فدار الوافي..............
دخلات للدار لايحة صاكها فاول درجة بالزعاف قبل ما تطلق حلوقها كتنادي على حورية اللي كانت فالصالة حاطة ايديها على حنكها كتفرج بسهو حتا رجعات للواقع على صوت سارة اللي دخلات عليها
-حورية: تي مالكي على هاد الدخلة غير بشوية شي نهار غتسكتي ليا القلب
باستها فحنكها و جلسات حداها بهدوء
-سارة: الله ينجيك، باااينة كنتي ساهية تاني
تنهدات حورية مركزة عينيها فعينين بنتها
-حورية: ماكذبوش اللي قالو دار البنات خاوية، ها هي بدات تخوا شوية بشوية حتا غنبقى فيها بوحدي باش نحماق
-سارة: غير تهناي ماغتخوا كاع حيت انا جالسة لك على قلبك حتا وحدة فينا تسبق عند مولاها
-حورية: اييه اييه تيقت، اوا حتا يجي باك فالعشية و قولي ليه هاد الهضرة
ضيقات فيها سارة عينيها قافزة من بلاصتها
-سارة: ايش تقصدي يا حورية ايييييش تقصدي
-حورية: شي واحد جا وقف على باك فالمحل اليوم خطبك منو و بغا يجي للدار
توسعو عينيها جامعة الوقفة بقا ليها غير تحطهم قدامها
-سارة: اويلي شكون هاد ولد الحرام اللي باغي يخرج عليا؟؟ شكون هذا اللي غيقصد با نيشان واش ماعارفينوش كي داير
-حورية: كيفاش تاني هاد ماعارفينوش كيف داير، على مالو باك كيف داير
-سارة: لا واااالو غير كيزوج بزز
-حورية: ماتزيديش فيه ا سارة، زواج رنيم ماشي بزز و زيدون الحمد لله ها هي عايشة بيخير غير كنتي منوضة الروينة على والو
-سارة: حيت كلبة داكشي علاش، كون كنت بعقلي ماكنتش نتسوق ليها و حتا دابا نيت ماسوقيش فيها خليني غير فهاد ولد الحرام اللي غيخرج ليا على حياتي
-حورية: دابا واش من نيتك مازال ما بغا ربي يهديك على ختك؟ قبيلا هضرت معاها و سولات فيك بقا ليها غير البكا تبكيه
-سارة: حتا هي ماتسوقاتش ليا نهار كنت كنبكي و كنطلبها ماتزوجش و ماسمعاتش ليا و ماتسوقاتش ليا، علاش غيهديني ربي عليها؟ كل وحدة فينا تشوف حياتها و ربي كبير
-حورية: بغيت نعرف غير شنو دار لك داك السيد
جلسات حداها عاقدة حجبانها
-سارة: هاداك السيد والله ما صافي ا ماما، تعقلي فاش كانت غيثة الله يرحمها حاملة و كنا جلسنا معاهم؟ تخيلي المعاملة اللي كان تيعامل رنيم را احسن من المعاملة اللي تيعامل غيثة براسها اللي مرتو، كيضحك معاها و مهتم بيها نيشان مايخرج حتا يسولها واش محتاجة شي حاجة و يدخل اول وحدة يسول فيها هي و انا بحال الحمارة كنقول عادي را خت مرتو و عزيزة عندو حيت عاطياه وجه ماشي بحالي قالبة عليه و دايرة حدود بيني و بينو و لكن فاش جا يخطب دابا و التعامل اللي كيعاملها ماشي د واحد غيتزوج بخت مرتو على ود ولدو و غير حيت كيعرفها احسن ليه، تعقلي على الصداق اللي عطا لغيثة؟ واخذ ليها الذهب اللي ماتحسبش اصلا صداق و مكتوب ليها فالعقد عاطيها 2000 درهم عرفتي رنيم شحال عطاها؟ عطاها مليون فالصداق و عاد الدهاز بوحدو و كان باغي يدير ليها العرس، ياك عقلتي على العرس اللي ماكانش باغي يدير لغيثة؟
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
