Chapter 223: ရွေးချယ်စရာ
“မင်းရဲ့ ကိုယ်ခန္ဓာ နေရာအနှံ့ နဲ့ ကီ သွေးကြောတွေနဲ့ ရင်းနှီးတဲ့သူက ငါတစ်ယောက်တည်းလေ။ အားဘယ်လောက်စိုက်ထုတ်ရမလဲဆိုတာရယ် ၊ ဘယ်နေရာမှာ အားထည့်သင့်လဲဆိုတာမျိုး ငါပဲသိတယ်။ နည်းနည်းလေးမှားလိုက်တာနဲ့ အဲ့ဒါက မင်းရဲ့ ကီသွေးကြောတွေနဲ့ ကိုယ်တွင်းအင်္ဂါတွေကို အလွယ်တကူ ဖျက်ဆီးသွားနိုင်တယ်။ အဲ့ဒါကြောင့် ဒါက မင်းရဲ့ ကိုယ်တွင်းပိုင်းအခြေအနေကို ကောင်းကောင်းနားမလည်တဲ့ သူတွေအတွက် မဖြစ်နိုင်တဲ့ အလုပ်ပဲ” ဇူအန် ပြောလိုက်သည်။
သူ အမှန်ပြောနေခြင်းမဟုတ်ပါ။ ချူချူယန်၏ အခြေအနေနှင့် ရင်းနှီးကျွမ်းဝင်သည့်သူသည် အမှန်မှာ မိန်လိ ဖြစ်သည်။ အရင်တုန်းက ချူချူယန်ကိုယ်ထဲသို့ ဝင်ပူးခဲ့ဖူးသဖြင့် ချူချူယန်ကိုယ်တွင်းထဲရှိ အခြေအနေကို တစ်လက်မမှမကျန်အောင် သူမ သိခွင့်ရခဲ့သည်။
သို့သော် မိန်လိ၏တည်ရှိမှုကို မထုတ်ပြောရန် သူ ကတိပေးခဲ့သည်။ ထို့ကြောင့် သူ့ကိုယ်သူသာ ကိုယ်စားပြုပြောဆိုနိုင်တော့သည်။
ချူချူယန်သည် ယင်းစကားများကြောင့် အံ့အားသင့်သွားပြီး “နင်က ဘာလို့ငါ့ကိုယ်ခန္ဓာအခြေအနေနဲ့ ရင်းနှီးနေတာလဲ”
ဇူအန် ညင်သာစွာ ရယ်ပြီး ပြောလိုက်သည်။ “မင်း မေ့သွားပြီလား။ မြေအောက်နန်းဆောင်ထဲ ကိုယ် မင်းကို ကုပေးတုန်းက မင်းရဲ့ ကီသွေးကြောတွေကို ပြုပြင်ပေးဖို့ ကိုယ် အာရုံစိုက်ခဲ့တာလေ။ မင်းကိုယ်ခန္ဓာထဲက အခြေအနေနဲ့ မရင်းနှီးစရာအကြောင်း လုံးဝမရှိဘူး။ ဒီလောကမှာ ကိုယ့်ထက် မင်းရဲ့ ကိုယ်ခန္ဓာထဲက အခြေအနေကို ကောင်းကောင်းပိုသိတဲ့သူ တစ်ယောက်မှ မရှိဘူး”
ချူချူယန် မျက်နှာ ချက်ချင်းနီရဲသွားပြီး “တော်…တော်ပြီ။ ထပ်မပြောနဲ့တော့။ မြန်မြန် ငါ့ကို အပ်စိုက်ကုထုံးနဲ့ ကုပေးတော့”
ဇူအန် နူးနူးညံ့ညံ့ ပြုံးလိုက်ပြီး ချန်ရှို့ပင်းအား ကြိုပြင်ဆင်ခိုင်းထားခဲ့သည့် ဆေးများကို ထုတ်လိုက်သည်။ ဆေးပင်များကို အမှုန့်အဖြစ်သို့ ကြိတ်ချေလိုက်ပြီးမှ ဆေးအမယ်တစ်ခုတည်းအဖြစ်သို့ ရောနှောဖော်စပ်လိုက်သည်။
