အီဗယ်လ်စတားဂျန်နရယ်

Chapter 74

(Unicode)

ဗိုလ်ချုပ်စံအိမ်၏ ဘိုးဘေးခန်းမမှာ သန့်ရှင်းအောင် လှည်းကျင်းထားပြီဖြစ်၍ ဗိုလ်ချုပ်ဟောင်းကြီး၏ ကမ္ပည်းပြားဘေးတွင် နေရာလွတ်နှစ်ခုပင် ရှိနေလေပြီ။ ယန်မျင်ထျင်က ကမ္ပည်းပြားနှစ်ခုကို ထိုနေရာတွင် ရိုသေစွာ ချထားလိုက်၏။

ကမ္ပည်းပြားနှစ်ခုတွင် "ကျောက်ကျန်" နှင့် "ယွိယင်း" ဟူသည့် အမည်များကို အသီးသီး ရေးသားထားကြကာ အိမ်တော်ထိန်းချင်းက သူတို့ကို အမွှေးတိုင်သုံးတိုင် ကမ်းပေးသည်။ ကျောက်ယဲ့လန်က ထိုကိစ္စတစ်ခုလုံးကို ဦးဆောင်သွားခဲ့ပြီး အမွှေးတိုင်ထွန်းသည့် ကိစ္စမှ ရိုသေကျိုးနွံစွာ ကန်တော့ကြသည်အထိပင်။

ဘိုးဘေးခန်းမတွင် ဂုဏ်သရေကြီးမြင့်သည့် ယန်မိသားစု၏ ဘိုးဘေဘီဘင်များဖြင့် ပြည့်နှက်နေပြီး နာမည်တစ်ခုချင်းစီတိုင်းမှာ အလွန်တရာ အထင်ကြီးလေးစားခံရသူများသာ။ ယခုအချိန်အထိ အမည်မသိဖြစ်ခဲ့ရသည့် သူ့မိဘများက နောက်ဆုံးတွင် အာရုံစိုက်မှုကို ခံခဲ့ရလေပြီ။

နာမည်တစ်လုံးရခဲ့ပြီးနောက် သူ့မိဘများအတွက် တရားမျှတမှုရှာဖွေရန် စဉ်းစားကြည့်ခဲ့သော်လည်း အန်းချင့်တိုက်နယ်မင်းကြီး၏ ပုန်ကန်မှုကလည်း အမှန်တရားပင် ဖြစ်သည်။ ထို့ပြင် လူများစွာ ပါဝင်ပက်သက်ခဲ့သည့် ထိုဖြစ်ရပ်မှာ လွန်စွာမှ ရှုပ်ထွေးလှ၍ ကြာရှည်လှပြီဖြစ်သည့် ဇာတ်လမ်းတစ်ပုဒ်လည်း ဖြစ်နေ၏။

ပုန်ကန်မှုကြောင့် မည်သူမည်ဝါတို့ သေကျေပျက်စီးကြသည်ကို စိတ်မဝင်စားသည့်လူမရှိပေ။ ထိုအစား သူက ကျွန်တစ်ယောက်အဖြစ် မွေးဖွားလာသည့် အချက်ကိုသာ လူတိုင်း သိသွားကြလိမ့်မည်။

ရွှမ်းမင်းဆက်၏ အမိန့်စည်းကမ်းများအရ ကျွန်များမှာ တပ်ဖွဲ့တွင် တာဝန်မထမ်းဆောင်နိုင်သလို အရာရှိရာထူးများကိုလည်း မပိုင်ဆိုင်နိုင်ချေ။ သူတို့က အရာဝတ္ထုပစ္စည်းများသဖွယ် သဘောထားခံရပြီး တခြားလူများရွေးချယ်ရန်အတွက် ဈေးထဲသို့ ပို့လွှတ်ခံရ၏။

သူ့မိဘများက ကြံရာပါများဖြစ်ကြောင်း တစ်ခါမှ ဝန်မခံခဲ့၍ သူလည်း ထိုအကျဉ်းထောင်တွင် တစ်လမျှ ဖြတ်သန်းခဲ့ရပြီးနောက် လွတ်ငြိမ်းချမ်းသာခွင့်ရခဲ့သည်။