قدر مراهقة 2

الجزء 94

#قدر_مراهقة2
#ميرال_مجد
#بقلم_فريال
الجزء 94
نهار رفدت ولدي وحطوهولي بين يديا نسيت كلش تعب لعذاب الوجع كامل راح تخيلو هوما يخيطو فيا وانا نبوس فيه ونحضن مبغيتش نطلقو حابة نشبع منو ونستغل كل ثانية تمر وانا معاه مبغيتش نكرر نفس الغلطة ونندم من بعد حابة نبقى معاه ديما نرضع ونلبس ونرقد ونبدل وندوش نديرلو كلش كلش مانخليه يحتاج والو. داو ولدي نظفوه ولبسولو قشو وانا تاني عاونوني لبيت وداوني لشومبرة وحدي لانو كلينيك ومع كورونا تحريكة مكانش، جاو دارنا ودار مجد وهو طبعا مفارقنيش لثاني مرة نولد ونسب فيه وهو متحمل هبالي وصابر عليا خايف يعاود يصرالي كيما لكرش لولى ويحكمني اكتئاب ونبعد عليه مهوش عارف بلي نحبو ومنقدرش نبعد عليه خلاص رجعلي ادمان هذاك زوجي حبيبي (هنا نقولكم بلي نحبو ونموت عليه بصح هو منقولوش نخاف كي يعرف بلي ضمني وطحت فيه يتفرعن وميبقاش يساعفني ويحمل هبالي). بعد موت بنتي هو تلهى بيا وخلى خدمتو ولحق لوين رايح يفيط ويخسر كلش بسباب اهمالو كان ناوي يبيع دارنا الي سكنا فيها بداية زواجنا ويزيد لوطو وكلش باش يسلك ديونو ويكمل خدمتو وكي عرفت قولتلو على يدي ذهبي الي اصلا مانلبسو مانديرو يبيعو ويرجع خدمتو علبالي ميكفيش بصح ياربي يشد بيهم روحو وكان رافض يطلب من باباه بالرغم من انو عندو وقادر يعطيه بصح مبغاش يخبرو لانو عزة نفسو وكرامتو متسمحلوش يطلب من باباه وهو بالسيف كون روحو وخدم ودار بروجي وحدو وبين ليلة ونهار رجع لزيرو ورايح يطلب منو مجاياش خلاص، وهكاك وعرف باباه الي كان مزال حاصل فالخارج وعاونو ومجد شرط عليه يردهم قالو نديهم عليك دين مش تعطيهملي منيش باغي حتى واحد يفضل عليا حاب نخدم كلش وحدي كيف مادرت من قبل، ذوك الحمدلله قدر يرجع شوي خدمتو كيف قبل ومزالو مضغوط يخدم برا ويزيد يجيب خدمتو لدار يكملها مكنتش نضغط عليه لاتية بكرشي الي عياتني. بعد مافوتت نفاسي كامل في داري وجاو ليا نسا خاوتي مرت بابا وختي خالتي تعاونو ورفدوني كثر خيرهم، فوت ربعين رفدت روحي وصحتي ايا قررنا نديرو العقيقة ونطهرو الطفل ضربة وحدة وهذاك الي كان درنا كلش عند عجوزتي دترها كبيرة وترفدهم كامل غير لافامي تاعنا المقربة لانو خفنا من لمرض ماخلطناش ومدرناش حاجة كبيرة حنا في حنا وطبعا مفاتتش عادي ها فيها سلفتي سماح وتفوت عادي من سابع المستحيلات الطفلة هبلت وكلبت كيفاه رجعك ومقيمك وانت خليتيه مجرجر ودارنا يعاملوك مليح وفي كورونا يجوك ديما وانا لا وخلي وخلي (وصح كانو يجيو ليا مينذاك بصح هي لا لانو ميتفاهموش معاها ومع راجلها).
#فريال