်ပုံကြမ်းရေးဆွဲနေခြင်း ဖြစ်၏။ သူ မြစ်တစ်စင်းကို လက်ညှိုးထိုးပြလိုက်ရင်း မေးလိုက်မိသည်။ "ဒီမြစ်ဘေးမှာ ဘာရှိလဲ မင်းမှတ်မိလား"
"မင်းမေးတာ လူမှန်သွားပြီ။ အဲဒီအချိန်က အခြေအနေကို ကိုယ် ရှင်းရှင်းလင်းလင်းကြီး မှတ်မိတာပေါ့" ယန်မျင်ထျင်က ဆိုလိုက်သည်။ "မြစ်ဘေးနားမှာ မျက်မှောင်ကြုတ်နေပြီး ကိုယ့်ကို ဘယ်တော့မိုးရွာမလဲဆိုတာ မေးတဲ့ ပြိုင်ဘက်ကင်းအလှလေးတစ်ယောက် ရှိတယ်လေ။ တိုင်းပြည်နဲ့ လူမျိုးအတွက် စိုးရိမ်နေတဲ့ သူ့ပုံစံက...ရင်နာစရာကောင်းလောက်အောင်ကို လှတာ"
YOU ARE READING
အီဗယ်လ်စတားဂျန်နရယ်
Humorမီယမ်မာထရန်စလေးရှင်း Genre - Comedy, Romance, Yaoi Total Ch - 92 Ch + 13 extra အော်သာ - ကုစန်းယွဲ့
