ماكانتش عارفة غيثة واش داكشي اللي كتحس بيه هو اللي كيتسمى "الاعجاب" او شي حاجة اخرى! اللي كانت عارفة هو مرتاحة و عاجبها الحال و الخوف لي كان عندها فالاول بدا يتبخر حتا اختفى كليا ملي نزلات للصالة لتحت و استقبلوها خواتاتها بالزغاريت و التعشاق على النبي واخذين راحتهم خصوصا و ان باهم خرج.......
جلسات غيثة وسطهم و الفرحة مستوطنة فؤادها، حشمانة و السر نازل عليها و هي كتسمع فمها لي كانت كتعاود لهم شنو وقع الفوق
-حورية: تبارك الله عليه و خلاص، باينة فيه راجل ديال الزمان الوحدة حتا الا وقفات حداه يقولو الناس غير هي لي مزوجة
-سارة لختها: غيثة شفتيه؟ عجبك؟
خاطرها كيجاوب ب اه و لكن فين اللسان باش غتنطقها حدها حركات راسها بالايجاب و طمرات، هزات سارة راسها فرنيم و تنهدو براحة قبل ما تقلب ديك الراحة فلمح البصر ملي سمعو كلام سميرة
-سميرة: انا را خايفة من ديك القضية ديال البلية، كلنا كنعرفو ناس كيكميو و عمكم براسو تيكمي و لكن باش مو تقولها و تسبقها من النهار الاول الا و شي حاجة موراها او لا؟
ها اللي كانو خايفات منو وقع، خرجات رنيم عينيها فخالتها اللي مافهماتهاش في حين سارة كانت حاضية غير ملامح غيثة و داكشي اللي كانو مرتاحات من جهتو تبخر، تقاسيم وجهها فلحظة وحدة تقلبو 180 درجة سوا بحجبانها اللي تعقدو و حتا ببريق عينيها اللي طفى.........
ضحكات رنيم ضحكة صفرا و جاوبات خالتها متلفة الموضوع
-رنيم: كنتخيل مرت عمي و جدة الا ساقو الخبار بلي خبينا عليهم اش كان اليوم كيفاش غتكون ردة فعلهم
-سارة: الحمد لله كلشي داز على خير اذن غدا فالغذا ان شاء الله انا اللي غنتكلف بالقنبلة
-حورية: ماغتقولو والو حتا يقولها ليهم باكم بلاما نحطوه فشي موقف خايب (قلبات وجهها لختها) و حتا نتي ديري راسك ماعارفة والو هاني تاني كنوصيك
-سميرة هربات عينيها و فخاطرها كتولول: ان شاء الله خير (جمعات الوقفة) جريو عليا انا خاصني نمشي
-حورية: مازال الحال
-سميرة: مازال غندوز للسوق مابغيتش ندخل بايدي خاويين، قلت ليهم راني غادة غير نتقضى حتا الا شافوني داخلة و مدخلة مايشكوش فيا......
ودعات سميرة البنات و جرّات ختها للباب مخليين البنات بوحدهم، استغلت رنيم الفرصة لي مها برا و قربات من غيثة لي كانت فدوك الاثناء مضاربة تاني مع وساوسها و ضميرها المتكلم
-رنيم بهدوء: غيثة فاش كتفكري
-غيثة بلاما تشوف فيها: والو
-سارة: خفتي من داكشي اللي قالت خالتي؟
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
