قدر مراهقة 2

الجزء 13

#قدر_مراهقة2
#ميرال_مجد
#بقلم_فريال
الجزء 13
خليتها على راحتها تبكي وتندب ماقولتلها والو نشوف تراه وين تلحق بهاذ المسرحية، خبطت ندبت وزعما زعما دارت روحها تخنقت وتغاشات، كشما شفتو عبد بتغاشى وعينيه محلولين ويبقى يعدل في راسو ويبعد شعرو على عينيه باش يشوف مليح اي عمتي هكاك تتغاشى طول عمرها تحب الدراما وتعمل من المشكل الصغير حرب وبعدها تقعد تتفرج فنتائج اعمالها المبهرة. حنا هكاك وتجي زعما لالة هند فوندام تلاحت دزتني جيت طايحة فلرض جاتني على غفلة تالي منطيحش ايا وتسب فيا وتعاير زعما غايضتها يماها هذا الكل وبابا وماما ساكتين حرف ماقالوه دورت راسي جيهة وائل لقيتو يضحك من لتحت لتحت وغمزلي معناها نوضي ليها وانا وراك، انا من بكري محرشة وقلبي معمر من جيهتهم خصوصا كي زادت سبتني قدام ناس ذوك وقالتلي قحبة وراجلك شبع منك ورماك وباين كشما حكم عليك وشكون شافك وش درتي لهيت يمكن حكمك دخلتي رجال لدارك ويعيا ويطلقك ونديه غير انا مكرة فيك باش نربيك ونقصلك جنحيك تبركاي من الطيارة . نضت بيها مرمدتها تعرفو وش معناتو مرمدتها نجبدلها شعرها ونخبط فيها بالكفوف وبالبونيات وركل تاني رميتها فلرض وطلعت عليها نهز في راسها ونخبط فلرض انا كلش كلش وواحد يخرب فيا ويسبني فمابالك يطيحنا ناكلو بسنيا، نضرب فيها ونسب يالكلبة الرخيسة انا تقولي عليا قحبة نسيتي روحك وحكاياتك ياك كنتي دخلي رجال لداركم وشدوك مع واحد وكي هرب حصلتي ويماك باش تستر عليك داتك لطبيبة تخيطك وذوك حابة تتلاحي على راجلي ياالشارفة قلو عليك رجال مدام حابة تزوجي قولي ليماك تزوجك ولاد خواتاتها ولا ميقبلوش عارفين طينتك وفضايحك انطقي يارخيسة شبيك ساكتة ولا فضايحك بانو، جاو خواتاتها زعما يفكو ويجبدوني من شعري طيحوني فلرض ولةخرا ناضت كانو حابين يتعاونو فيا في 4 علبالهم ساهلة ويقدرو يغلبوني ونساو بلي راني في دارنا وبين حبابي ريح ميقيسنيش. مع ضربتني لكبيرة بكف وتشدها رنيم من شعرها من لور خطفتها خطيف طيحتها فلرض ومخلاتلهاش الفرصة وين تستوعب وبركت عليها ريشتها كي دجاجة تعض تخبش تضرب دارتهم كامل وحتى من اسيل وبنت خالتي تلاحو يضربو مرمدناهم. عمتي بكري كامل مهدرتش كانت ساكتة وكي شافتنا غلبنا بناتها ناضت تعيط وتقولهم فكوهم راح يقتلوهم حبسو لمشاكل عيب راكم كبار وخيات مجاياش تتعاركو هكا خويا ادريس فكهم متخليهمش يتضاربو عيب راهم كبار وفاميلية وحدة.
#فريال