غفران- قصة عشق تستحق الصفح (مكتملة)

غــــــــفـــــــران -أشعة الأمل- 05

فالعشية.....

جالسات البنات فالصالة دايرات على الطبلة د كاسكروط ناشطات مع سميرة و ثريا اللي جاو لعندهم، صوت ضحكهم كيتهز حتا للطبقة الثالثة مزلز اركان الدار خصوصا رنيم اللي عندها واحد الضحكة ماكتقدرش تتحكم فيها كتخلي كلشي يرد لها البال......
وقفات كتنش على وجهها من الضحك و رفعات سبابتها فوجه ثريا موجهة لها كلامها بتهديد
-رنيم: ماتقولي حتا حاجة ا خالتي ثريا عافاك غير حتا نحل الباب عافاك

غلباتها الضحكة كيف غلباتهم حتا هما، قفزات طايرة حلات الباب على الهام و رجعات دخلات هي وياها، طنيز ثريا و الوراق اللي مقطعة خلاو الجماعة تحلى عتا عياو و تهدو عاد تفرقو على شكل ثنائيات مجمعين بيناتهم و مدوزين الوقت بكيسان اتاي و من بين دوك الثنائيات كانت رنيم و الهام اللي جبدات من صاكها الجوا د لي غيزيلطا مداتو لصاحبتها
-الهام: امانتك ها هي

-رنيم: تمشي معايا غذا عند الطبيبة؟ الصباح خذيت غونديڤو

-الهام: اوك نمشيو

-رنيم: سعداتك كتقولي ليا واخا فعيواض بلاتي نتشاور مع بّا

-الهام ضحكات: كنستغل الفرص ا ختي، نهار غنسني على داك لاكط ديك الساعة تشوفي اجوبتي كيف غتولي

-رنيم: وايلي! كيجيني سعد ماشي معقد

-الهام: ماشي معقد و لكن مغيار، دابا غير مخطوبين و كيقهرني بفين غادة فين جاية عاد خرجتي، كنقول ليه راني مازال محسوبة على بّا

-رنيم: و باش كيجاوبك هو؟

-الهام: كيجاوبني ب دابا نحدهم لمك

-رنيم ضحكات: وا بالرجولة سعداااااتك، شكون بحالك عندك اللي يحدهم لك

-الهام: حتا نتي الا بغيتي كاين اللي يحدهم لك

غوبشات فوجهها و جاوباتها ضاغطة على سنانها
-رنيم: ياك سدينا ديك الصفحة

علات الهام حاجبها و قلبات وجهها لحورية اللي كانت مجمعة مع ختها و جارتها قبل ما تسمع صوت الهام خلاها تنتبه لها
-الهام: خالتي حورية اليوم جيت و ماجاياش بايدي خاويين

-حورية: مرحبا باللي جا و جاب

-سميرة: اش جبتي ليها ا ختي خلينا نتمتعو معاها

-الهام ضحكات: جايبة عريس لرنيم

-رنيم: اويلي شكووون ا بنت الحرام

-سميرة: وا الوحدة هي اللي تخرج على راسها و على صاحبتها حتا هي

-حورية: هي دابا نتي خرجتي على راسك!