كلمة صدمة كانت قليلة توصف شعور حورية اللي طاح عليها كلام بنتها كالصاعقة، حاولات تفهم المعنى و المغزى من شنو قالت و لكن تأثير الدهشة خلا عقلها يتبلوكا و ترمش فيها بعدم استوعاب
-حورية: مافهمتش ا غيثة شنو بغيتي تقولي! كيفاش مايحضروش؟
ديك القوة كاملة اللي كانت عند غيثة و هي كتصارع نفسها انهارت فمواجهة مها، نزلو دموعها بغزارة كتهز كلها بالشهيق و تلاحت فحضن مها اللي حرفيا ترونات
-غيثة: عييت ا ماما والله حتا عييت من هاد الضغط اللي عليا، كون غير مت و مانعيش هادشي اللي انا فيه، كنمشي حتا كنتفلءل و نقول قادرة نتبدل و نواجه الدنيا بزوينها و خايبها كيجي الوسواس كيضرب ليا كلشي فالزيرو كنولي مريضة كثر من الاول، جربت نكتب و نخوي قلبي و عقلي بلا فايدة كنرتاح ديك الساعة من بعد كنرجع كيف كنت، جربت نهضر مع رنيم و فعلا لقيت راحتي حيت كتجاوبني و كتقدر تبدل ليا افكاري و لكن فهاد الموضوع بالضبط ماقادراش نصارحها حيث غنخسرها (شهقات بمرارة) غنخسرها الا عرفاتني كنغير منها هي و سارة، غنخسرها الا ساقت ليا الخبار ماحاملاش فرحتهم ليا (هزات راسها فمها كتمسح دموعها بهستيرية) تخيلي ا ماما مابغيتهمش يفرحو ليا تمنيتهم يكونو محسادات و مايبغيوش ليا الخير غير باش مايحضروش ليا ما يكونوش حسن مني انا اللي المفروض عروسة، خايفة منهم، والله حتا خايفة ا ماما و ماحاملاااااااش راسي و لكن ماشي بايدي، ماشي بخاطري نتحكم فمشاعري (حضنات وجه مها اللي ما حسات براسها امتا بدات تبكي معاها) انا والله ما خايبة ا ماما، كنبغي خواتاتي و كنحماق عليهم و نتي عارفة هادشي، ماخبيثاش انا ا ماما يااك، عافاك قولي ليا لا و ريحيني
جراتها حورية لحضنها مزيرة عليها كتبكي هي وياها، كتبكي الاهمال اللي هملات بنتها حتا وصلات لهاد المرحلة من الضعف، كتبكي اللامبالاة اللي لقات بنتها منها حتا فقدات حتا ديك شوية د الثقة فالنفس اللي كانت عندها، من امتا ماجلساتش معاها تسمع لها و تسول فنفسيتها و هي اول وحدة عارفة المشكل اللي عند بنتها!
ماعرفوش شحال د الوقت و هما على حالتهم كيبكيو، فرغو جوفهم فالبكا بحال حورية بحال غيثة اللي عاد حسات بالعروق د عقلها ترخفو، بعدات من مها بلطف كتمسح فدموعها، البكا تحبس و لكن شهقات صغيرة كانو مازال تيفلتو لها بلا خاطرها
-غيثة ببحة: سمحي ليا ا ماما ماكانش...
- قاطعاتها حورية كتمسح فدموعها بدورها: مابيناتناش سمحي ليا، انا اللي هملتك ا بنتي، انا السبب حتا وصلتي لهاد المواصل
-غيثة براحة: عافاك نساي شنو قلت لك، كان خاصني غير نهضر باش نعرف بلي تفكيري مريض و خاصني نبدلو، اللي فالرزق غنشوفو، سوا كان مكتاب ليا ولا لوحدة من خواتاتي غنفرح
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
