وصول رنيم جا مع خروج الهام من بيتها بالصلاة على النبي و الزغاريت و هي غادة فاتجاه الصالون اللي فيه البرزة...
وقفات رنيم فالجنب كتتأملها و كتصلي على النبي فرحانة لها من قلبها، فرحانة بصاحبتها اللي كانت كتبان أميرة بديك التكشيطة البيضا اللي لابسة و الڤوال اللي حاجب وجهها.....
تبعاتهم حتا دخلو للصالون و غير جلسات الهام فالمكان المخصص لها هزات راسها فالحاضرات من عائلتها حتا طاحو عينيها على رنيم اللي كانت كتزغرت معاونة النسا، تحل فمها بابتسامة حماس و مدات ايديها فالفراغ طالبة صاحبتها تجي لعندها الشي اللي ماتردداتش هاد الاخيرة فأنها ديرو....
هزات رنيم جلايل قفطانها بكل رقة حتا بانت الصندالة دومي طالون اللي كانت لابسة و قربات من الهام بابتسامة عريضة مزينة ثغرها، عنقاتها كتسلم عليها و "تبارك الله" ففمها ماحبساتش قبل ما تهز عليها الڤوال حتا بان وجهها و نطقات باعجاب
-رنيم: تبارك الله ما شاء الله جيتي غزالة ا حبيبتي
-الهام: حتا نتي جيتي فنة، العقبى لك
-رنيم: ان شاء الله فحياتك (قلبات عينيها للصالون) حتا الشكل د الطبالي اللي درتو فالصالون جاو غزالين تقولي جالسين فقاعة، حمقني
-الهام: قلنا نديرو طبالي حسن من السدادر سيغتو الناس كثار و غنكونو مخلطين
-رنيم: فخبارك سي صالح سول على هاد القضية د التخلاط و قالت ليه ماما ماغيكونش، يعرفني غنجلس مع خوك اللي حاط عليا العين يعلقني من شفاري
مع جبدات سيرتو مع غمزاتها الهام باش تشوف موراها، الدورة اللي دارت غتلقاه داخل هو و ولاد عائلتو مع باه و عمامو، دخول الرجال خلا النسا الحاضرات يشدو بلايصهم و منهم حتا رنيم اللي جلسات حدا صاحبتها فانتظار يجي العريس و عائلتو.....
استغل سعيد الفرصة و تكلف بالموسيقى كل مرة مخدم اغنية داير بيها السبة كيوقف بيها على ختو طالب منها تعطيه رأيها و افكارها فشنو بغات سوا فالدخلة د العريس، فوقت العقد و مور ما يتكتب و حتا فوقت العشا، عينيه مرة على تيليفونو اللي بين ايدين الهام المنقوشين و مرة على رنيم اللي كانت حاسة بنظراتو مختارقينها بلاما تشوف فيه، تسناتو حتا تحرك مبعد عليهم و مالت لعند الهام مخاطباها بخفوت
-رنيم: دابا زعما عند بالو ماعايقينش بيه داير السبة؟
-الهام خبات فمها بايديها كتضحك: نتي غير شوفي و سكتي
-رنيم: وصلتي لماماك جوابي بعدا؟ مابغيتش نحشمها و نرفض فوجهها
-الهام: وا غير ارتاحي، جبدت لها لسانها لقيتها ماناوياش اصلا تهضر معاك ليوم يا ربي تتكافا غير مع الضياف بقا لها غير سعيد
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
