Chapter 287: အနီးကပ်တိုက်ပွဲ (+)
ချူအိမ်တော်၏ သမားတော် ပေါင်းယွဲ့လု အလောတကြီး အပြေးအလွှားရောက်ရှိလာသည်။ တံခါးကို တွန်းဖွင့်ဝင်တော့မည့်အချိန်တွင် ချင်ဝမ်ယွီ က တားလိုက်သည်။
"သခင်မကြီး။ ဒါဘာသဘောလဲ။ သခင်မလေး အသည်းအသန် နေမကောင်းနေတာ မဟုတ်ဘူးလား" ပေါင်းယွဲ့လု ဇဝေဇဝါ ဖြင့် မေးလိုက်သည်။
ချင်ဝမ်ယွီ ၏ မျက်နှာရဲသွားသည်။ "အဲ..အထဲမှာ တစ်ယောက်ယောက်ရှိနေတယ်။ ဒါကြောင့် အခုချိန်ဝင်ဖို့ မသင့်လျော်ဘူး"
"အော် နတ်ဆေးဆရာ ကျီ ရောက်လာပြီလား" ပေါင်းယွဲ့လု က ချင်ဝမ်ယွီ ၏ ရုတ်တရက် နီရဲမှုကို မြင်ရသောအခါ မုတ်ဆိတ်သပ်လိုက်မိသည်။ မဒမ်က တကယ်ကို လှတာပဲ။ အကယ်၍ ငါ့အသက်သာ နှစ်နှစ်ဆယ်လောက် ငယ်နေရင် တကယ်ကို ရင်ခုန်မိမှာပဲ။
သခင်ချူက အတော်လေး ကံကောင်းတာ။ ဒါပေမယ့်လည်း နှမြောစရာပဲ...
အင်း ကံတရားက လူတွေကို တကယ်ပဲ ဆော့ကစားတတ်တယ်…။
"မဟုတ်ဘူး။ အဲ့ဒါ အခြားတစ်ယောက်" ချင်ဝမ်ယွီ ရှင်းပြလိုက်သည်။ " သမားတော်ပေါင်းကို ခဏစောင့်ဖို့ ဒုက္ခပေးရဦးမယ်"
"အို" ပေါင်းယွဲ့လုက အိမ်ဆီသို့ စိတ်ဝင်တစား လှမ်းကြည့်လိုက်သည်။ "လပြည့်မြို့မှာ ဆေးပညာကျွမ်းကျင်တဲ့ နောက်တစ်ယောက် ရောက်နေတာလား။ ဒါဆိုလည်း ဒီလူအိုကြီး ရဲ့ ဗဟုသုတတွေ ပွင့်လင်းစေရတာပေါ့"
ချင်ဝမ်ယွီ ကို့ရို့ကားယား တိတ်ဆိတ်သွားသည်။ နောက်ပိုင်း ကိစ္စများကို မည်သို့ရှင်းပြရမည်ကို သူမ မသိပေ။
ချူကျုန်းထန် လည်း စိတ်လှုပ်ရှားစွာ ရှေ့နောက် လျှောက်နေသည်။ အဆုံးတွင် သူ၏ စိတ်ကို မထိန်းထားနိုင်တော့ပေ။ သူ၏ ဇနီးကို ဘေးသို့ခေါ်ကာ မေးလိုက်သည်။ "မိန်းမ… အားဇူက တကယ်ပဲ စိတ်ချရလို့လား။ ဆေးဆရာ ပေါင်း ကို အရင်ကြည့်ခိုင်းလိုက်တာ မကောင်းဘူးလား။ ဒါမှမဟုတ် နတ်ဆေးဆရာကျီကို သွားခေါ်လိုက်ရမလား"
ဆေးဆရာ ပေါင်း ၏ မာနကို ထည့်စဉ်းစားကာ ဒုတိယနာမည်ကို ပြောရာတွင် သူ၏အသံကို အတတ်နိုင်ဆုံး နှိမ့်ပြောလိုက်သည်။
