قدر مراهقة 2

الجزء 77

#قدر_مراهقة2
#ميرال_مجد
#بقلم_فريال
الجزء 77
نوضي ياالكلبة وش يضحك فيك _ والو غير شفت ذوك راجل طلق مرتو برك _ بلعيه نسمع لهدرة خرجت منا ننحرك _ مانقول لحتى واحد نخاف ماترجعيش ولد عمي وتخليه مطلق هههههه _ ايه نخمم فيها ونشوف اذا نردو ولا لا _ تخممي تاني شوفي ولد عمي شباب ومدرهم وماخصو والو عندو دارو ولوطو تاعو ماعندك ماتقولي فيه _ ايه ماخصو والو راجلي لعزيز  حبيبي قلبي _ كعاد تحبيه علاه ديري في المشاكل _ المشاكل ملح الحياة ولازم نبدل شوي مش ديما ملاح هكا نكرهو من بعض مش كيفك انت نهار كامل لاصقة فيه وتبوسي وتحضني _ كي مانبوسش راجلي شكون نبوس الجنون _ غيارة _ ناناك الغيارة امشي قودي وريلي وين نرقد عيت وتعبت _ نجي نرقد معاك خوك باين مطول _ ايه هيا برك. جبت 3ايام عند رنيم مجد كل مايعيط نكوبي في وجهو منيش حابة نحكي معاه وهو تاني فهم روحو وبعثلي ميساج قالي (وقت ماترتاحي عيطيلي نجي نديك وعلبالي غلطت كي كرفستلك وجهك بصح كنت مقلق ومطوليش بزاف متنسايش بلي طلقتيني ولازم ترديني قبل ماتخلاص العدة هههههه) الحلوف يضحك عليا علبالي مستحيل ينسى لحكاية هذي وراح يديرني تحريشة (وصح الى يومنا هذا مانساهاش). لحق ليل جا خليل وبابا ومجد واسيل واسراء تلمو كامل في دار وائل ومن وجهم باين بلي مهمش ملاح وكاينة حاجة اصلا توقعتها لانو وائل طول الفترة الي كنت عندو كان يدخل روطار وميطولش ويخرج واليوم لخر ماجاش اصلا، بابا سلمت عليه عادي ماحضنتو ماوالو سلام جاف وبارد كأنو شخص غريب للاسف مقدرتش نرجع معاه زي قبل حاجة من داخلي تكسرت وصعيبة باش تتصلح. قعدنا كامل وبدا خليل قال لرنيم راجل دخل للحبس وراهو مظلوم _ وشششششنوووو دخل للحبس ومظلوم اوخذي على راجلي مسكين حڨروه عليها ليامات هذو ميروحش بكري لدار وديما هامل عرفتها راح تصرا معاه حاجة وخرج احساسي صح ادوني ليه ذوك نشوفو مسكين، قولتلها اصبري يفهمنا لحكاية كامل من بعد قلعي في نديب _ ايه احكي وش راك تستنى _ اسكتي باش نكمل _ هاه قول_ راجل ضرب واحد باللوطو الصباح وهو كان سكران وراجل دخل لسبيطار ومزال مابانت حالتو _ الله لاتربحو الكلب الهامل رجع يسكر الله يعطيه الذل وضربة لظهر وعشرين سنة حبس وكيلو ربي الخداع رجع يسكر وانا نقول الراجل وين يروح ويطول باه يدخل لدار واتاري هو راهو يسكر ويظل في الكباريات وكيلو ربي وان شاء الله مايخرج من لحبس انا نروح لدارنا. نطق بابا قالها يابنتي اصبري تبان حكايتو من بعد اتصرفي متتسرعيش من بعد تندمي _ لا ياعمي نقبل كلش غير موضوع الشراب منقبلوش بزاف والله راهو كبير ومتزوج وبولدو مجاياش يسكر ويسهر فليل مهوش مراهق _ علبالي وعندك الحق بصح خلي تبان حكايتو وانا بنفسي نوصلك لداركم، نطقت انا قولتلها اقعدي في دارك ماتخرجيش منها وكي يجي اتفاهمي معاه واذا قلقك حاوزيه واقعدي انت دارك انت وولدك وهو يروح لبرا ياك موالف بالزنق حلوف.
#فريال