فالصالون.....
الثنائيات اللي شكلو الواليدين و الجماعة اللي شدات حورية مع الحاجة خلاو غالي غير كيدور فعينيه لا هو قادر يتناقش مع عبد الكبير و صالح لا هو قادر يتجاوب معاهم فالموضوع اللي جابدين و هو ماعارفوش، كان ديجا لمح سارة دخلات لبيتها بوحدها، استغل الفرصة اللي حتا واحد ما راد معاه البال و ناض لعندها هي اللي كانت جالسة على طرف سريرها كتميساجا مع الهام اللي كتسولها كيف غادة الامور حتا دخل عليها و سد الباب موراه.........
سمحات فتيليفونها و وقفات مقابلة معاه هو اللي زاد قرب منها كيتنهد
-سارة: بيك شي حاجة ؟ من الصباح و انا حاسة بيك ماشي هو هاداك
شبك صبعانو بصبعانها و جرها معاه لطرف السرير جالسين
-غالي: نو بالعكس، انا بيخير غير العيا و صافي
-سارة: حتا مانكونش كنعرفك، بالك مشغول بشي حاجة انا متأكدة
-غالي بصراحة: دوزت كونكور د التعليم العالي و كنتسنا لي غيزيلطا يخرجو داكشي علاش مبرزط
توسعو عينيها كترمش فيه بصدمة
-سارة: شنو دوزتي؟؟ (تبسمات بفرحة) امتاااا؟ لا بلاتي هادي هي اللي قلتي غتخليها مفاجأة
-غالي: هي هادي، ماكنتش ناوي نقولها لك دابا حتا نعرف راسي من رجلي و لكن ماقدرتش نزيد نصبر
-سارة: شوف راك قدها، انا متأكدة غتنجح، امتا المفروض غيخرجو لي غيزيلطا؟
-غالي: فهاد الايام نيت
-سارة: ناااري والله حتا فرحت عل اقل ربي غيعوضك على الخدمة اللي خليتي فقطر بسبابي، غتولي استاذ جامعي هنا فالمغرب كيف كنتي ديما كتحلم
ضربها بخفة لنيفها مذرعها
-غالي: اولا حتا حاجة ما ضاعت بسبابك غنقولها و غنعاودها و دخليها لراسك، اي حاجة درتها درتها بخاطري و حيت انا باغي علاش كتحملي راسك المسؤولية د شي حوايج ماعندكش علاقة بيهم؟؟
-سارة: وا نكذب الا قلت لك ماكنحسش بتأنيب الضمير من جهتك والله، لدابا ماعمري درت لك شي حاجة زوينة تخليني فرحانة و كنقول راني مفرحاه معايا، ناااري ا الصگع من نهار عرفتيني ماشفتي الرباح
دفعها بخفة هاز سبابتو فوجهها
-غالي: غنتخاصمو ا سارة على هاد الهضرة د والو
-سارة: صافي هاني سكت
رجع ذرعها كيمرر ايديه على ذراعها
-غالي: غير زواجي بيك را فرحة عمرها تنسى، عرفتي شحال من مرة كنقول لك نساي شنو داز؟ شحال من مرة كنعاود نقول اي حاجة درتها درتها بخاطري و حيت باغي و نتي ماعندك حتا علاقة!! ماعرفتش كيفاش غنقنعك تغيري هاد التفكير اللي غيحمقك على والو
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
