قدر مراهقة 2

الجزء 25

قدر_مراهقة2
#ميرال_مجد
#بقلم_فريال
الجزء 25
كي خرجت منا روحت ديراكت لعند الامام سقسيتو وحكيتلو لحكاية كامل من لول للخر ماخبيت عليه والو وكيما قلتي انت زواجنا باطل ومكانش عليا نتوشيك ولا نقربلك يالوكان نشد يدك لانو انت غريبة عليا والشي الي درتو يعتبر زنى ومش بالضرورة تصرا علاقة كاملة بيناتنا باش نسموه زنى وانما بوسة ولا حضن ولا نشدلك يدك تعتبر زنى (لبنات الي يخرجو مع صحابهم تحت شعار يحبني وناويني حلالو ومن هذاك شكيل علبالكم بلي كي تحكي معاه برك حرام وكي يشدلك يدك يعتبر زنى فمابالك يبوسك وخلي وخلي، الي يحبك صح يجيك من لباب لواسع مايبقاش يجرجر فيك لطريق لحرام الي ماعندها حتى فايدة من غير انو دمرلك حياتك ونفسيتك وتبعدك على ربي وتولي ماتفرقيش بين لحلال ولحرام ويجيك كلش عادي وتنجارفي كثر وكثر وتخسري حياتك). ذوك وش هو لحل مقالكش _ قالي مكانش فينا الي ميغلطش بصح كان لازم تسقسي امام ولا واحد كبير _ وانت وش قولتلو _ وش حانقولو من غير الحقيقة اني كنت خايف تتفضح لحكاية ويتكشف كلش واني لاعلاقة بالامور الدينية مانعرف والو تقول ماقريت ماشفت الجاهل وخير مني _ اهيه وش قالك هو _ مكانش فينا الي ميغلطش وابواب التوبة دائما مفتوحة منقدرش نبدل وش صرا بصح نقدر نحاول نصحح غلطي _ ذوك وش ناوي دير _ نعاود نفتح عليك من جديد _ ايه ديرلي عرس تاني؟، خزر فيا وطلع حاجبو تاع انا وين وانت فواش تخممي من نيتك _شبيك تخزر فيا سقسيتك برك كعاد قولتلي نعاود نفتح عليك _ قولتلك نعاود نفتح عليك مش نعقد _ اااا معليش هيا نوض وصلني لدارنا يكونو تقلقو عليا وقلبو دنيا وهوما يحوسو _ واحد ماحوس عليك _ وياااا ماتقولهاش يعني واحد ماحس بغيابي لدرجة هذي مايحبونيش _ سكتينا يرحم باباك ماتبدايش بدراما تاعك ماحوسوش عليك كعاد علبالهم بلي راكي معايا _ علبالهم بلي راني معاك وماقالو والو والله مايحشمو ماننساهالهمش _ علاه مايحشموش وش فيها قدام ناس راكي مزلتي مرتي وواحد مايسالك كي تكوني معايا _ ايه صح عندك الحق المهم وكتاه تجي تفتح عليا _ علاه راكي زربانة مكيش قادرة تصبري عليا _ متديهاش في روحك بزاف سقسيتك برك باش نوحد روحي _ لواش توجدي روحك _ وش حابني نرجعلك هكاك عريانة لازم نشري شوي حوايج ونبدل اللوك وندير عشا للافامي الغيارين الحسادين باش يطرطقو _ وانا تاني نعاود ندير عشا ونخرجك بلاغوب بلونش ونديرلك كورتاج وهكا تفقصي عديانك وش رايك _ والله فكرة تهبل بصح منيش حابة نلبس لاغوب بلونش وش راح يقولو عليا خليني نخرج بحاجة بيضة وتكون سامبل بزايدلي وانت اضرب عليا البارود واذا بغيت زعما تيري على بنت عمتي هذيك الي لصقت فيك لمرة الي فاتت معنديش مشكل _ روحي جيبي لجين نوصلك لداركم ونحكي مع باباك خير مانبتلي فيك راكي بديتي تخلطي وانا راسي وجعني منيش قادر ندخل معاك في نقاش.
#فريال