رمشات و عاودات كتتأكد واش فعلا هو اللي قدامها او لا، الوقفة اللي وقفات و عنقها اللي تعنز كتشوف موراها خلاو رنيم توقف بدورها و تقلب وجهها لنفس البلاصة اللي كتشوف فيها سارة حتا وقفات مصدومة بحالها غير الفرق بيناتهم ان وحدة ماباغاش تيق شنو كتشوف في حين لوخرى توسعو عينيها ملي تفكرات فين اول مرة شافت عصام، الوقفو اللي واقف كيعبر، الكاسكيط المقلوبة اللي كان لابس، الضحكة اللي كانت نفس الضحكة اللي ضحك لها ملي خذات عندو المرة الاولى و الوحيدة زائد المكان اللي هما فيه كان ليهم تأثير قوي فانها تسترجع ملامح الولد اللي دوات عليه غير قبل من شوية د الوقت دابا، الولد اللي كيبيع الديسير الغابر كان نفسو عصام خطيب سارة....................
رجع الصرف للكليانة و هز تيليفونو مخسر سيفتو ناوي يعاود يعيط ليها حتا حس بشي حد وقف عليه، الهزة اللي هز راسو غيطيحو عينيه عليها هي و رنيم و علامات الدهشة عاليين تقاسيم وجههم، رجع التيليفون لجيبو بكل هدوء و تأفف فخاطرو كيقول "على السلامة" عاد تبسم رافع حجبانو و كأن حتا حاجة ما واقعة
-عصام: سبحان الله عمرك طويل ا حلالي، عاد كنت ناوي نعيط لك
-سارة: شنو كادير هنا!
مد ايديه فالفراغ كيشير على الفواكه المستفين فوق الكروسة
-عصام: خدام على راسي
-سارة: شاد فبلاصة شي واحد ياك! علاش ماقلتي ليا والو الصباح ملي صيفطت لك ميساج!
-عصام ببلاهة: مافهمتش! ياك جاوبتك و قلت لك اليوم خدام مالي كذبت عليك؟ هاني خدام
قدرتها الاستيعابية تحدات ليها فديك اللحظة، رافضة تمام الرفض انها تيق شنو كتشوف
-سارة بضحكة صفرا: واش هادي خدمة ثانوية كاديرها فالويكاند ملي كتكون ساد لاجونص و السناك ولا كيفاش!
-عصام: جاك منطقي هادشي اللي كتقولي؟
-سارة بغضب: وا كيفاااش كيفاش شرح ليا ماقادراش نفهم
دخلات بيناتهم رنيم تهدن الامور
-رنيم: دابا شنو واقع، غير بشوية تفاهمو
-سارة بانفعال: علاياش غنتفاهمو علاياااش! على الكذوب؟
-رنيم: فاش كذب عليك عادي يكونو عندو مشاريع و تكون هادي خدمة زايدة مافيها والو
-عصام ببرود: خدمتي الرسمية هي هادي اللي كتشوفو قدامكم اما المشاريع مازال مطولين شوية علاما يساليو اشغالهم بصراحة
-رنيم بدهشة: كذبتي علينا؟
-عصام: ماكذبتش، النهار الاول اللي جيت للدار قلت للواليد ديالكم خدام و داخل فمشروع مع خويا و حتا الواليدة قالت لكم اللي كاين، راجل بذراعي ماتيعيبنيش جيبي و الحمد لله جيبي عامر راكم شفتوه
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
