فالمساء...........
كانت جالسة جنب امير اللي كان كيتفرج حاضنة الخاتم بين ايديها و ساهية فالفراغ بتفكير مشتت و بقلب عاد رجعات تحس بنبضاتو، ما حسات لا بأمير اللي ناض من حداها كينقز لا بمها اللي دخلات عليها و جلسات حداها، طلات عليها حورية براسها عرفاتها ساهية و خلاتها على خاطرها و لكن غير تحركات جنبها باغا تجبد التيليكومونض قفزات رنيم فبلاصتها عاد خرجات من القوقعة اللي كانت فيها
-رنيم: ماما امتا جيتي! فين امير؟
-حورية: فالمراح كيلعب (ردات البال للخاتم) كنتي ساهية! نتي بيخير؟
تنهدات رنيم قبل ما تخشي السنسلة تحت التيشورت اللي كانت لابسة ماغافلاش على نظرات مها
-رنيم: الحمد لله احسن من قبل
كان فخاطر حورية تسولها على الخاتم و شنو فكرها فيه، مايمكنش يخفى عليها و هي عارفة امتا و شكون عطاه لبنتها و لكن الزعامة باش ترجع معاها العلاقة كيف كانت لدرجة تعاود لها كلشي ماكانتش عندها، تجاهلات فضولها من جهة الخاتم و لكن ماقدراتش دير نفس الشي من جهة صوتها كيف رجع......
مدات ايديها لشعرها كتزول لها الخصلات القصيرة اللي كانو طايحين على جبهتها مخاطباها بحنية
-حورية: كاعما عاودتي ليا كيفاش رجع لك صوتك، واش دار معاك خليل شي حصة مختلفة على اللي قبل و بسبابو رجعتي تهضري؟
ربعات ايديها و هربات عينيها للتلفازة
-رنيم: لا، كنت مع الهام ما حسيت حتا دويت
تعلاو حجبان حورية حاسة بشي حلقة ناقصة فكلامها و لكن ماحكراتش اما رنيم عضات على شفايفها و توسعو عينيها ملي تفكرات الموعد اللي عندها مع خليل، جمعات الوقفة و خاطبات مها بتلعثمها المستمر
-رنيم: ها هو امير معاك ا ماما هاني دابا نرجع
خلاتها موراها و طلعات لبيتها كتنقز الدروج مباشرة لتيليفونها و حتا بغات تدوز لابيل تسمرات بتردد خايفة كل وحدة منهم تكون مع راجلها و مايصلاحش لها تجاوبها، دارتها فايد الله و اتصلت بسارة هي اللولة و لكن ماجاوباتهاش فالاخير اتصلت بالهام و من بعد عدة رنات جاها صوتها
-الهام: رنيم
قاطعاتها رنيم بسرعة
-رنيم: الهام انا واحلة عتقيني
-الهام بخوف: ياك لاباس مالكي؟؟؟ فين راكي نجي عندك
-رنيم: لا لا ماشي هاكاك، قلت لك خليل طلب مني نجلس معاه فشي كافي و انا وافقت ياك
تنهدات الهام بصوت مسموع
-الهام: والله حتا خلعتيني حرام عليك
-رنيم: وا ماتخافيش كلشي بيخير والله
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
