فدار الوافي......
جلسات معاهم صفية حتا جبرات بخاطر سارة و اكدات لها فعلا ان غالي ماعندوش علاقة بشنو دار عصام و ان ماكان فخبارو والو عاد مشات، ناضت حورية لكوزينتها خلات أمير مع رنيم اما سارة شدات راسها ماعارفة شنو دير، شوفتو مور هاد الوقت كامل اللي داز زائد ظلمها ليه و مرة اخرى الاحترام اللي لقات من جهتو بالرغم من كلشي دخلوها فحيرة و ما حسات براسها حتا فرغات مشاعرها السلبية اللي تجمعات فجوفها على طول هاد العشر ايام او بالاحرى على طول هاد المدة اللي حسات فيها براسها مظلومة و ما معاها حد على شكل دموع ممزوجين بشهقات مريرة خارجة من القلب خلات رنيم تبكي معاها
-سارة بضحكة باهتة: حتا نتي على سبة
-رنيم: خاص غير اللي يبدا ليا (مسحات دموعها باش يجيو فبلاصتهم دموع اخرين) دابا علاش كتبكي
-سارة: ماحاملاش راسي
-رنيم: علاش؟
-سارة: واش سمعتي ماماه شنو قالت؟ انا اللي كنت كنقول ما عمري نعاود نبان فحياتو غير باش مايعرفنيش طماعة و فاللخر يوقع ليا هادشي و نتشوه معاه؟ كنت كنقول غنوقف عليه يعاوني يمكن يعرف داك الحمار و يهضر معاه، كنت عارفة عندو علاقة زوينة بكاع الدراري د الحومة و الا ماكانش كيعرفو هو غيكون كيعرف شي واحد كيعرفو و فاللخر شنو؟ فاللخر صدق هو صاحبو نيييت و بحال خوه (تزيرات) باااينة عاود ليه كلشي على شنو دوزنا
-رنيم: و على شنو دوزتو؟
مسحات دموعها بانكسار
-سارة: مايمشيش بالك بعيد ما دوزنا حتا تخربيقة و لكن غير ديك المدة اللي دوزناها هضرة فالتيليفون كتعتابر كنت مصاحبة معاه واخا كنت مصاحبة غير بالسمية، لا هضرة بحال الناس كنهضروها لا ملاقية مقادة مرة فاربع شهور، دابا فاش كنتفكر بلي كنت باغا نتزوج بيه على ود الفلوس كنبغي نحماق، لهاد الدرجة كنت معمية؟ والله ما كذبات ماماه فاش قالت داك الحمار كان مطمعني حيت فعلا كنت طماعة و حتا فاش رفضت غالي المرة اللولة رفضتو حيت كنت طامعة فاللي يعيشني فما احسن، كنت باغا واحد لاباس عليه و كنحلم بواحد الفلوس عندو داخلة خارجة حتا حاجة ما يعزها فيا
-رنيم: من حقك تختاري اللي يريحك ماديا و لكن ا سارة تتزوجي غير على ود الفلوس هنا مامتافقاش معاك، يمكن كون كان عصام شي واحد عندك مشاعر من جهتو و فنفس الوقت عاجبك الجانب المادي ديالو كنت نقول عادي و لكن حتا كون ماكانش عصام كان ممكن يكون واحد اخر و كان ممكن تكوني فعلا مزوجة بيه دابا و يعلم الله المشاكل اللي كنتي غتلقاي
-سارة: كنت تنقول المشاعر ماشي شي حاجة مهمة فالزواج ممكن نبغيه مور ما نتزوجو ماشي ضروري نتزوج بيه عن حب و لكن بغيتي الصراحة اليوم شي حاجة تبدلات فيا بشوفتو
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
