قدر مراهقة 2

الجزء 44

#قدر_مراهقة2
#ميرال_مجد
#بقلم_فريال
الجزء 44
كانت تحكي وتوصي فينا على بابا نبقاو معاهم مهما دار وقرر كأنو عارفة بعملتو وكانت توجد فينا للاعصار الي جاي ودمار الي راح يصيبنا هي مكانتش عارفة بلي سلافاتها الي كانو يجيو يطلو عليها ويلعبوها يحبوها هوما نفسهم الي راح يفرحو بواش راح يصرا ويستشفاو ويعفسو على صوالحها بدون شفقة لا رحمة مقولتلهمش اشفقو علينا حنا كبار نعرفو صلاحنا بصح ريتال صغيرة متعرفش والشي الي شافاتو خلاها تنضر بزاف ولوكان ماجريناش بيها راهي ضاعت. تعشينا ليلة هذيك لتم وبتنا كامل مع ماما انا من جيهة وختي اسراء من جيهة وريتال تاني من جيهة خلاف ولولاد فرشنالهم فلرض حضنا ماما ورقدنا مع بعض ليلة هذيك متتعوضش وتمنيتها متفضش بصح للاسف ليس ما كل ما يريده المرء يدركه تجري الرياح بما لا تشتهي السفن وسفينتنا هذه المرة ستغرق. غدوا صباح نوضنا كامل هاجر عاونت ماما ودوشتها حنا مخلاتناش قالتلنا عيب تشوفوني عريانة بصح هاجر خلاتها تحسب ختها مش صاحبتها، كي كملت ماما حاوزتنا قالتلنا كل وحدة تروح لدارها هملتو رجالكم بزاف هيا ارفدو ولادكم وقودو عليا _نزيدو ليلة برك _ مكانش هيا روحو تروحو راني لباس اهتمو برجالكم شوي _ خلاص رانا رايحين كشما يصرا عيطولنا _ روحي برك. لميت حوايجي انا واسيل وصلنا خليل كان قاعد في دار حطني انا وكمل وصل اسيل، انا كان عندي لمفتاح دخلت لدار فت ديراكت لدوش دوشت انا وبنتي مع بعض هي غير تضحك مسكينة فرحانة بالما كملت لبستلها قشها ولبست انا تاني شيحت شعري وهبطت وجدت لغدا بالخف عيطت لمجد قولتلو اذا تجي تتغدا قالي هيه اني جاي قريب نوصل كشما نجيبلك _ جيب لخبز معاك منيش قادرة نخبز _ هذا ماكان _ ايه. مطولش وجا تغدينا وهو لعشية مكانش خدام قعد معايا من زهري كان هو تالي راني هبلت، كنت متكية ومجد قدامي وحاطين لجين في وسطنا صونا تليفوني لحد هذا اليوم مزالني متفكرة كلش بالتفصيل وكل مايصوني تلفوني نتخلع، عيطتلي رنيم مع هزيت عليها وتطرطق بلبكا وتعيط انا مفهمتش عليها وش راهي تقول جابت دقايق وهي تندب محبيتش نتخلع ونقول كشما صرا لماما حبيت نتفائل شوي وهي زادت على مابيا بقات تبكي مابغات تسكت حتى عيطت عليها بلعيييي واحكي كيما لعباد خليني نفهم، انا كي عيطت مجد تخطف وناض انا كملت نحكي معاها قولتلها فهميني وش كان كلامها مزالو محفور في راسي لليوم قالتلي كلمات كانو كفيلة انها تطفي حياتي وتخليني نعيش في ظلمة بكل بساطة قالتلي يماك ماتت زوج كلمات دمرو كلش حطموني وحطمو كل العايلة وخلاوها تتشتت.
#فريال