အီဗယ်လ်စတားဂျန်နရယ်

Chapter 86

(Unicode)

ကျောက်ယဲ့လန် ယန်မျင်ထျင်ကို လိုက်ရှာသည့်အချိန်တွင် တစ်ခုခုက မှားယွင်းနေသည်ကို သူ သတိထားလိုက်မိသည်။

ယန်မျင်ထျင်က အပေါ့သွားလိုရုံမျှဖြင့် သူ့မြင်းကို ထွက်ပြေးသွားရန် ပစ်ထားခဲ့မည်ဟု သူ မယုံကြည်ပေ။ ထိုအကြောင်းပြချက်က ယုတ္တိမတန်ချေ။ တစ်ခုခုကြီးကြီးမားမား ဖြစ်ပျက်ခဲ့၍ မည်သို့ လိမ်ညာရန်ပင် တွေးချိန်မရသောကြောင့်သာ ဖြစ်လိမ့်မည်။

ပြီးခဲ့သည့် နှစ်ရက်အတွင်း ယန်မျင်ထျင်၏ အပြုံးမှာ ယခင်ကလို အပူအပင်ကင်းမဲ့ခြင်းမရှိသည်ကို ကျောက်ယဲ့လန် ခံစားမိသည်။ ထိုနောက်ကွယ်တွင် ကူကယ်ရာမဲ့သည့် အရိပ်အယောင်မျိုး အနည်းငယ် ရှိနေ၏။ အပြုံးက တဖြည်းဖြည်း ဖျော့တော့သွားပြီးနောက် အဆုံးမရှိသည့် သက်ပြင်းချသံများသာ ကျန်ရစ်နေခဲ့သည်။

အကင်းပါးသည့် ကျောက်ယဲ့လန်မှာ ယန်မျင်ထျင်က သူ့ထံမှ တစ်ခုခု ဖုံးကွယ်ထားမှန်း ခန့်မှန်းမိသော်လည်း ထိုမျှလောက် ပြင်းထန်လိမ့်မည်မှန်း မထင်ထားခဲ့ပေ။

ယန်မျင်ထျင်၏ ဖခင်ဖြစ်သူ မိခဲ့သည့် အဆိပ်မှာ အရောင်အနံ့ကင်းမဲ့၍ ရှာဖွေဖော်ထုတ်ရန် ခက်ခဲသည်။ ရောဂါလက္ခဏာများက မူးဝေခြင်း၊ အမြင်အာရုံဝေဝါးခြင်းနှင့် ခြေလက်အင်္ဂါများ အားနည်းလာခြင်းပင်။

ထို့ကြောင့် ယန်မျင်ထျင် ထိုနေ့က မြင်းနှင့် ပြန်မလာနိုင်ခဲ့ခြင်းမှာ ရုတ်တရက် သတိလစ်သွားပြီး မြင်းပေါ်မှ ပြုတ်ကျသွားခဲ့ခြင်းကြောင့်သာ။ နောက်ဆုံးကျန်ရစ်နေသည့် အသိစိတ်ကို မနည်းထိန်းချုပ်ရင်း သူ့ကို ကူညီပေးမည့် လူရှာရန် မြင်းကို လွှတ်ခဲ့ခြင်း သို့မဟုတ်လည်း သခင်ဖြစ်သူကို ကယ်တင်လိုသည့် မြင်းမှာ သစ္စာစောင့်သိစွာဖြင့် အကူအညီလာခေါ်ရန် သူ့ဘာသာ ပြေးလွှားလာခဲ့ခြင်း ဖြစ်နိုင်သည်။

"ဒါဆိုရင်...ဖြေဆေးရှိလား" ကျောက်ယဲ့လန် မေးကြည့်လိုက်၏။

ယောင်မုဇစ်က ရှက်ရွံ့ဟန်ဖြင့် ခေါင်းခါပြလိုက်သည်။ "ကျွန်တော်က ဗဟုသုတ သိပ်မရှိပါဘူး။ ဒီအဆိပ်အကြောင်းပဲ သိတာပါ။ ဘယ်လိုအဆိပ်ဖြေရမှန်းတော့ မသိပါဘူး။ အရင်ညကတည်းက ဆေးစာအုပ်တွေမှာလည်း လိုက်ရှာကြည့်ခဲ့ပေမဲ့ ဘယ်လိုဖြေရှင်းရမလဲဆိုတာ မတွေ့သေးပါဘူး။"