غفران- قصة عشق تستحق الصفح (مكتملة)

غــــــــفـــــــران -أشعة الأمل- 09

فصباح اليوم الموالي......
حلات رنيم عينيها على ڤيبرور تيليفونها تحت راسها، فيكسات نظراتها على سقف غرفتها كتحاول تتذكر فين هي و شكون هي حتا تراكمو الذكريات على عقلها و استشعرات الڤيبرور د التيليفون عاد خشات ايديها تحت المخدة جبداتو لقات لابيل من الهام، عقدات حجبانها بغرابة و شافت فالساعة لقاتها ل 10 د الصباح و زادت استغربت، مسحات وجهها بايديها و جاوباتها كتفوه
-رنيم: بايتة تحلمي بيا؟

-الهام: الناس كيقولو صباح الخير صباح النور كي صبحتي!

-رنيم: اه بصح عندك الحق! صباح الخير ا لالة العروسة

-الهام: صباح النور ا الزوينة، عاد فايقة؟

-رنيم: واييه مانعستش بكري، نتي صاڤا؟ محتاجة شي حاجة!

-الهام: لا عيطت لك غير باش نقول لك صيفطي ليا التصاور

-رنيم: دابا واش من نيتك معيطة ليا على ود التصاور

-الهام: اوا ا ختي اللهم نصبّح عليك و نبقى واقفة عليك حتا تصيفطيهم ولا نبقى نطلب و نرغب فيك تصيفطيهم ليا و الواعرة ماغتصيفطيهمش

هزات راسها بصعوبة من فوق المخدة و تقادات فجلستها مجاوباها
-رنيم: كتظلميني

-الهام: والله ما نتفاك معاك ا رنيم دابا تصيفطيهم ليا

-رنيم: نفطر و نصيفطهم لك ا الهام

-الهام بعناد: دابا ا رنيم دابا حتا من لابيل ماغنقطعهاش حتا نتأكد بلي وصلوني

-رنيم ساطت: وا باز ا الهام بااااز هاني ا ختي غنصيفطهم

دارت سبيكر و طلقات الويفي كتصيفط لها فتصاورها بزز منها و بلا عگز، غير صيفطاتهم قطعات معاها عاد ردات البال لميساجات الياس سوا اللي خلا ليها لبارح و حتا اللي صيفط لها داك الصباح ملي عاد فاق...

اخر حاجة كانت متوقعاها هي تلقى منو شي حاجة خصوصا ملي تعطل فالجواب قالت مع راسها ماغاديش يعاود يدويها و الاتصال اكيد غيتقطع بيناتهم فديك الليلة كيف ديما و لكن اللي وقع خالف توقعاتها كلها.....

رسميا و من داك الصباح التيليفون مابقاش كيفارقهم من غير الا كانت هي جالسة مع باها او كان هو خدام و ماصالحش ليه يهز تيليفونو، كيجمع بيناتهم كلام عادي بالنسبة لأي واحد قراه موراهم و لكن بالنسبة لهم هما بجوج كان كافيهم و مريحهم، باراكة غير الاهتمام اللي باين فيه و هو كيسولها على صحتها، دواها، احوالها و على نهارها كيف كيدوز بلا ملل، عارف جوابها غيكون نفسو حيث ايامها كلهم كيدوزو بنفس الروتين و بالرغم من هادشي مايمكنش يدوز النهار بلاما يسولها شنو دارت فيه بالتفاصيل و حتا هي نفس الشي....