قدر مراهقة 2

الجزء 61

#قدر_مراهقة2
#ميرال_مجد
#بقلم_فريال
الجزء 61
فقت لمرة هذي عادي ومخي في بلاصتو نشوف في خاوتي ومجد قاعدين مقابليني وبابا معاهم كي شافني فقت جا يقيسلي فلاطونسيو كي لقاها مريڨلة قالي الحمدلله على سلامتك واسمحيلي على وش درت _ نسمحلك على واش؟ السماح اطلبو من ماما مش مني انا ماعندو مادخلني في النص تتزوج ولا تقعد خواتاتك ينفعوك هوما ويماك ومن ليوم دارك ماندخلهاش وخلي مرتك تعمرهالك كيما راهي تقول ختك تجيبلك الذرية الصالحة حنا طالحين زريعة سلمى ياك_ خلاص اسكتي وش الهدرة هذي _ كيما سمعت طحت من قلبي، قولت كلامي ودرت عطيتو بظهري وغمضت عينيا هو قعد قعد من بعد خرج مدمر ومهبط راسو مام خاوتي ماشافوش فيه خلاص. كي خرج هو جاو ليا خاوتي حمدولي بالسلامة وحضنوني اسيل قالتلي اديتي نص عمري خلعتينا عليك منعتي على الشعرة تالي راكي تعوقتي ماتزيديش تقلقي روحك اخطيك منهم ومن زريعتهم شدي دارك وبنتك ولباقي بحر عليهم _ هكاك ندير من ليوم ورايح وهوما ربي يتولاهم متخافيش جاي نهارهم كيما ضحكو علينا رايحين نضحكو عليهم يعياو يرفدو ريوسهم قدام الناس وانا لتم نقعد غير نتفرج فيهم ماندير والو من غير اني ندعي عليهم (يعني مادارتلهم والو غير انها صبت ليسونس على النار وزدت شعلتها مليح). جبت 10ايام في سبيطار يعسو فيا خافو تعاود تطلعلي لاطونسيو وكشما يصرالي جاو لافامي تاعنا كامل طلو عليا ومام عماماتي ومهم زعما جاو يطلو وجهم صحيح دخلتهم وانا مشنفة ماحكيتش معاهم قعدو قعدو من بعد خرجو وهوما مكركرين كرامتهم وراهم اما ام هند جات تدخل حاوزوها خاوتي وانا لوكان قدرت نوقف راني تعريتلها قدام ناس ونوريلها كيفاه يستشفاو الناس في الناس. واخيرا خرجت من لقبر هذاك (نقصد السبيطار) والله مانحملو بلعسل ومايفوتش مع انو كلينيك بريفي زعما بصح الهججل الي فيه كثر من الي برا الفرمليات يزعبطو وحدهم ويخرجو في زوكهم ويشنفو تقول لكلينيك تاع باباهم وهو في الاصل تاع بابا انا ولوكان نبغي فيهم والله مايزيدو نهار ونبهدلهم قدام الي يسوا والي ميسواش وكاين خرين ناس ملاح يهبلو هايلين يعاملوك مليح مام الطبيبات فيهم وعليهم انا كامل ماديتهاش فيهم غير واحد لصقة ملي تشوف مجد وهي مجد ومجد ومجد اسمو تنطقو الف مرة كي توقف قدامو مبقاش وتتلاح وتغتاصبو قدامنا هذا كامل لانو قرا معاها وباينة كانت طايحة فيه وهو هارب منها خاف لا نزعف منو بصح انا بردت اعصابي ودرت روحي مش لاتية عادي ياك صديقة الطفولة وزميلتو برك مافيها والو اذا حكات معاه وحتى كي جا ليا وطلب سماح بالنيابة عليها وفهمني الوضع ماقولتلو والو كان يستنى فيا نوض نعيط ونسب ونعاير بصح انا لعبتها متفهمة الوضع وفوت لحكاية وفي الاصل انا موجدتلها بومبة نطرطقها عليها ونربيها باش كي تزيد تشوف اي راجل تهرب منو ماشي غير مجد.
#فريال