فاتوا نهارين مخرجتش من الشمبرة بيسك صح كنت نوقف نطيح مش ندوخ بصح رجليا حاستهم مش هزيني قلت في قلبي باين من هذيك الليلة كي متكسرتش أصلا عندي الزهر كي يسقسوني نقولهم موالفة تقصرالي في دارنا من التعب برك . حتى اسمهان كذبت معايا قاتلهم ديما تصرالها بكري صدقوها وسكتوا . نهار الثالث كانوا لبنات قاعدين عندي تقوليلي كيفاش رجعوا معاك يهدرو أنا ومفهمتش ومعلاباليش بصح النهارين هادوا كامل غير قاعدين معايا في الشمبرة تدخل وحدة تخرج وحدة وفي وقت ورى العشا ديما يتلموا عندي كشغل يعسوا فيا ولا مفهمتش حتى نرقد باه يروحوا من عندي المهم النهار الثالث كانوا ساهرين عندي حتى منعرف كيفاش جبدوا سيرتوا بلي هاذوا نهارين كامل مكانوش مراهش في الخدمة وما يجيش يبات في الدار نطقت اختوا قالت باين راه رجع يروح عند هذيك لي كان يعرفها سمعتوا لسمانة لي فاتت يهدر معاها ويتفاهمواً باه يتلاقوا وماما تكسر في رأسها وتخمم عليه وهو زاهي مع النسا سقساتها اسمهان قاتلها شكون هاذي تعرفوها قاتلها اختوا وي شفتها مرة من بعيد برك وحدة مطلقة ساكنة وحدها بلا ما نقولك عليها . شافت معايا اسمهان وسكتت . نقولكم كرهتواً لالا حاجة اكثر من الكره لي حسيتها تفكرت هذيك الليلة كيفاش كان معايا كي الحيوان قريب نموت في يدو ومطلقنيش ودرك راه عايش حياتوا بالطول وبالعرض . قتلهم لبنات أنا عيت راني حابة نرقد . قالولي تصبحي بخير وخرجو . غير خرجوا دموعي هبطوا وانا نتخيل فيه مع مرا أخرى عايش هاني وانا هنا نتعذب . هذا غير كلام برك دار فيا هكدا كون يتزوج ونشوفو مع مرتوا كيفاش بقيت هكذا نطلع ونهبط حتى رقدت وحد ساعة ونص ونضت على الوجاع يقطع في كرشي تقعدت حسيت بروحي مشمخة . نخعلت هاد مش وقت ليغاقل بيسك عندها سمنتين من لي جاتني وقفت من بلاصتي بسيف دخلت للدوش غسلت روحي وبدلت ورجعت بدلت لغطا تاع السرير وتكسلت كنت نتلوى من الوجاع التخمام لي هلكني مع الوجاع وليت منيش عبد حتى طلع الفجر باه بدأ يخف عليا ورجعت رقدت . كي نضت لقيت مرت خالي قاعدة هي وأسمهان في الشمبرة. مسحت عينيا مفهمتش أنا وش هاد الحالة تاع النوم الثقيل لي عادت تحكمني يدخلو عندي ويشعلوا الضو ويتحاكاو ومنفيقش . شفت الساعة 12 تاع النهار وقفت رحت للدوش غسلت وبدلت لقيت روحي مزلت ننزف بصح مش كيما في ليل . كي خرجت قاتلي مرت خالي بزاف هاد الرقاد كامل ليوم تهبطي تتغداي معانا التحت هبطت بسيف في الدروج لقيتهم ديجا ملمومين على الطابلة ولبنات يسربيو . لقيت مسلم قاعد في بلاصتوا لي موالف بجنبي واصيل مقابلني تصدقوا وجّهوا منيش قادرة نشوف مين تشوفوا نتفكر وش دارلي ، رحت قعدت وسكتت كانوا مطيبين الحوت كليت شوي وحبست معنديش أصلا الخاطر للماكلة جيت نوقف قالي مروان حبسي جوليا جبتلك حاجة تحبيها راح للكوزينة ورجع في يدو سلة تاع لي فروي الكرز والفراز عطاهالي ليا حكمتها قالي علابالي بلي تحبيهم لقيتهم في طريقي شريتهملك. بيسك أصلا مش وقتهم . علابالكم الجاست هذا شحال كنت محتاجاتوا وشحال فرحت ساعات الإنسان يكون برك محتاج جاست صغير باه يفرح . تبسمت قتلوا مرسي قالي بلا مزية . كليت. منهم شوي وعاودت طلعت . في ليل كيف كيف نرقد نوض نلقا روحي ننزف بزاف والأوجاع يقتلني ثلاث ايام وانا هكدا . أنا هنا بدأ يحكمني الوسواس بيسك جامي صراتلي . وليت نقول بالاك راني كنت اونسانت وراني نطرح . واضحكوا عليا صدقت هذاك الوسواس وليت عايشة في رعب قتلني التخمام نضل ندعي في ربي . النهار الخامس في ليل صاي هاد الليل صح مقدرتش شفتوا الموت شفتها المشكلة في النهار نكون نورمال في ليل تبداني لوجايع المهم وصلت الثلاثة تاع الصباح