အီဗယ်လ်စတားဂျန်နရယ်

Chapter 55

(Unicode)

မနက်စောစောတွင် ကျောက်ယဲ့လန် ဆေးကြောသန့်စင်ပြီးနောက် လီယွိချန်းက မနက်စာစားရန် အခန်းထဲသို့ လာခေါ်စဉ် သူ့ကို ခိုးကြည့်နေ၏။

"ဘာတွေ ခိုးကြောင်ခိုးဝှက် ကြည့်နေတာလဲ" ကျောက်ယဲ့လန်က ဂရုမစိုက်စွာ ဆိုလာသည်။

"ယန်မျင်ထျင်ရော ဘယ်မှာလဲ" လီယွိချန်းက ဘေးပတ်လည်ကို လှမ်းကြည့်လိုက်မိသည်။

"မင်းက သူ့ကို ဘာလုပ်ဖို့လဲ"

"ကျွန်တော် မမြင်သင့်တာတွေ ထပ်မြင်ရမှာ စိုးလို့" လီယွိချန်းက သူ့မျက်နှာကို အုပ်ကာရင်း ပြန်ဖြေလာခြင်းပင်။

ကျောက်ယဲ့လန်က သူ့ကို စောင်းငဲ့ကြည့်လိုက်၏။ မနေ့ညက ယန်မျင်ထျင် ပြန်လာခဲ့သည့်အချိန်တွင် ထိုသူက တံခါးကို သေချာမပိတ်ခဲ့ပေ။

ကျောက်ယဲ့လန်က လီယွိချန်း၏ ပုံရိပ်ကို တံခါးဝ၌ ဖျတ်ခနဲ တွေ့မြင်လိုက်ရပြီး သူ ဘာမှမပြောနိုင်ခင်မှာပင် ယန်မျင်ထျင်က သူ့ကို နဖူးပေါ်တွင် နမ်းရှုပ်လာခြင်းဖြစ်ရာ သူလည်း လီယွိချန်း၏ အထင်အမြင်ကို ဂရုမစိုက်နိုင်တော့။

"ကျောက်ရှုန်းတို့နှစ်ယောက်..." လီယွိချန်းက သူ့စကားလုံးများကို ဂရုတစိုက် ရွေးချယ်လိုက်ပြီး သတိဖြင့် မေးမြန်းကြည့်လိုက်သည်။ "ခင်ဗျားတို့နှစ်ယောက်က တွဲနေကြတာလား"

ကျောက်ယဲ့လန်က စိတ်မပါ့တပါ ပြန်ဖြေသည်။ "ဧကရာဇ်ရဲ့ ကျေးဇူးတော်ကြောင့်ပေါ့"

"အိုက်ယား၊ ကျွန်တော်က အဲဒီအကြောင်းကို ပြောနေတာ မဟုတ်မှန်း ကျောက်ရှုန်းလည်း သိပါတယ်..." လီယွိချန်းက သူ့ခေါင်းကို ကုတ်ကာ သူ့လက်မနှစ်ချောင်းကို ထောင်ပြီး ဝေ့လည်ကြောင်ပတ်နှင့်။ "ရင်ဘတ်ချင်းနီးတာမျိုးကို ပြောတာ..."

ကျောက်ယဲ့လန်၏ မျက်လုံးများက သူ့ကို မရေမရာ ပြန်ကြည့်လာ၏။ "ဘာလို့ မေးတာလဲ"

"ကျွန်တော်က ဒီအတိုင်း သိချင်လို့..." လီယွိချန်းမှာ သူ့ခံစားချက်များကို အတိအကျ မရှင်းပြနိုင်ချေ။ အစကတည်းက သူတို့ဆက်ဆံရေးမှာ မရိုးရှင်းကြောင်း သူ ခံစားမိသည်ပင်။ မိတ်ဆွေများမဟုတ်လည်း တိုင်ပင်ဖော်တိုင်ပင်ဖက်များ ဖြစ်လိမ့်မည်ဟု ထင်ထားသည့်တိုင် ဤကဲ့သို့ ခင်ပွန်းသည်နှင့် ဇနီးဖြစ်သူ၏ ဆက်ဆံရေးမျိုး ရှိလိမ့်မည်ဟုတော့ မထင်ထားခဲ့ပေ။