အီဗယ်လ်စတားဂျန်နရယ်

Chapter 84

(Unicode)

ယန်မျင်ထျင် ထွက်သွားသည်မှာ လဝက်ကျော်ကြာမြင့်ခဲ့ပြီဖြစ်ကာ စံအိမ်၌ ထူးထူးခြားခြား ပြောင်းလဲမှုများ မရှိပေ။ သို့သော်လည်း ကျောက်ယဲ့လန်မှာ ပို၍ အလုပ်ရှုပ်နေပေသည်။ နေ့တိုင်း အိမ်မှ စောစောထွက်သွားကာ ညနေမှ ပြန်ရောက်ပြီး နန်ကျောင်းနှင့် အရေးကိစ္စများ ဆွေးနွေးရန်အတွက် နန်းတွင်းသို့ မကြာခဏ ဆင့်ခေါ်ခံရ၏။ တစ်ချိန်တည်းတွင် ကျောက်ရွှိ၏ တည်နေရာကို ဆက်လက် ရှာဖွေနေခြင်းမှလည်း သူ လက်မလျှော့သေးချေ။

လက်ရှိအခြေအနေအရ ကျောက်ရွှိမှာ နန်ကျောင်းသို့ ထွက်ပြေးလွတ်မြောက်သွားလောက်ပြီဖြစ်၍ ဘုရင်သစ်နှင့်အတူ ပူးပေါင်းပြီး ထိုဒေသကို ထိန်းချုပ်ထားကာ ထီးနန်းသိမ်းရန်အတွက် ရွှမ်းအင်ပါယာဖြင့် စစ်ပွဲတစ်ခုစတင်ရန် ကြိုးပမ်းနေသည့်ပုံပင်။

သို့တိုင်အောင် ကျောက်ရွှိမှာ ထွက်ပြေးလွတ်မြောက်သွားခြင်း မရှိသေးဘဲ တစ်နေရာရာတွင် ပုန်းအောင်းနေလောက်မည်ဟု သူ ထင်သည်။ ထိုသူမှာ နန်ကျောင်းနှင့် အဆက်အသွယ်ရှိထားသည်မှာ ကြာလှလေပြီ။ မြို့တော်တွင် ကျောက်ရွှိ၏ သတင်းပေးများ ကျန်ရှိဦးမည်ကိုသာ သူ စိုးရွံ့မိသည်။

သူ စိတ်ပူနေသည့် အရာများကို ကျောက်ရွှမ်းထံ တင်ပြလိုက်ပြီးနောက် တော်ဝင်သက်တော်စောင့်များကို သစ္စာရှိလူများဖြင့် အစားထိုးပစ်လိုက်၏။ ပြီးမှ အမတ်အရာရှိတို့၏ အိမ်တော်များတွင် နှိုက်နှိုက်ချွတ်ချွတ် စတင်ရှာဖွေစေသော်ငြား အရိပ်အယောင်မျှပင် မတွေ့ရပေ။

ကျောက်ရွှမ်းက ထိုသူမှာ နန်ကျောင်းသို့ ထွက်ပြေးသွားခဲ့ပြီဖြစ်ကြောင်း ယုံကြည်နေပြီဖြစ်၍ ယန်မျင်ထျင်က ထိုမြေခွေးများကို နေရာတွင်ပင် ကွပ်မျက်လိုက်ရန်ကိုသာ စောင့်ဆိုင်းနေ၏။

"တပ်ကြီးက နေ့ရောညပါ ချီတက်သွားခဲ့တာ နန်ကျောင်းနယ်စပ်ကိုတောင် ရောက်သွားပြီ" ကျောက်ရွှမ်းက စာလိပ်ကို သူ့ထံ ကမ်းပေးလေသည်။

ခရီးစဉ်အကြောင်းနှင့် တိုက်ပွဲအစီအစဉ်များအကြောင်း လိုရင်းတိုရှင်းသာ တင်ပြထားခြင်းဖြစ်သော်လည်း ကျောက်ယဲ့လန်က စုတ်ချက်တိုင်းကို စိစစ်နေသလို အချိန်အတော်ကြာအောင် စိုက်ကြည့်နေခဲ့သည်။