عند الياس.............
فكافي شبابي رجالي بامتياز و نقي، كان جالس كيشرب فقهوتو بهدوء مستمتع بالملامح المدهوشة د سعد اللي كان قدامو كيحاول يفهم و يستوعب اش سمع
-سعد: دابا نتا و عمي عبد الكبير تصالحتو؟ دابا متأكد عرضتي عليه للغذا، نتا عرضتي عليه؟
-الياس: بشحال من لغة خاصني نقولها لك باش تيقني؟
-سعد: ماتيقتش، والله ما تيقت را غير سيرتو كانت كتعصبك و كتخليك واحد اخر، فاش كنتفكر حالتك كيف كانت بسبابو كنقول مايمكنش تكون نسيتي بسهولة
-الياس: مانسيتش و لكن سامحت، ماشي حيت عاوني و لكن حيت كيبقى الواليد، مانقدرش نقمعو و مانقدرش نتجاهلو فالوقت اللي هو اعتاذر و اعترف بغلطو (سها فالفراغ) خاصك تشوف حالتو كيف كانت نهار تلاقينا من بعد ما جلسنا الراس فالراس و عرف القضية كيف كانت و شنو داز فيها و انا بوحدي، فاش كتشوف راجل كبير قدو منهزم و منكسر و الدموع فعينيه و هو كيعنق فيك و يطلب السماحة غتقدر تتجاهلو؟
-سعد: على حسب ماكنعرف عليك غتجاهلو و غتقول ليه فات الفوت
-الياس: بلاتي نصحح لك، على حسب ما كنتي كتعرف عليا، العقلية ديال دابا ماشي هي العقلية ديال شحال هادي، وليت واخد الدنيا ببساطة و باغي نروض قلبي يصفى و يتسامح، الا بقيت حاقد غنجيبها غير فصحتي و غنبقا ديما كنعاني، نسامح باش نتسامح
رجع سعد بظهرو شاد فراسو كيحرك فيه يمين و شمال
-سعد: وا اقسم بالله حتا تصدمت-الياس: وا ماتزيدش فيه حتا نتا شحال فيك، عادي را با واقيلا شنو بغيتيني نلوحو؟
-سعد: ماقلت والو، باك على راسك و عينك و على راسي و عيني حتا انا و لكن هاد التفكير اللي ولا عندك هو اللي فشلني
-الياس: تفكير منطقي عقلاني د واحد ثلاثيني بقاو ليه شي اعوام و يوصل للربعين
-سعد: الله يكمل بالخير ا سيدي (ربع ايديه فوق الطبلة) خلينا من هادشي دابا، شنو لقا المحامي فالضوصي و شنو درتي؟
-الياس براحة: دفعنا للنقض فالحكم، اول حاجة بعدا لقا الفلوس دايرة ديال بصح لدرجة شي حوايج المفروض كان خاصهم يدارو و دارو عليهم عين ميكة تاني حاجة هي داك الحضور اللي ماكنت كنحضر لا انا لا المحامي و المحكمة كتكمل الجلسات عادي بلاما تأجل، كيقول المحامي الملف غيتعاود من جديد و ماعرفتش بصراحة فداكشي ديالهم اللي عارف هو حتا الواليد غيدور الفلوس و غتدار ديك الخبرة، ماباغي والو و ماسوقي فوالو من غير ديك الخبرة اللي خاصها دار حيت الا طلع كلام الحاجة صحيح ماغنحتاجش نبقى غادي جاي، براءتي غتخرج فيساع و غنتفك
أنت تقرأ
غفران- قصة عشق تستحق الصفح (مكتملة)
Romantizmهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...