Chapter 352: ညှိနှိုင်းမှု
လမ်းတစ်လျှောက်တွင် ဝေအိမ်တော်၏ အစောင့်များ စတင်လှုပ်ရှားနေသည်ကို မြင်လိုက်ရသည်။ သို့သော် သူတို့အားလုံးမှာ လုပ်ကြံသူဟု ယူဆရသော အရပ်မျက်နှာဘက်သို့ ဦးတည်သွားကြသည်။ ဤအခွင့်အရေးကို သုံးကာ အလင်းရောင်အားနည်းသော ခြံဝန်းထဲသို့ ဇူအန် ခိုးဝင်လိုက်သည်။
ခြံဝန်းထဲသို့ ဒုတိယအကြိမ် ဝင်ရောက်သွားသောအခါ ကျောချမ်းစရာ ခံစားချက်တစ်ခုက သူ့ကို လွှမ်းခြုံသွားသည်။ ဤနေရာရှိ အလင်းရောင်မှာ မှေးမှိန်နေသည်။ ဝေအိမ်တော် အတွင်းရှိ အခြားနေရာများနှင့် နှိုင်းစာလျှင် ဤနေရာမှာ ပိုမိုချောင်ကျနေသည်။
အထဲတွင် မည်သည့်အစေခံမှ မရှိနေပေ။ အစောင့်အကြပ်များ လည်းမရှိပေ။ လူတစ်ဦးတစ်ယောက်ပင် မြင်ကွင်းထဲတွင် မရှိပေ။
အဆောက်အအုံ၏ အသွင်အပြင်မှာလည်း တစ္ဆေခြောက်သောအိမ်ကြီးကဲ့သို့ ခံစားချက်ပေးနေသည်။ ၎င်းသည် လုံးဝ အသက်မဲ့နေဟန်ရှိသည်။
ဇူအန်က သူ၏ အတွေးများကို မပြန့်စေခဲ့ပေ။ အချိန်မှာ အရေးကြီးသည်ကို သိနေကာ သူရှာဖွေရန်လိုအပ်သည့် အရာကို အတတ်နိုင်ဆုံး မြန်မြန်ရှာရမည်ဖြစ်သည်။
ဖေးမြန့်မုန်ကို ကူညီကာ သူမ၏ ရွှေပြားကို ရှာမည်သာမက လောင်မိုင် စိတ်ဝင်စားနေသော သတ္တာ ကိုလည်း ရှာရဦးမည်ဖြစ်သည်။
လောင်မိုင်က ရှာဖွေမှုကို လက်လျော့လိုက်ရန် ပြောခဲ့သော်လည်း အထဲတွင် မည်သည့်အရာရှိနေသည်ကို ဇူအန် သိချင်နေဆဲ ဖြစ်သည်။
သေချာသည်မှာ ပုံမှန်ဆိုလျှင် စွန့်စားမှုကြီးယူမည်မဟုတ်ဘဲ သူ၏ သိချင်စိတ်ကို လွှတ်ပေးလိုက်မည်ဖြစ်သည်။ သို့သော်လည်း ရှားပါးသောအခွင့်အရေးတစ်ခု ရနေသောကြောင့် ထိုအရာကို မရှာဖွေနိုင်ပါက နှမြောစရာကောင်းပေတော့မည်။
ဤကလန်ကြီးများ၏ အဆောက်အဦး ဖွဲ့စည်းတည်ဆောက်ပုံမှာ အားလုံး ခပ်ဆင်ဆင်တူကြသည်။ ဇူအန်က ချူကလန် ရှိ အခန်းများဖွဲ့စည်းပုံ နှင့် အကျွမ်းတဝင်ရှိနေပြီးသားဖြစ်သည်။ ထို့ကြောင့် ဤနေရာတွင်လည်း စာကြည့်ခန်းကို အလွယ်တကူ ရှာလိုက်နိုက်သည်။
ဇူအန်က သာမန်ကာလျှံကာ တစ်ချက် လေ့လာလိုက်ပြီးနောက် ခပ်တည်တည်ဖြင့် စာအုပ်စင်များ အပေါ် အထူးအာရုံစိုက်လိုက်သည်။ သူ ကြည့်ဖူးခဲ့သော တီဗီဒရမ်မာများအရ ထိုနေရာများတွင် လျှို့ဝှက်စက်ခလုတ်များ အများဆုံး ထားရှိတတ်ကြသည်။
