قدر مراهقة 2

الجزء 39

#قدر_مراهقة2
#ميرال_مجد
#بقلم_فريال
الجزء 39
طول بزاف لحقت 21 وهو مازال مادخل لجين رقدتها وبقيت نستنى عيطتلو لمرة لولى مرفدش وهذو مش من عوايدو كي عاودتلو المرة تانية سمعت صوت تليفونو يصوني قدام لباب بصح كيفاه وانا مسمعتش صوت طونوبيل مايكونش عبد خلاف وانا الي نتوهم، تفتح لباب وكيما توقعت كان صوت تليفونو وقف قدام باب الكوزينة وربعت يديا ونتخنرز فيه هو كي شافني جمد في بلاصتو متأكدة بلي مكانش متوقعها مني. جيت ماشية لعندو بصح فاجأني كي عيط عليا وقالي ارجعي للكوزينة متخرجيش منها قودي شوكاني يعني انا الكلبة الي من صباح نوجد في روحي ونجري ونندب باش نفرحو وهو يجازيني بالعياط الكلب والله ماتفوتلو بالساهل منيش انا الي نسكتلو على اهانتو مشيت قاصداتو نزرب ناوية ناكلو بسنيا كلش كلش ويعيط عليا تبالي حليتلو لعين بزاف حتى تفرعن عليا ولوكان نسكتلو يولي يرفد يدو ويغلق عليا في دار ويرجع من نوع رجال هذوك الي محرمين على نساهم كلش تحت شعار نغير عليك وهوما برا مخلطينها بكراع داب وحاكمين نساهم في دار غير ميشوفوهمش ولا يسمعو بخبارهم وتخلاطهم الخامجين الله يجيبهالهم. هو يتخنزر ويديرلي بيدو روحي روحي وانا والو تقول حمارة مانفهمش كي لحقت لعندو مع جيت ننطق ويجبدني من يدي ردني ورا لباب قالي ابقاي هنا حتى يروح وياويلك لوكان تتحركي نقتلك ليلة_ شكون هذا الي يروح ووينو _ بلعي مش ذوك وقت لهدرة. رد عليا لباب وانا متخبية من وراه شوي هكا ودخل خوه لكبير ويااااهذيك التبهديلة وانا نقول علاه مجد عيط عليا بسباب خوه لوكان شافني نتبهدل تاع صح نعيا نهز راسي قدام ناس لبستي تقول تاع شطاحات ومدايرة غوج حارقاتو وفوقها نمشي ونتعوج لمزية خباني هنا بيد مايروح بصح وش جابو الوقت هذا باينة صرات حاجة عليها جا لانو مش موالف يجينا. بقيت فترة وانا متخبية مور لباب قريب نندب رجليا وجعوني وهذاك مابغا يروح والبغل تاعي ميقدرش زعما يليكيديه ليلة برك باش ميروحش تعبي باطل، واخيرا جاء الفرج خرج خوه مروح ودعو مجد ورجعلي خبط لباب انا قولت تكسر ويقلعلي وش مخرج ر** وياك قولتلك ادخلي وعلاه تعانديني وكي شفتيني مخلي لباب محلول كنتي تدخلي لوكان شافك بالحالة هذي وش نديرلك انا _ ماصرا والو والغلطة تاعك علاه متعيطليش تقولي خويا راهو جاي معايا _ مكانش في بالي بلي نلقاك بالحالة هذي _ من ليوم تعود عليها راح نلبس غير هكا مش شريت لقش هذا باش نخبيه ومكلاه تعيط عليا وانت عارف بلي الغلطة تاعك متحاولش تمسح فيا الموس.
#فريال