Chapter 258: ပေါ်ပြီ
ကုယွဲ့ယီ ဆံပင်များထောင်မတ်သွားသည်ဟု ခံစားလိုက်ရသည်။ သူ၏ ရမ္မက်ပြည့်ဝသော ငေးမောမှုမှ နိုးလာပြီး အလျှင်အမြန် ရှင်းပြလိုက်သည်။
“ဂိုဏ်းတူ ညီမလေး စောစောက ငါ အားနည်းပြီး မူးဝေနေလို့ပါ။ မင်းကို အပြစ်လုပ်ဖို့ ဘယ်တုန်းကမှ မရည်ရွယ်ခဲ့ဘူး”
ရှို့ဟုန်လေ၏ အမူအရာမှာ အေးစက်နေသည်။ တောက်ပသော အဝါရောင်အလင်းရောင်ကို ပြန်ရုတ်သိမ်းလိုက်သည်။
“ဒါမျိူးထပ်ဖြစ်ခဲ့ရင် ဂိုဏ်းတူအချင်းချင်းတောင် မယဉ်ကျေးဘူးလို့ ကျွန်မကို အပြစ်မတင်နဲ့”
“ဟုတ်…ဟုတ်ပါပြီ။ ဒါက မတော်တဆတစ်ခုပဲ။ သေချာပေါက်ကို ဒုတိယအကြိမ်မရှိစေရဘူး” ချွေးစေးများဖြင့် အလျှင်အမြန် နောက်ဆုတ်လိုက်သည်။ သူတို့နှစ်ဦး ကြားတွင် လိုက်ကာ တစ်ခုရှိနေပြီဖြစ်သော်လည်း သူမကို စိတ်မဆိုးစေရန်အတွက် သူ၏ ဦးခေါင်းကို အတတ်နိုင်ဆုံး ငိုက်စိုက်ချထားလိုက်သည်။
ဤမိန်းကလေးကို အလွန်မြင့်မားစွာ မျှော်လင့်ထားခဲ့သော်လည်း သူမ ဤမျှအစွမ်းထက်လိမ့်မည်ကို မထင်မှတ်ထားခဲ့ပေ။
ပြီးတော့ ဒီမီးအိမ်ကရော ဘာလဲ။ အဲ့ဒါက ဆရာက သူ့ကို ပေးထားတဲ့ တစ်ခုခုလား။
ဆရာက တကယ်ကို ဘက်လိုက်တာပဲ။
သူမကို ယခင်က အသားယူရန် အကြိမ်များစွာ ကြိုးစားမိခဲ့သည်ကို ပြန်တွေးမိကာ ချွေးစေးများ ထွက်လာသည်။ သူ၏ မျက်နှာပေါ်မှ ချွေးများကို သုတ်လိုက်ရသည်။
သို့သော်လည်း တစ်စုံတစ်ခုမှာ မူမမှန်ပေ။ ပုံမှန်အချိန်တွင် သူမကို အပြစ်လုပ်မိသောအခါ သူမက ချိုသာသော အပြုံးတစ်ခုဖြင့်သာ တုန့်ပြန့်လေ့ရှိသည်။ သို့သော် ယခုအခါတွင် အဘယ့်ကြောင့် သူမ အလွန်ဒေါသထွက်နေရသနည်း။
“ပြီးတော့ နောက်ဆိုရင် နင် ထွက်ပြေးတော့မယ်ဆိုရင်လည်း ဒီအတိုင်းပဲ ထွက်ပြေး။ ကိုယ့်လူတွေကို လူသားဒိုင်းတွေအဖြစ် မဆက်ဆံနဲ့” ရှို့ဟုန်လေ အေးစက်စွာ နှာမှုတ်လိုက်သည်။ လှေပေါ်မှ သူ၏ အပြုအမူကို သူမ အလွန်အလိုမကျဖြစ်နေသည်။
ကုယွဲ့ယီ အလျှင်အမြန် ခေါင်းညိတ်လိုက်သည်။ “ကောင်း ကောင်းပါပြီ။ နောက်မလုပ်တော့ပါဘူး”
သူ၏ နှလုံးသားထဲတွင် သူမကို ကြိမ်ဆဲလိုက်သည်။ မင်းက ဒီလောက်တောင် အစွမ်းထက်နေရင် လှေပေါ်မှာကတည်းက ကိုယ့်ဟာကိုယ် ဘာလို့ မလှုပ်ရှားခဲ့တာလဲ။ အကယ်၍ ငါတို့ နှစ်ယောက် ပူးပေါင်းလုပ်ခဲ့မယ်ဆိုရင် ချန်ရွှမ်းလက်ကနေ အခုလိုမျိုး ရုပ်ပျက်ဆင်းပျက် ထွက်ပြေးလာရမှာမဟုတ်ဘူး။
သူ၏ အတွေးများကို အပေါ်ယံတွင် ပေါ်လာခွင့်မပြုပေ။
