فجهة اخرى..........
تجهيزات ضريب الصداق كانت غادة على قدم و ساق، السيمانة الاولى د سارة دوزاتها بين المقاطعة و الطبيب و الطلوع و النزول مع باها كتجمع فوراقيها، فرحتها كانت مضاعفة اولا بزواجها من شخص غير فديك السيمانة حسسها بلي ملكات الدنيا و ما فيها سوا باهتمامو و حتا بكلامو اللي كان كيختارق قلبها بكل سهولة و ثانيا برنيم اللي دوزات معاهم ديك السيمانة فالدار هي و امير بلا رشيد، رنيم اللي تحلونات و زاوگات باش تمشي تعاون ختها دايرة السبة بدوك الكوابيس اللي ماكيخليوهاش تنعس، شاف حتا عيا و وافق عل اقل يمكن تتوحشو و يتوحشها و يكون خير فداك الغرض اللي لحدود هاد اللحظات مازال ما تقضا...........
السيمانة الثانية بدات بالدوران نيشان فالقيساريات على القفاطن سوا اللي غتبرز بيه سارة خصوصا انهم غيديرو عشا غير بين العائلة بحضور العدول سوا اللي غتحضر بيه رنيم و حورية، رجعو للدار منهكات بالتعب غير دخلو تسرحات كل وحدة فسداري كتتسنط لعظامها فانتظار يرتاحو و ينوضو لشغالاتهم.........
تقادات رنيم فجلستها مهتمة بأمير اللي وقف عليها كيهرنن، عطاتو الخاطر حتا سكت فالوقت اللي صونا تيليفون سارة بنمرة غالي و ناضت لبيتها تجاوبو اما حورية تقادات بدورها فجلستها مترددة تسول فبنتها، فكرات حتا فكرات فاللخر قررات تدوي
-حورية: رنيم كيف غادة مع رشيد ؟
طولات فيها رنيم الشوفة غير مستغربة من السؤال، قلبات عينيها لامير و جاوباتها ببرود
-رنيم: عادي، بيخير
-حورية: واش مرتاحة؟
-رنيم: فاش غينفعك جوابي ا ماما، هاني مرتاحة او مامرتاحاش فين الفرق؟
-حورية: اكيد كاين فرق، الا كنتي مرتاحة هادشي اللي بغينا و لكن الا كنتي مامرتاحاش و كاين شي مشكل عاوديه ليا ا بنتي نوقف معاك و نلقاو الحل اللي يريحك
حدرات راسها بنظرات فارغة كتفكر فكلامها، تعاود ليها على الكابوس اللي ملازمها؟ تقول ليها بلي لحد الآن ماعارفاش شنو هو المعنى د العلاقة الزوجية و عمرها عاشتها بمشاعرها؟ تقول ليها بلي كتحس ببرود من جهة راجلها كيق•تلها نهار على نهار خصوصا انها من النوع اللي كيبغي يسمع كليمات زوينين يحسسوها بانوثتها و بجاذبيتها و راجلها من النوع الفقير من هاد الناحية؟ اش غتقول و اش غتقول؟
صمتها طول حتا فهمات حورية بلي ماغاديش تجاوب
-حورية: نتي حرة ا بنتي تعاودي ليا او ماتعاوديش، عارفة الثقة اللي كنتي دايرة فيا تهرسات بغيت غير نقول لك
-قاطعاتها: علاش كتقولي هاكا ا ماما ؟ حتا حاجة ما تهرسات، انا عارفة بابا الا مشا حتا زير الواحد بالسيف عليه يقول اللي كاين و اللي ماكاينش
أنت تقرأ
غفران- قصة عشق تستحق الصفح (مكتملة)
عاطفيةهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
