အီဗယ်လ်စတားဂျန်နရယ်

Chapter 89

(Unicode)

တော်ဝင်ဆေးကုသဆောင်၏ ခေါင်းဆောင်ဟောင်းဖြစ်သည့် ယောင်မုဇစ်၏ ဆရာဖြစ်သူမှာ အသက်အရွယ်ကြီးရင့်မှုကြောင့် အနားယူသွားပြီး မွေးရပ်မြေသို့ ပြန်ကာ နောက်ပိုင်းတွင် သမားတော်တစ်ယောက်အဖြစ် တိုင်းပြည်အနှံ့ လှည့်လည်သွားလာခဲ့၏။ လွန်ခဲ့သည့် နှစ်နှစ်က ဒေသတွင်းရှိ ကူအဆိပ်များအကြောင်းကို လေ့လာရန် တောင်ပိုင်းနယ်စပ်သို့ သူ သွားရောက်ခဲ့သည်။ ထိုအဆိပ်မှာ ရွှမ်းအင်ပါယာရှိ လူများအတွက် ဖြေရှင်းမရနိုင်သေးသည့် လျှို့ဝှက်ဆန်းကြယ်သော ပြဿနာတစ်ခုဖြစ်ရာ ဤစိန်ခေါ်မှုကို ကျော်လွှားနိုင်ရန် သူ မျှော်လင့်ခဲ့ခြင်းပင်။

တောင်ပိုင်းဒေသတွင် ရှိနေစဉ်အတွင်း ဒေသခံနတ်ဆရာတစ်ယောက်နှင့် တွေ့ခဲ့ရသည်။ သူတို့နှစ်ယောက် ချက်ချင်း ရင်းနှီးသွား၍ ဆေးပညာဆိုင်ရာဗဟုသုတများကို ဖလှယ်ကြကာ နှစ်နှစ်မျှကြာအောင် အတူလေ့လာခဲ့ကြ၏။ နောက်ဆုံးတွင် ထိုသမားတော်ကို ရွှမ်းအင်ပါယာသို့ ခရီးသွားလာရန် သူ ဖိတ်ခေါ်ခဲ့သည်။ သို့သော်လည်း သူတို့ နယ်စပ်ကို မဖြတ်ခင်တွင် ယန်မျင်ထျင်၏ လူများက သူတို့ကို ရှာတွေ့သွားပြီး အရေးကြီးကိစ္စဆွေးနွေးစရာရှိသည်ဟုဆိုကာ စံအိမ်သို့ လာရောက်ရန် ပင့်ဖိတ်ခဲ့လေသည်။

ယခင်သမားတော်ခေါင်းဆောင်မှာ ယန်မျင်ထျင်နှင့် ဖခင်ဖြစ်သူအပေါ် များစွာ လေးစားအားကျ၍ မိတ်ဆွေဖြစ်သူကိုပါ မြို့တော်သို့ အတူခေါ်လာခဲ့၏။ သို့ရာတွင် စံအိမ်သခင်နှစ်ယောက်လုံးက အိမ်တွင် မရှိသောကြောင့် သူ့တပည့်ဖြစ်သူကိုသာ အရင်သွားရှာရန် ဆုံးဖြတ်ခဲ့ရသည်။

ယောင်မုဇစ်မှာ စံအိမ်သို့ အခေါက်ပေါင်းများစွာ လာရောက်ခဲ့ပြီးလေပြီ။ ဤသည်က လေးကြိမ်မြောက် လာရောက်ခြင်းဖြစ်ပြီး ကံကောင်းထောက်မစွာ အချိန်ကောင်းတွင် ရောက်လာခဲ့ခြင်းပင်။

သူတို့လူအုပ်စုမှာ ပင်မဆောင်ထဲတွင် ထိုင်လိုက်ကြသည်။ ကျောက်ယဲ့လန်က သမားတော်ခေါင်းဆောင်ဟောင်းနှင့် သူ့နောက်မှ လိုက်လာသည့် နတ်ဆရာဖြစ်သူကို ကြည့်လိုက်၏။ ထို့နောက် အိမ်တော်ထိန်းချင်းကို လက်ဖက်ရည်ပြင်ခိုင်းလိုက်ကာ စိုးရိမ်ထိတ်လန့်စွာဖြင့်။ "ခင်ဗျားတို့နှစ်ယောက်မှာ တကယ်နည်းလမ်းရှိတာလား"