قدر مراهقة 2

الجزء 19

قدر_مراهقة2
#ميرال_مجد
#بقلم_فريال
الجزء 19
ماجيت ننطق كان هو خرج وخلاني وش يقصد بكل يوم تشديها ماتطلقيها شكون قالو؟ ياك انا مكنتش نرفدها قدامهم وديما نحاول نبين بلي نكرها باش ميشكوش فيا افففف منو افففف، شتي باباك هذا راح يهبلني بقالي نص عقل راح يديه انت وش راح تفهمي مزالك صغرونة ياكبودتي يابطبوطتي توحشتي ماما، انا نحكي معاها وهي تضحك ومحضنتني تقول خايفة لا نهرب مسكين صغيرة وتجرجرت وانا سبابها بصح بربي ان شاء الله كلش راح نعدلو ونبقى قريبة لبنوتي ومنخليهاش وحدها حتى باباها لبغل نرجعلو بصح نشفلو ريقو كثر ماراهو ناشف. في اخر الكولواغ تلقاي دوش وتوالات وتزيدي تمشي شوي تلقاي دروج يديو للفوق طلعت بالشوي وانا رافدة الطبوزة تاعي لجين خايفة لانطيحها لوكان جيت وحدي اني طرت فدروج هذوك بصح كعاد راهي معايا نخاف عليها تعود طيح تتعوق بعيد الشر عليها. لفوق مع تطلعي بعد يقابلوك 4شنابر قدام بعضاهم كل زوج في في جيهة وبيناتهم كولاواغ صغير وتزيدي تمشي شوي تلقاي صالون مهوش كبير زي الي لتحت وكاين تاني بالكون كبير مغطي فيه طابلة وكراسا وفي اخر دار (انا نقولها اخر دار لانو جاية في شوكة طول) شومبرة كبيرة تهبل وحتى بلاصتها جاية هايلة بعيدة على الحس والفوضى جاية فلخر ماتسمعي والو رحمة ربي. قعدت فصالون الصغير نستنى فيه يجي يجيبلي ناكل ونحكيو لوكتاه نبقاو هكا انا في جيهة وهو وبنتي في جيهة تانية بزاف علينا لازم نتلمو عاقبت روحي بزاف وجا لوقت الي لازم نصحح اخطائي وندير عقلي في راسي ونرجع مرا تاع دار ومسؤولية ونشد لساني منزيدش نرجع الهدرة لراجلي الا اذا قلقني لتم نرجعلو صرف بصح اذا مقاسنيش منقيسوش (متترباش فمها خاطيها). بقيت نلعب مع لجين حتى رقدت حطيتها في شومبرتها لقيتو دايرلها شومبرة وحدها تهبل والي خلا شعر راسي يوقف كي شفت سريرها لتم ربحت عليا مليح اسيدي الراجل رامي طفلة هنا وحدها ماقال تخاف ولا صغيرة وقاعد في شومبرة طول وعرض وحدو اكيييد فيها ان واخواتها لوكان مجاش يدير كاش حاجة مايرقد بنتو هنا وحدها اصلا الرجال كامل كيف بعض، ليلة ليلتو نوريلو الخيانة كيفاه دايرة نغفرلو كلش غير لخيانة لا منقدرش كلش كلش والغدر نقتلو عادي ولا نقولكم لموت حاجة ساهلة بالنسبة ليه لوكان تظهر الحكاية صح وهو يخون فيا ويجيبها لدار هذي نحرقها على راسو ونزيد نبيعلو اعضائو ونخليه عبرة لباقي رجال باش ميخموش يخونو نساهم مرة اخرى اطلاقا وحتى ولو خممو راح يتفكرو حكايتو وراح يخافو.
#فريال