قدر مراهقة 2

الجزء 88

#قدر_مراهقة2
#ميرال_مجد
#بقلم_فريال
الجزء 88
محسيت بوالو كلش صرا بزربة لحد الان منيش مستوعبة انو الشخص لقريب ليا راح ومش راح يرجع منقدرش نشوفو ولا نمسو ولا نسمع صوتو راح من دنيا هذي نهائيا، يعني لدرجة هذي انا نستاهل وش صرالي يقولو بلي الانسان كي يغلط يعاقبو ربي سبحانو وانا صح غلطت ومعتارفة بهاذ الشي بصح مكنتش في وعي لحظة غضب دمرتلي كلش خلاتني نخسر اعز انسان على قلبي وبعد موتو كلش تبدل وتغير للأسوء حياتي عايلتي مستقبلي كلش ضاع وتبدل، ومكفاش هاذ الشي زادت راحت بنتي الصغيرة الي معندهاش ذنب متعرف والو غير كيما جات لدنيتها داتها مني لموت علبالي غلطت وغلطتي كبيرة بزاف كي حاولت نقتلها وهي في كرشي ونكرتها وكرهتها بصح ندمت بعدها وحاولت نصحح غلطتي وللاسف مقدرتش نعوضها على وش فات ولا نشبع منها فقدان ماما وبنتي كان اكبر عقاب ليا وبيه تعلمت بزاف صوالح انو دنيا فانية وغير لمليح الي يموت ويبقاو العرة ولخامجين يسرحو ويمرحو ويفسدو فلرض. من نهار رجعت من لمقبرة وانا زي سكرانة غايبة عن الوعي ماني عارفة والو ولا مستوعبة وش صرا كنت فرحانة وبعدها مرضت بنتي ديتها لسبيطار ماتت تم دفنوها وحطوها تحت تراب كلش صرا ورا بعضاه وانا مزالني متخطيتش صدمة موت ماما زادتلي بنوتي، عايشة جسد بلا روح مجد هو يديرلي كلش يمشطلي شعري يدوشني يلبسني يوكلني يخرجني يحكي معايا يحاول ينطقني وانا والو اذا نطق الحيط راني ننطق انا مخلانيش خلاص طول ها الفترة وهو معايا همل خدمتو وروحو وكلش تاعو ورجعت انا من اولوياتو اصلا من ديما انا رقم واحد عندو بصح ذوك مفضلني على كلش وعتازل العالم وبقى جنبي خيرو عمري ننساه ومن هاذ ضربة زاد حبي ليه اضعاف مضاعفة لوكان يخيروني بين مجد والعالم نخيرو هو لانو عندي مجد بكفة والعالم بكفة ثانية لانو وقف معايا ومخلانيش ولو للحظة صغيرة كان مرافقني مهتم بأدق تفاصيلي، كاينة انسانة غلطت في حقها وظنيت فيها السوء بصح هي خرجت بنت اصل ووقفت معايا ومخلاتنيش كانت كل يوم تجي لعندي تبقى معايا لليل وتروح طيبلي تنقيلي دار تحكي معايا تحاول تخرجني من عزلتي بصح انا كنت نقابلهم بالرفض وهي مستسلمتش وبقات ورايا ومعايا كانت تقولي مهما قسيتي عليا وكرهتيني انا تاني كرهت روحي بصح كل واحد عندو ظروفو وانا وش وصلني لهنا هو طيشي ونيتي زايدة مكنتش ناوية نتزوج باباك ولا ندي بلاصة يماكم بصح ظروف انتوما ابقاو تكرهوني بصح انا نحبكم كيف قبل كيف ذوك نتوما ولاد الغالية مهما ندير مستحيل نقدر نردلها حقها يماكم وقفت معايا بزاف وخيرها عمري ننساه لوكان ندفع عمري كامل منقدرش نرد ربع منو.
#فريال