အီဗယ်လ်စတားဂျန်နရယ်

Chapter 82

(Unicode)

ယနေ့တွင် ကျောက်ယဲ့လန်မှာ နန်းတွင်းသို့ ဆင့်ခေါ်ခံခဲ့ရသည်။ သုံးရက်အကြာတွင် ယခင်ဧကရာဇ်အတွက် အောက်မေ့သတိရပွဲတစ်ခု ကျင်းပရန်ရှိကာ ကျောက်ရွှမ်းက သူနှင့် အရေးကြီးကိစ္စများ ဆွေးနွေးလို၍ပင်။

ကျောက်ရွှမ်းက ထိုပွဲကို အကြီးအကျယ် မကျင်းပချင်ပေ။ သို့သော်လည်း ရွှမ်းအင်ပါယာ၏ အစဉ်အလာမှာ အောက်မေ့တမ်းတပွဲများကို အလေးအမြတ်ထား၍ လုပ်ကြရာ အပြင်ပန်းအားဖြင့် လုပ်ရိုးလုပ်စဉ်များကိုမူ လျစ်လျူရှု၍ မရချေ။

သို့ရာတွင် ကျောက်ရွှမ်းက သူ့ကို ခေါ်ခဲ့ခြင်းမှာ ထုံးတမ်းစဉ်လာဌာန၏ လုပ်ပိုင်ခွင့်အောက်တွင်ရှိသည့် အောက်မေ့ပွဲအခမ်းအနားအကြောင်းသာ ဆွေးနွေးရန် မဟုတ်။ တစ်ဖက်နန်းဆောင်မှ လူများကို မည်သို့ ဖြေရှင်းသင့်ကြောင်းလည်း ပါဝင်သည်။

ထိုနန်းဆောင်တွင် ယခင်အိမ်ရှေ့စံမှာ ဖမ်းဆီးထိန်းသိမ်းခံထားရဆဲဖြစ်၏။

ထီးနန်းသိမ်းခဲ့သည့်အချိန်တွင် ပထမဦးစွာ ဖယ်ရှားခံရသည့် လူမှာ ယခင်အိမ်ရှေ့စံဖြစ်ပြီး ထိုနောက်မှ အာဏာအတွက် စတင်ကြံစည်နေကြသည့် မိသားစုများကိုပင်။ ကျောက်ရွှမ်းက အာဏာစရလာသည်ကို မြင်သည့် ဒုတိယနှင့် စတုတ္ထမင်းသားများမှာ ပူးပေါင်းခဲ့ကြ၍ လုပ်ကြံသတ်ဖြတ်သူများ စေလွှတ်ခဲ့သည်။

သို့တိုင် ထိုကြိုးပမ်းမှုမှာ ထိခိုက်ဒဏ်ရာမရှိဘဲ အဆုံးသတ်သွားခဲ့သည်။ ကျင်းလင်အစောင့်များက သူ့ကို အချိန်မီ ကယ်တင်နိုင်ခဲ့ကာ ကျောက်ယဲ့လန်ကလည်း သူ့အတွက် မြားတစ်စင်းကို ကိုယ်စား ခံပေးခဲ့၏။ ထိုနောက်ပိုင်း သူတို့နှစ်ယောက်က ထိုမင်းသားနှစ်ပါးကို သတ်ဖြတ်ရန်အတွက် အကွက်ချစီစဉ်ခဲ့ကြသည်။

ယခုအချိန်တွင် ကျောက်ရွှမ်းမှလွဲပြီး ယခင်အိမ်ရှေ့စံနှင့် တွန့်ဆုတ်ကာ ရိုးအလှသည့် ပဉ္စမမင်းသားသာ ကျန်ရစ်သည်။ ကျောက်ရွှမ်း နန်းတက်ပြီးနောက် ပဉ္စမမင်းသားမှာ မြောက်ပိုင်းနယ်စပ်ဒေသသို့ လက်အောက်ခံမင်းသားအဖြစ် စေလွှတ်ခံရသည်။ ထိုသူမှာ နှစ်သစ်အခမ်းအနားအတွက် မြို့တော်သို့ လာတက်ရောက်သော်လည်း ပြန်မသွားသေးချေ။ အောက်မေ့ပွဲအခမ်းအနားကို တက်ရောက်ပြီးမှသာ ထွက်ခွာရန် စောင့်ဆိုင်းနေခဲ့ခြင်း ဖြစ်၏။