فجهة اخرى......
نزل من بيتو على صوت خوتو العالي مع باهم و جداهم مرة يضحكو مرة يقلبوها جدية حتا دخل عليهم بنفس الوجه اللي ولفو انهم يشوفو، وجه تقاسيمو مكمشة بديك العقدة د الحجبان و النظرات الحادة اللي مابقاوش كيفارقوه، باس لباه ايديه كيف باس لجداه راسها و سلم على خوتو سلام شبابي عاد جلس مقابل مع عبد الكبير اللي كان نيت كيتسناه و لكن قبل ما يهضر ناضت سهيلة وقفات موجهة ليهم كلامها
-سهيلة: انا غنمشي نكمل قرايتي حتا تبغيو تحطو العشا و عيطي ليا ا الميمة نعاونك واخا
-الحاجة: واخا ا حبيبتي الله يرضي عليك
-اشرف: الياس شي طرح ديال الپلاي؟
-الياس: غير سبقني شوية و نتبعك....
تسناهم عبد الكبير حتا خرجو عاد ارتاح فجلستو مخاطب ولدو
-عبد الكبير: ياك لاباس ا الياس؟ لابيل ديالك خلعاتني
شاف فجداه اللي كانت متبعاه بغرابة عاد رجع قلب عينيه لباه
-الياس: بغيتك تمشي تخطب ليا!
توسعو عينين الحاجة كيف تعلاو حجبان عبد الكبير مدهوشين من شنو سمعو
-الحاجة: ياك لاباس ا الياس ياكما شي مصيبة تاني!
ضحكاتو و لكن ماضحكش، حك راسو بابتسامة باردة و عينيه على باه
-الياس: انا غنقول لكم الوضعية كيف دايرة باش تفهموني و تعرفو شنو واقع حيت العروسة غالبا غالبا غترفض
-الحاجة: شكون هادي اللي غترفض و علاش اصلا تخطبها الا عرفتيها غترفض؟ شحال و حنا نزاوگو تعاود تشوف حياتك و دير ولادك ماحدك صغير نهار نويتي طحتي فاللي غترفض، ها الهبال ا الياس
-الياس بهدوء: غنخطب رنيم ا الحاجة
تصدمات كترمش فيه بعدم استيعاب لحظي غير فهمات اش سمعات قفزات من بلاصتها جلسات حداه
-الحاجة: واش كتهضر بصح! كيفاش ياك مزو
قاطعها بنفس الهدوء
-الياس: حاليا ديال راسها و لكن مقلقة شوية
-الحاجة: على ربي غير تكون نيت مقلقة شوية اللي داز ماشي ساهل
تنهد مذرعها
-الياس: واش انا كنحاول نخفف على راسي و متأمل خير و نتي كتزيدي عليا ا الميمة ؟
-الحاجة: والله من قلبي كنطلب الله يفرح قلبك غير نشوف ضحكتك، را كنت حااااسة بلي هي اللي غتقدر ترجعك كيف كنتي
-الياس: انا بيخير هاكا
كان جالس مربع ايديه كيشوف فيهم بحال الاطرش فالزفة مافاهم والو، حنحن بصوت مرتفع خلاهم يتلفتو ليه
-عبد الكبير: واش غيشرح ليا شي واحد ولا بلاش؟
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
