قدر مراهقة 2

الجزء 86

#قدر_مراهقة2
#ميرال_مجد
#بقلم_فريال
الجزء 86
حسيتو من قبل بشعور لوحدة انكم متنتميوش لهذيك العايلة ولا لعالم انكم وحدكم ومكان حتى واحد جنبكم جربتو هذا الاحساس انا جربتو كس كنت في سبيطار وحدي لا ام لا اخت لا والو صح بابا وخاوتي قربولي بصح والو كان هذاك الشي بلا فايدة انا كنت محتاجة ماما وملقيتهاش محتاجة اختي وملقيتهاش محتاجة جدة وملقيتهاش لانهم امهات وراح يفهمو عليا ويحسو بيا وبواش راني نمر اما رجال بلا مشاعر مايحسو والو باردين ( هكا كنت حاطتهم بلي ميتأثروش بصح كنت غالطة الراجل ميبنيش ضعفو لناس ودمعتو غالية وعزيزة وقليل وين يهبطها على عكس المرا كل شوي تبكي في الفرح والقرح ينزلو دموعها). بكيت وعيطت ندبت سلخت درتهم كامل ونار الي في قلبي مابغات تطفى حللتهم بالواحد باش يخلوني ندخل نشوف بنتي مابغاوش وقالولي ممنوع رايحين ندفنوها لانو حالة كورونا ومنخليوكمش تشوفوها هنا هبلت تاع صح وهجمت على هذيك طبيبة كنت فشلانة وفي حالة وهكاك وتلحت عليها بنتي مهيش مريضة بكورونا وطبيبة هذيك حبت تحطها كورونا باش منشوفهاش ومنقيسهاش وشكون غيرها الكلبة الي قرات مع مجد زعما حابة تردهالي كي لصقتها في كورسي معرفتش مع شكون طاحت نتفتها نضرب ونبكي حابة نرد غشي كامل فيها لانها بغات تفرقني على بنتي وتحرمني من شوفتها ضربتها حتى فشلت وطحت فلرض شبه دايخة بابا يتعارك معاها ومع لمدير تاع سبيطار وبلكشايف باش خلاونا ندفنوها عادي واما مجد شادني بين يديه ويمسحلي فدموعي ولا نقولو دموعنا انا وياه لانو كان يبكي ومحضني وراسو حاطو على راسي لدرجة انو دموعنا تخلطو مع بعض ( راح تقولولي كيفاه شفيتي على هاذ تفاصيل بهاذ الدقة ومستحيل تكوني تفكرتيهم، شفيت على كلش ومنقدرش ننساه لانو كان يوم دماري من تم تبدل كلش فيا تخمامي اولوياتي عقليتي كلش فيا تبدل). كي طلع نهار وتنحى لحجر جات ختي ورنيم وخواتات مجد بالسيف خلاوهم يفوتو بسب الاوضاع لوقت هذاك حتى انو نصهم قعدو برا انا خرجوني زي لميت نشوف برك ولاصقة في مجد خايفة يروح ويخليني ويكرهني حتى هو نبقى وحدي لا ام لا بنت حتى الاب وداوه مني بقيت وحدي ومن غير مجد مابغيت حتى واحد يقربلي لانو هو حاسس بنفس الوجع الي حاسة بيه راح يفهمني لانو بنتنا ماتت قطعة مني ومنو راحت من هاذ الدنيا ومبقاتش تولي وندير وش ندير منقدرش نرجعها ( فراق لولاد واعر بزاف وخصوصا كي تشوفيه يكبر ويمشي قدامك ويدور ويضحك يبقاو ذكرياتو معلقة في مخك لاخر يوم في حياتك).
#فريال