صاي مقدرتش نحمل وقفت بسيف نكركر في روحي فتحت الباب قلت نخرج نقول لأسمهان ولا اي وحدة المهم نلقا دوا ولا حاجة تحبس عليا الوجع من بعد خفت قلت كون يفيقولي وبالاك لا راني اونسانت وراني نطرح صح بيسك محال هاد الدم كامل يكون تاع ليغاقل عادي . أنا صح كنت يعني كيما نقولو معلوماتي محدودة تاع كيفاش تكون لمرا اونسانت ولا وش هما الأعراض ولا كيفاش طرح . ماما مكانتش تحكيلنا هاد الصوالح وماكانش أصلا عندي الوقت باه نسيي نعرفهم أصلا . رجعت غلقت الباب وقعدت حطيت راسي بين رجليا محضنة كرشي . حتى سمعت الباب تفتح مقدرتش نطلع راسي حسيت بيه كيفاش طابس عندي قالي جوليا وشبيك . وحط يدو على الراسي طلعت راسي بسيف تصدقوا غير فرحت كي شفتوا هو بيسك صح كنت محتاجة صح لدوا قتلوا اصيل قالي اصيل ايه وشبيك حالتك هكدا . كنت بسيف نهدر قتلوا معلاباليش بصح راني ننزف وعندي وجاع في كرشي . قالي كيفاش تنزفي هادي من وين . هيّا درك انتم قولولي هذا سؤال مقدرتش نجاوبوا سكتت معرفتش كيفاش نشرحلوا .كي شافني سكتت هزني حطني في السرير جا راح يشوف يدو لقاها كامل دم . شاف معايا قالي من وقتاش وانتي هكدا . نطقت بسيف قتلوا خمس ايام . ما قال والوا راح للخزانة جبدلي فاست خفيفة كحلة لبسهالي فوق البيجامة . قالي راكي قادرة توقفي . بكيت لالا منيش قادرة قالي خلاص مراكيش قادرة نهزك والبكا علاه قتلوا انت سبابي . هزني قالي علاه أنا سبابك. قتلوا باين راني اونسانت وطرحت . كان يمشي حبس قالي كيفاش ؟ اونسانت ؟ وهو يشوف فيا حاير قتلوا نسيت وش درت فيا ولا راح تنكر اهدر زيد اكذب وقولي منيش أنا لي درت فيك هداك الشي قولي روحي شوفي في شكون تلصقاها ياك أنا بنت الحرام باين راح نتبلى عليك . قالي صاي اغلقي فمكّ ، دوك نديك للكلينيك وتبان . سكتت ومرة على مرة تخرج شهقة مني والله بزاف عليا كون مش خوف من ربي راني قتلت روحي وتنهيت وهنيت قاع الناس مني . حطني في الطونوبيل من لور بيسك كنت منيش قادرة نقعد نورمال بقيت مكمشة كي البيبي وهو ركب ديمارينا . شاف معايا في التروفيزار قالي تسما انتي خمس ايام وانتي هكدا ومتهدريش ، انتي قاع كون تموتي متهدريش سكات تاعك هو لي وصلنا لهاد الحالة . بقيت ساكتة بيسك بديت ننعس ولا ندوخ معلاباليش حتى وصلنا هبط فتح الباب جيهتي فتحت عينيا . قالي راكي فاطنة درتلوا براسي ايه . كنت نشهق بالبكا الحالة لي كنت فيها تخليني نبكي بسيف قدم هزني معنقني حسيت بيه باسني على شعري وعلى جبيني شحال من مرة . دخلنا لمزية كلينيك بريفي ونصهم يعرفوه بالخف حطوني في شمبرة وحدي قاتلوا الطبيبة وشبيها قالها عندها نزيف خمس ايام ياك درتلوا براسي ايه . دارت عندي قاتلي خمس ايام كامل هكدا بهاد الكمية ولا كيفاش قتلها لا لا في ليل برك راني شاكة بلي كنت اونسانت وطرحت . قاتلي معليش دوك نديرلك ايكو وليزاناليز كلشي يبان قاتلوا تفضل مسيو برة . هو. خرج وهيا ركبتلي سيروم و دارتلي الإيكو ونحاتلي الدم باه ندير التحاليل . خرجت شوي وحد الساعة شفتهم دخلوا للزوج عندي . قاتلي متخافيش امدام راهي غير العادة جاتك قاوية لأنو هرموناتك مخلطين ومن الستراس والإجهاد وتكون قاوية في ليل ممكن راكي ترقدي على التخمام بزاف ولا مقلقة وهذا شي يأثر عليك مكانش حاجة تخوف ، بصح قوليلي مراكي تشربي في حتى دوا . سبق هو نطق قبلي قالها علاه وش عندها قاتلوا لا والوا بصح الهرمونات تاعها كامل راهم مخلطين بزاف وهاد الشي ميصراش إلا ادا كانت تشرب في كاش دوا بكميات معتبرة . شاف معايا سكتت قالها دوا تاع لاكتأب يدير هكدا وسماهولهاً صح هاذ دوا عطتهولي ريان كنت نشرربوا قاتلوا لالا ميديرش هاد الشي .
