قدر مراهقة 2

الجزء 64

#قدر_مراهقة2
#ميرال_مجد
#بقلم_فريال
الجزء 64
واخيراااا الحرية علبالكم عجبني سبيطار ومحبيتش نخرج منو درت رايي فيهم ماخليت حتى واحد لا فرملية لا طبيبة لا مرضى الي تقيسني يالوكان بغزرة نرد ضربتي نشريهالها ونبرد غدايدي فيهم غش خواتات بابا رديتو فيهم مؤقتا برك لانو مام هوما يديو حسابهم اضعاف مضاعفة. خرجت لداري لقيت خاوتي ونساهم وسلافاتي نسا سلافي عجوزتي كامل جاو يطلو عليا ستقبلوهم سلافاتي تعاونو ودارو لعشا لقيت الدار تشعل شعيل كلش نظيف مام بنتي طبوزتي كانت معاهم تهبل تهبل كي شافتني بدات تصفق وتتكركب هزيتها ونبوس نبوس تقول عام ماشفتها شهاتني خصوصا منين خدودها كبار يتاكلو كنت ديما نعضها من خدودها ويديها مبطبطين خارجة لعمتها مطبزة وقصيرة كلش فيها يردح وحدو (والله نحبها بصح نحب نتنمر ها لصقت فيا لحد الان وين مانتلاقاو نعيطلها المكعبرة المدحدحة وهي ماتزعفش تعرفني نتمسخر). فوتنا لعشية هذيك مع لقصرة وشياخة كي نتلمو ديما يفوت لوقت بالخف سقسيت اسيل على ريتال قالتلي تظل عند بابا لاصقة فيه مبغاتش تجي لعندنا تقولنا رايحين تبعدوني عليه ونبقى وحدي الكلبة هذيك عرفت كيفاه تعبيلها راسها مليح مسكينة تظل تبكي ليل مع نهار حتى داها بابا للبسيكولوغ وقالتلو بلي دخلت في صدمة وبالشوي ترتاح مام هذيك اي واقفة معاها الحق يقال ماخلاتهاش وجات تحكي معانا وتفهمنا ماقبلناش وحاوزناها طاحت من عينيا صاي _ تتخذ بيها بيه وبيهم كامل يبعدوني برك الي تهمني ريتال الي صغيرة متعرفش ومرضوها ولاد الكلبة الله يجيبهالهم دواهم عندي اصبرو برك، نطقت رنيم قالتلي وش راح ديري نعرفك واعرة ومتسكتيش على حقك خبريني وش راح ديري باش نعاونك انا تاني غزلوني قالتلها اسيل خلونا من المشاكل مكلاه تتعاركو معاهم يبعدو علينا برك وجوه لخلا مانحتاجوهمش في حياتنا خلاص _ ايه صح مانديرلهم والو اصلا مزالني مريضة قولت كلامي وغمزت لرنيم تاع من بعد ونحكيو هذي خوافة وطول عمرها تهرب من المشاكل تخاف تتقاس ومتقيسش ناس عكسي انا زلڨة بفلقة الي يغلط يسلك وبدوبل تاني. فاتت السهرة وكل واحد راح لدارو بقيت مع راجلي وبنتي رقدت وانا محضناتو ولجين فوق صدرو هذيك هي بلاصتها وانا غرت منها بصح مابينتش درت سبة بلي انا نخاف نقيسها ولا طيح ونحيتهالو وديتها لسريرها وطلعت فوقو ورقدت كبلتو تقول ڨرادة هو غمض عينيه ورقد ماقال والو مع اني وجعتو ومخليتوش يرقد هاني بصح ماقالو والو يخاف يزعفني وانا مريضة(ديما نتسيتت قدامو وندمع شوي ونفريها ومرات نعارك ونوضها كحلة معاه ونزعف من فوقها حتى ونكون غالطة نشنف ونرفد شنافري المهم منستعرفش بغلطتي، الراجل اكويه ولا داويه يحب الي تجرجرو وتشربلو المر مايحبش وحدة عاقلة يقولها موتي تموت هذيك من غدوا يبدلها وتربح الشعر امالا من نهار لول وريلو العين لحمرا مانقولكش سبي وعاركي لا بصح اذا حاول يفرض رايو عليك ويجبرك ديري حاجةانت مش حابتها ماتقبليش ديري موقف مرة زوج يتريڨل ويرجع يشاورك ويتناقش معاك حتى تلقاو حل).
#فريال