نزل عصام من السكوتر بوجه ماكيتفسرش مقطب حجبانو و مخرج فيها عينيه هي اللي مابقاتش قدرات تبقى واقفة و جلسات على الطروطوار حاضنة الكراطن بين ايديها، الخلعة هربات اللون من وجهها و قلبها بقا ليه غير يسكت و هي كتخيل كون ربي ماحفظهاش فين كانت تكون..........
كان ناوي يدور فيها و ينعتها بالعمية و لكن غير شاف حالتها كيفاش دايرة تحنى على ركابيه بلاما يقيص الارض حتا رجع فمستواها و نطق بهدوء متناقض مع تقاسيم وجهو
-عصام: صافا!
كورات ايديها تكويرة د الغدايد و غمضات عينيها كتهدن روحها بزز اما هو غير شاف ردة فعلها جمع الوقفة و نسا الهدوء قبل ما يعاود ينطق غير هاد المرة بانفعال
-عصام: واش عمية ا بنادمة ماكتشوفيش! كون ضربتك فين غنوصل؟
خرجو عينيها فيه و بلا هواها حطات الكراطن فالارض و ناضت تقابلات معاه بنظرات كيفيضو بشرار الاعصاب
-سارة: واش مريض ولا مالك! ماشفتينيش كيفاش مكرفصة و بزز باش كنشوف قدامي! را نتا اللي خرجتي بحال الزواق اما انا شفت الطريق مزيان عاد قطعت يعلم الله منين نزلتي عليا تفوو
-عصام: وجهك قاصح ا ختي و تقووول واش كتقشري
قاطعاتو بغضب
-سارة: خويا واش مسلطك عليا شي واحد، منين ما درت نلقاك قدامي مرة وحدة درتي فينا خير غتبقى تمن علينا بيه ولا شنو، شكرا ا سيدي شكرا غير عطيني بالتيساع واخا!
تحنات تهز الكراطن و حبسات الحركة فنص الطريق فاش سمعات كلامو
-عصام: مانقدرش نشوفك فالخطر و ندير راسي ماكنعرفكش، واجب عليا نحميك
كان ناوي يندمها على كلامها حتا تكره راسها و ترجع لدارهم باكية و لكن احساسو بلي زاد فيه و هي اصلا ماكتعرفوش باش تأمن ليه خلاه يعيد النظر فتصرفاتو و فكلامو معاها، رطب لسانو بزز عليه و فك غوباشتو بلا خاطرو.............
زاد قرب منها بخطوة و استأنف كلامو قدام نظراتها المصدومة من تغييرو المفاجئ
-عصام: نتي ماكتعرفينيش و لكن انا كنعرفك مزيان ا سارة (بانت ليه حلات فمها بدهشة و وساعو عينيها و تبسم بالثقالة) كنعرف سميتك و سمية باك و سمية مك و سمية خواتاتك و شنو كاديري فحياتك و الطريق اللي كتمشي منها و تجي حافظها كثر ما حافظ طريق دارنا، باختصار عيني محطوطة عليك هادي مدة و بكل صراحة كنت كنقلب على شي طريقة باش نتعرف عليك غير ماتوقعتش غتكون بهاد الشكل، المرة اللولة طلع ليا الد•م من البشر لي كان كيتفرج فيك و حتا واحد ماعاونك و طلع ليا الد•م اكثر من داك البرهوش (حك فوق حاجبو) و انا عارف راسي كحلتها معاك حيت خرجت فيك عيني و دابا تاني فعيواض مانسولك واش بيخيير و نعتاذر على الغلط اللي مني جالس كنخرج فعيني كثر ما هما خارجين اصلا (تبسم بخفة و حدر راسو) كنعتاذر ا لالة ماديريهاش مني قلة صواب
أنت تقرأ
غفران- قصة عشق تستحق الصفح (مكتملة)
Romantizmهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
