Chapter 324: ပူလောင်သောဒွိဟ
ကျီရှောင်ချီက သူ၏ လက်ကိုဆွဲကာ ဝန်ထမ်းအိမ်ယာသို့ အပြေးသွားသည်။
ဇူအန် ဇဝေဇဝါဖြစ်နေသည်။ သူ့ကိုလာရှာသူမှာ ကျန်းတန် မဟုတ်ပါက ၎င်းနေရာသို့ သူ ဦးတည်သွားမည်မဟုတ်ပေ။
သို့သော် ကျီရှောင်ချီ တွင် ထိုအတွေးများ ရှိမနေသည်မှာ သေချာသည်။ သူမ၏ အမူအကျင့်နှင့် လုံးဝ ဆန့်ကျင်ဘက်ဖြစ်နေသောကြောင့်ဖြစ်သည်။
“ရှောင်ချီရေ ဘာတွေဖြစ်နေလို့လဲ။ ဘာဖြစ်လို့ မင်းရဲ့ လက်က အရမ်းပူနေရတာလဲ” အစက သူမ၏ လက်မှာ ညင်သာသိမ်မွေ့သည်ဟု ခံစားခဲ့ရသော်လည်း တစ်စုံတစ်ရာ မူမမှန်သည်ကို သတိပြုမိလိုက်သည်။ သူမ၏ ခန္ဓာကိုယ်အပူချိန်မှာလည်း အလွန်မြင့်တက်နေသည်။
“အခန်းကို အရင်သွားကြတာပေါ့” ကျီရှောင်ချီ ဆက်သွားနေသည်။
ရုတ်တရက် သူမ၏ ခန္ဓာကိုယ်တစ်ခုလုံး တုန်ယင်သွားသည်။ သူမ အတင်းရပ်လိုက်ရသည်။ သူမ၏ ခြေနှစ်ချောင်း မှာ ပူးကပ်နေကာ ဆက်ရွေ့လျားရန် စိတ်မရှိချင်တော့သည့်ပုံ ပေါ်နေသည်။
“မင်းကို သယ်သွားပေးမယ်” ဇူအန်က သူမ၏ ရှုပ်ထွေးနေသော မျက်နှာကို သတိပြုမိလိုက်သည်။ သူမက သန့်စင်ခန်း အသုံးပြုရန် လိုနေသည့်ပုံပေါ်နေသည်။ သူမက အလွန်အမင်း အနေအေးသူဖြစ်သောကြောင့် သူမ စကားဖြင့်ပြောရန် မသင့်လျော်သော အရာများစွာ ရှိနေသည်။
သူ၏ အနီးအနားပတ်ဝန်းကျင်တွင် လူရှိမရှိကို သေချာအောင်အရင်ကြည့်လိုက်သည်။ ထို့နောက် သူမကို ပွေ့ချီလိုက်သည်။
ကျီရှောင်ချီ မှာ ပေါ့ပါးသဖြင့် သူမကို အလွယ်တကူ သယ်လိုက်နိုင်သည်။ သူ၏ လက်ထဲတွင် သူမ အလွန်ပျော့ခွေနေသည်ကို ခံစားလိုက်ရသည်။
“ကျွန်မကို မထိနဲ့...” ကျီရှောင်ချီ အထိတ်တလန့် အော်လိုက်သည်။ ကံမကောင်းသည်မှာ ဇူအန်က သူမ၏ စကားအဆုံးမသတ်ခင်မှာပဲ ပွေ့ချီပြီးသွားပြီဖြစ်သည်။
“ဘာမှားနေလို့လဲ” ဤမိန်းကလေး၏ ခန္ဓာကိုယ်တစ်ခုလုံးမှာ ထူးဆန်းစွာ တုန်ယင်နေသည်ကို သူ ခံစားမိလိုက်သည်။ ဇူအန် အတော်လေး တွေဝေသွားသည်။
