(Unicode)
လူအုပ်ကြီး၏ သိချင်ကာ စူးစမ်းနေကြသည့် အကြည့်အောက်တွင် လူတစ်ယောက်က နောက်ဆုံး တံခါးဝ၌ ပေါ်လာခဲ့ပြီး အခြွေအရံရှစ်ယောက်မှာလည်း နောက်မှ လိုက်ပါလာ၏။ အရှေ့ရှိ ခေါင်းဆောင်ဖြစ်သူက လူငယ်လေးတစ်ယောက်ဖြစ်ပြီး ခံစားချက်ကင်းမဲ့သည့် မျက်နှာထားဖြင့် ရှိနေကြသည့်လူများကို အေးစက်စွာ စူးစိုက်ကြည့်လာသည်။
"ကျောက်တာ့ယွမ်များလား" အုပ်ချုပ်ရေးမှူးယင်က ရှေ့တိုးပြီး မေးကြည့်လိုက်သည်။ "ကျောက်တာ့ယွမ်ဆီမှာ အမိန့်ပြားရှိမလားဆိုတာ မေးပါရစေ"
ထိုလူငယ်က မောက်မာစွာပင် သူ့ထံ ကမ်းပေးလိုက်ပြီးနောက် လူအုပ်ကြီးမှာ ထိုသည်ကို အစစ်ဟုတ်၊ မဟုတ် အတည်ပြုရန် ဝိုင်းဖွဲ့လိုက်ကြ၏။ သို့သော်လည်း ထိုအခိုက်တွင် လူငယ်လေး၏ အကြည့်က ကျောက်ယဲ့လန်နှင့် ယန်မျင်ထျင်ဆီသို့ ရောက်သွားရာ သူ့မျက်လုံးများထဲရှိ စိတ်အားထက်သန်မှုကို အရိပ်အယောင်မျှ မြင်တွေ့ရသည်ပင်။
ယန်မျင်ထျင်က ပါးစပ်ထောင့်စွန်းများ ကော့တက်သွားလျက် အနည်းငယ် ပြုံးလိုက်ပြီး သူ့ကို ခေါင်းညိတ်ပြသည်။
လီယွိချန်း၏ ပါးစပ်မှာ ဟောင်းလောင်းဖြစ်နေဆဲ။ ကျောက်တာ့ယွမ်ဆိုသည့် လူကို မယုံနိုင်ဟန် စိုက်ကြည့်နေမိ၏၊ ထိုသူမှာ ကျောက်ယဲ့လန်ဘေးရှိ အစေခံလေးပင် မဟုတ်လော။
"တကယ် ကျောက်တာ့ယွမ်ပဲကိုး။ ဒါက တော်ဝင်အထောက်တော်ရဲ့ အမိန့်ပြားပါပဲ" စကားပြောပြီးနောက် အုပ်ချုပ်ရေးမှူးယင်က လူအုပ်ကြီးကို ဦးဆောင်လျက် ဂါရဝပြုလိုက်သည်။ "ကျောက်တာ့ယွမ်က ဒီနေ့ အလည်လာမယ်ဆိုတာကို ကျွန်တော်တို့ မသိလို့ပါ။ ကြိုဆိုရမှာကို ပျက်ကွက်ခဲ့မိပါတယ်။ ကျေးဇူးပြုပြီး အထဲမှာ ဝင်ထိုင်ပါဦး"
ကောင်းထန်က ခေါင်းညိတ်ပြလာသည်။ အဝင်ဝဧည့်ခန်းထဲသို့ လျှောက်သွားစဉ် သူ့လည်ချောင်းကို ရှင်းလိုက်ရင်း ဟိတ်ဟန်များသည့်ပုံဖြင့်။ "နှုတ်ဆက်တာတွေဘာတွေ မလုပ်နေနဲ့တော့။ ငါ ဒီကို စုံစမ်းဖို့ ရောက်လာတဲ့အကြောင်း မင်းကို အသိလာပေးတာပဲ။ မင်းက ငါ စုံစမ်းမေးမြန်းတာတွေကို ပူးပေါင်းပေးဖို့ပဲ လိုတယ်"
YOU ARE READING
အီဗယ်လ်စတားဂျန်နရယ်
Umorismoမီယမ်မာထရန်စလေးရှင်း Genre - Comedy, Romance, Yaoi Total Ch - 92 Ch + 13 extra အော်သာ - ကုစန်းယွဲ့
