من بعد الوقفة د الجمعة................
خرج صالح من الجامع كيقاد فالگاندورة اللي كان لابس غافل على الاعين اللي متربصين بيه بحالو بحال الامام د الجامع اللي خرج كينادي عليه، وقف صالح بملامح مستغربة و تبسم بخفة متبع الامام بعينيه حتا تقابل معاه مبادلو الابتسامة
-صالح: جمعة مباركة ا سي لحسن
-الامام: علينا و عليك ا سي الوافي، سبحان الله كنت مولفك ديما كتقصدني فكل جمعة اليوم اللي بغيتك ماجيتيش
-صالح: كنت غنجي عندك و لكن بنتي ليا مشغول مع واحد الشاب و وقفتكم طولات قلت مرة اخرى (استأنف كلامو باستفهام) فاش بغيتيني؟
-الامام: مسالي هاد العشية ان شاء الله ؟ بغيت نجي انا و واحد ولد الناس نهضرو معاك فواحد الموضوع د الخير
-صالح بترقب: اشمن موضوع ا سي الامام؟
-الامام: الهضرة ماشي د الواقف، فيك اللي يفتح لينا بابك و تسمع لينا؟
-صالح: مرحبا، اليوم العشا عندي ا سيدي
-الامام: خليه غير كاسكروط
-صالح باصرار: ماتعاود غير الصلاة على النبي ا سي لحسن، العشا عندي ان شاء الله
-الامام: الله يسخر..........
ماكانش صعيب على صالح انو يفهم بلي غيجيو يهضرو على الزواج، شكون بقات فبناتو من غير سارة؟ و لكن شكون هذا اللي بغا يتناسب معاه اصلا و علاش ماجاش لعندو نيشان؟
سؤال سولو لحورية و هما كيتغذاو واخا عارف بلي ماعندها جواب
-حورية: يمكن مازعمش عليك و يمكن الامام كيجيه شي حاجة عليها كلفو هو يهضر معاك، ماعرفتي شنو كاين
-صالح: مهم خير، بالليل نعرفو شنو كاين
-حورية: دابا نتا متأكد جايب عريس؟
-صالح: كنقول لك قال ليا غنجي انا و واحد ولد الناس باغيين يهضرو فموضوع خير، اش غيكون هاد الموضوع من غير الزواج؟
-حورية: بصح، باينة! و الا مابغاتش سارة؟
-صالح: الا كان ولد الناس نيت علاش ماغتبغيش؟ شحال عندها دابا؟
-حورية: ما بقا والو تكمل 23 عام
-صالح: اوا تبارك الله را هذا هو الوقت اش غتبقى دير؟
-حورية: ماغتبززش عليها ا صالح، بغات بالخاطر مرحبا مابغاتش حتا يجي رزقها و اللي فمكتابها
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
