قدر مراهقة 2

الجزء 01

#قدر_مراهقة2
#ميرال_مجد
#بقلم_فريال
❌❌ممنوع النقل بدون إذني❌❌
الجزء 01
6 شهر بالتمام والكمال وانا بعيدة على بنتي. ذوك تقولو كيفاش متوحشتيهاش معندكش قلب كيفاش تخلي طفلة صغيرة وتروحي تكون محتاجاتك لازم ترضعيها تعطيها من حبك وحنانك وتربيها وتحني عليها وهي مزالها صغيرة بحاجة أمها اكثر من باباها وحتى وتتغشي من راجلك عادي بصح بنتك تبقى بنتك اي قطعة منك الكبدة تاعك لدرجة هذي قلبك حجرة ماتحسيش بيها، راجلك نهار غلط معاك كلو بسبابك وبسباب لسانك الطويل وش داك تقوليلو هذاك الكلام لوكان جا واحد خلاف في بلاصتو راهو يطلقك وميشوفش فيك بعد مايكسرك كل عظامك وتستاهلي. كل هاذ لكلام كنت نقولو لروحي وعايشة في صراع بين قلبي وعقلي ونفسيتي كانت محطمة منقدرش خلاص كرهتها وكرهتو و كرهت كلش يفكرني بيه وبهذاك نهار الي دمرلي حياتي منيش حابة نتفكرو وبعدت على كلش باش ننسى، راح نحاول نبدا حياتي من جديد نحقق احلامي الي ضاعو واول حاجة لازم ننساهم ومنخممش فيهم ونقصح قلبي من جيهتهم ، هذا نوع من المواساة باش نريح ضميري ديما نقول هكا لروحي ونحاول نقنع نفسي بلي الي درتو صحيح ومنيش غالطة وكي بعدت عليهم كان قرار صائب ولمصلحتي بصح الحقيقة غير انا كي بعدت عليهم مش بش نرتاح انا ونبدا من جديد بالعكس باش نخليهم يرتاحو ويعيشو في سعادة بلا بيا لانو انا وليت نآذيهم بزاف وحتى من نفسيتي تعبت ونخاف ندير كاس عفسة تخليني نندم من بعد لهذا البعد حاليا هو أفضل حل. في الفترة هذي انا بديت نتعالج عند طبيبة نفسية وتحسنت حالتي خير من بكري وعمرت وقتي لانو الفراغ الي كان عندي هو سباب قلقي والاكتئاب الي حكمني سجلت فلاصال تاع سبور باش ننقص شوي كعاد وليت بڨرة بعد ماولدت وزدت سجلت نقرا لغات وعڨبت الباك وعلبالي مش راح نديه بصح عادي جربت مافيها والو. تزوج خويا وائل ورنيم ودارلها عرس يهبل كيما كانت متمنية حضرو كامل لافامي تاعها وتاعنا وطبعا وين مايشدوني يديرولي درس ارجعي لدارك وراجلك وبنتك لمن خليتيهم وحرام عليك وكامل يضربو ويسامحو ويصبرو على جال ولادهم وواحد مايدوملك من غير راجلك ووليداتك وخلي وخلي. مجد عيا يجري ورايا باش نرجع وماخلى شكون يبعث بصح انا والو رافضة اني نرجعلو وكي شافني مسنطحة جبد روحو خلاص ماولاش يجي ليا قالهم خليوها في راحتها الوقت الي تحب ترجع تلقى الدار مفتوحة، عياو فيه باش يحكيلهم على السبب الي خلاه يضربني مبغاش يقولهم وديما يتجاهلهم واذا كثرو عليه يقولهم حاجة بين المتزوجين خاصة بينا منقدرش نحكيلكم كان قادر يحكي ويبرر موقفو وهكا واحد مايلومو واكيد ماما وبابا كانو رجعوني ليه بصح هو فضل يسكت ويخلي كلش في السر وهذا الشي الي خلاه يزيد يكبر فير عيني وفي قلبي ايه نحبو ونعشقو وكل ليلة نبات نبكي عليه وعلى بنتي الي خليتها بصح منقدرش نرجع حالتي متسمحليش ومن الاحسن نبقاو بعاد على بعض زندفن الحب الي في قلبي ونخليه بيني وبين نفسي.