قدر مراهقة 2

الجزء 28

قدر_مراهقة2
#ميرال_مجد
#بقلم_فريال
الجزء 28
لحقت 18عيطلي مجد قالي هيا وجدي روحك باش نخرجو انا ماصدقت عيطلي روحت نجري لبست الحجاب تاعي وهزيت بنتي وجيت خارجة وحدي حتى عيطت عليا ماما ويييين ويين بيها هكا استناي على الاقل نودعوك شبيك زربانة هكا راجلك مش هارب عليك _ اييي نسيتكم خلاص ياك رايحين معايا مجد داير عشا في دارهم وعارضكم كامل _ ايه علبالي _ وعلاه تقوليلي امالا نودعكم هاكم رايحين معايا _ روحي روحي من بكري بصلتك محروقة ماشي جديدة عليا _ ياك رايحة لراجلي مافيهاش عيب وانت تاني كنتي كيفي واكثر مني مكلاه تلعبيها عليا عاقلة يا سلموش، بستها من خدها وجيت رايحة نحاتلي لجين من يدي _هاتي بنتي وين تديها _ خليها عندي ليامات هذو بيد مافوتو شهر البصل تاعكم علبالي رايحين تنشغلو وهي راح تفزد عليكم خليهالي والفت بيها _ مذابيا والله نهتم بوليدي لكبير وطفلة هاي عندك علبالي ماتضريهاش _ لاحشمة لاحيا اخخ من الجيل المكشوف ربي يرحم زمانا بكري الحشمة ولقدر راسنا مانهزوهش قدام لكبار وكي تتزوج الطفلة ماتقابلش والديها من الحشمة اما انت راني نشوف فيك قريب تتلاحي على راجلك قدامنا _ امالا قولتيلي تاع بكري يحشمو _ ايه يحشمو بزاف _ ولغنا هذا منين جا (كان في يدي تليفون حوست على لغنا تاع بكري وطلقتو خليتها تسمعو وجها حمار من لحشمة) هاهي لحشمة امالا باسني وبوستو و..، مع جيت نكمل نغني وتقفلي فمي قالتلي فضحتيني امشي قدامي انت راح تجلطيني لوكان تبقاي واقفة قدامي _ كي مجلطكش رشيد عمري نجلطك انا ربي يطول في عمرك _ امين امين امشي هيا. كيما كان لحال خرجت من دارنا بالزغاريت وتجت جناح بابا للمرة الثانية لبسولي برنوس باعثو راجلي العزيز علبالي بيه دار هكا باش صحابو مايشوفونيش وعندو الحق، خرجني بابا لقيت مجد لبرا مع صحابو وخاوتي مقلبين لحالة بالشطيح سلمني بابا ليه ووصاه عليا (الجمل المعتادة طبعا) والي فشلني كي قالو اذا كشما دارتلك عيطلي برك نجي نهربك منها، هنا تو مقدرش يشد روحو وطرطق بالضحك قالو نخاف تقتلني قبل ماتلحق. تخنزرت فيه وقولتلو اشفى عليها مليح وانت يا بابا باش توقف معايا لا وقفت معاه هو شكون بنتك انا ولا هو _انت بنتي وهو نسيبي وعلبالي بيه مايظلمكش _ تسمى تقول انا ظالمة _ لا ماقلنا والو اتهلاو في بعضاكم وفي بنتكم وديرو عقلكم قالو مجد ان شاء الله ياعمي نديرها في عينيا _معنديش شك في هاذ الشي لوكان ماجيتش نوثق فيك ياحصرا ملي طلقتها منك ومنخليهاش ترجعلك علبالي ناس كامل تغلط وانت لوكان ماوصلاتكش مستحيل ترفد يدك عليها نعرف بنتي لسانها خاطيها وانا راني نقولك هكا مش معناتو بلي نهين فيها ونخليك تحڨرها لا انا بنتي على جالها نحرق كلش ننضر انا ولا هي وتغلط معاها تلقاني في وجهك _ بربي ان شاء الله المرة هذي مايصراوش المشاكل _ هذا الي بغيتو انا منقولكمش ماتتعاركوش اصلا مكانش دار بلا مشاكل بصح حاولو تحلو مشاكلكم بيناتكم خير ليكم.
#فريال