အီဗယ်လ်စတားဂျန်နရယ်

Chapter 67

(Unicode)

ကျောက်ယဲ့လန်မှာ ဝေါင်ကွေ့ရှန်းပြောသည့် စကားများအရ ဖြစ်ပျက်သမျှ အကြောင်းစုံကို ရှင်းလင်းသွားရသည်။

ယန်မျင်ထျင်နှင့် ဖုချန်းကို တိတ်တိတ်ပုန်း အချစ်ဇာတ်ခင်းနေကြသည်ဟု ထင်သည့် အုပ်ချုပ်ရေးမှူးယင်မှာ ဖုချန်းအကြောင်း စုံစမ်းရန် လူများစေလွှတ်ခဲ့ရာမှ ထိုကိစ္စက မြို့တော်အထိ ပြန့်သွားခြင်း ဖြစ်ပေမည်။

သို့သော်လည်း တိုက်တိုက်ဆိုင်ဆိုင်ပင် ဖုချန်းက တောင်ပိုင်းသို့ သူငယ်ချင်းအချို့နှင့်အတူ ခရီးထွက်သွားခဲ့သည်နှင့် ကြုံ၏။ သို့ဖြစ်၍ အဆိုပါကောလာဟလများကို ထိုအချိန်တွင် အတည်ပြုနိုင်ဦးမည် မဟုတ်ပေ။

အုပ်ချုပ်ရေးမှူးယင်ကို မြို့တော်သို့ ခေါ်သွား၍ စုံစမ်းစစ်ဆေးပြီးနောက်တွင်လည်း သူ့ကို ရုံးတော်နှင့် ပတ်သက်သည့် အရေးကြီးကိစ္စများ မေးခွန်းထုတ်ရပေဦးမည်။ မည်သူကမျှ သူ့ကို ထိုကောလာဟလအကြောင်း မေးကြမည် မဟုတ်တန်ရာ။

တရားရုံးတော်က ကျောက်ယဲ့လန် ဖုချန်းယောင်ဆောင်ထားသည့် အကြောင်းကို သိထားပြီးပြီဟု ထင်ကာ သူ့အပြစ်များကိုသာ သူ ဝန်ခံလိုက်လိမ့်မည်။

ထို့ကြောင့် ဤကိစ္စမှာ လျှို့ဝှက်ဆန်းကြယ်စရာကောင်းလှသော်လည်း ကောလာဟလများက ရပ်တန့်သွားခြင်း မရှိချေ။ သတင်းအနည်းငယ်ပြန့်သွားသည်နှင့် လူတိုင်းက ထိုသတင်းကို တုံ့ပြန်ကြပြီး အနည်းငယ် ချဲ့ကားပြောဆိုကြကာ သူတို့ကိုယ်ပိုင်ဇာတ်လမ်းများ ပေါင်းထည့်လိုက်ကြ၍ အချိန်ကြာလာသည့်အခါ မူရင်းအကြောင်းအရာဖြင့်ပင် ဆင်တူခြင်း မရှိတော့ပေ။

အစက လူတချို့သာ သံသယဝင်ခဲ့ကြသော်ငြား နောက်ပိုင်းတွင် အကုန်လုံးက ထိုကိစ္စကို ယုံကြည်လာကြ၏။

"ဒါဆိုရင် ဒီကိစ္စက မှန်တာလား၊ မှားတာလား" ဝေါင်ကွေ့ရှန်းက သတိထား၍ မေးခွန်းထုတ်လိုက်သည်။

ထိုမေးခွန်းကို ကြားရသည့် ယန်မျင်ထျင်က ထရပ်ပြီး ဆေးကို ကျောက်ယဲ့လန်၏ နှုတ်ခမ်းနားသို့ တေ့လိုက်ကာ ဆိုလိုက်လေသည်။ "ဆေးမြန်မြန်သောက်။ ပြီးရင် ကိုယ့်ရဲ့ နာမည်ကို ရှင်းလင်းပေးဦး"