(Unicode)
သူ ငယ်ရွယ်စဉ်က အနားတွင် ရွယ်တူမိန်းကလေးများစွာ ရှိခဲ့ကာ ထိုကလေးများက ကျောက်ယဲ့လန်နှင့် လာကစားရခြင်းကို သဘောကျကြသည်။ သို့သော်လည်း ကျောက်ယဲ့လန်က သူတို့ကို အမြဲ လျစ်လျူရှုခဲ့၏။ သူတို့စကားတပြောပြောနှင့် ရောက်လာကြသည်ကို မြင်တိုင်း မျက်နှာထားတင်းလျက် အခန်းထဲသို့ ပြန်ဝင်သွားသည်။ ထို့နောက် စာအုပ်တစ်အုပ်ကို ကောက်ယူ၍ အရေးကြီးသည့် လုပ်စရာများရှိနေသလို ဟန်ဆောင်တတ်သည်။
သူ့အမေက အတော်ရယ်မောကျသွားရသည်။ တစ်ညတွင် သူ့အဖေကိုပါ ပြန်ပြောလိုက်၏။ "ကျွန်မတို့မုန့်ထျင်ကတော့ ဘာမှမသိဘူးပဲ။ နောက်ကျရင် သူ ဘယ်လိုမိန်းကလေးမျိုး သဘောကျမလဲ ဆိုတာကို ကျွန်မတို့ မပြောနိုင်ဘူး"
"သူ့အသက်က ဘယ်လောက်ရှိသေးလို့လဲ။ ဒီလိုအရာမျိုးတွေကို နားလည်နိုင်ပါ့မလား။ ဟုတ်တယ်မလား၊ မုန့်ထျင်" သူ့အဖေက သူ့ကို လှမ်းကြည့်၍ ပြောလိုက်ခြင်းပင်။
"ဟုတ်" ကျောက်ယဲ့လန်က စာရေးရာတွင်သာ ခေါင်းစိုက်ထားလျက်။ "သူတို့က တအားဆူညံတယ်"
"ဒါဆိုရင် သားက တိတ်ဆိတ်တဲ့ လူမျိုးကို သဘောကျတာလား" သူ့အမေက မေးကြည့်သည်။
"အွန်း" ကျောက်ယဲ့လန်က မော့မကြည့်ဘဲ ပြန်ဖြေလာသည်။ "အမေ့လိုမျိုး...တိတ်ဆိတ်၊ နူးညံ့ပြီး တစ်ဖက်လူအပေါ် စဉ်းစားတတ်တဲ့အပြင် အချက်အပြုတ်ကောင်းတဲ့ လူမျိုးကို သဘောကျတယ်"
"တွေ့လား။ သူက ရှင်ထင်ထားတာထက် ပိုနားလည်ပါတယ်ဆို။ သူ့စိတ်ထဲမှာ အတွေးတွေအများကြီးပဲ" သူ့အမေက ရယ်ရယ်မောမောနှင့် ဆိုလိုက်၏။
သူ့အဖေကလည်း ပြုံးရွှင်သွား၍ သူ့ခေါင်းကို ပုတ်လိုက်မိသည်။ "မင်းအမေက ငါ့အပိုင်ဖြစ်နေပြီဆိုတော့ သူ့လိုမျိုး ဇနီးကောင်းတစ်ယောက်ကို မင်းရှာတွေ့တော့မှာ မဟုတ်ဘူး"
"မဟုတ်တာ။ သေချာပေါက် အမေ့ထက် ပိုနူးညံ့သိမ်မွေ့ပြီး ကိုယ်ကျင့်တရားပြည့်စုံတဲ့ လူကို ကျွန်တော် ရှာနိုင်တယ်" ကျောက်ယဲ့လန်က ပြန်ချေပ၏။
တချို့သောအကြောင်းများကြောင့် သူ ညက ထိုအိပ်မက်ကို မက်ခဲ့သည်။ ကျောက်ယဲ့လန် ဖြည်းဖြည်းချင်း မျက်လုံးဖွင့်ကြည့်လိုက်၍ ဤတစ်ကြိမ်တွင်မူ အိပ်မက်ဆိုးမဟုတ်သည်ကို စိတ်သက်သာရာရသွားခဲ့သည်။ ထို့နောက် သူ့ဘေးတွင် လဲလျောင်းနေသည့်လူကို လှမ်းကြည့်မိ၏။
YOU ARE READING
အီဗယ်လ်စတားဂျန်နရယ်
Humorမီယမ်မာထရန်စလေးရှင်း Genre - Comedy, Romance, Yaoi Total Ch - 92 Ch + 13 extra အော်သာ - ကုစန်းယွဲ့
